Ляхнар 12 - Гирами Китаб

Гьирод хъугънайидарихъ хъергуб

¹ Гьадму вахтари паччагь Гьирод хъугънайидарикан сакьюдарихъ хъергуз хъюгъру.

² Дугъу буйругъ тувну, Югьандин чве Якьуб ханжлихъди йивну йикӀуру.

³ Хъа му ляхин жугьдариз хушди дябкъну, Петрра дисуру. Му Лавшарин машкварган гъабшиб вуйи.

⁴ Петр дидисну, дустагъдиъ итру ва ю-юкьурди эскрар айи юкьуб дестейиз думу, нубатар апӀури, гъаравликк уьрхюз буйругъ тувру, фицики дугъу Пасхайин машкврахъан Петр халкьдин улихьна диван апӀбан бадали адагъуз ният дапӀнайи.

⁵ Петр дустагъдиъ ул алдадабгъри уьрхюрайи, хъа хъугънайидар дугъхъанди Аллагьдиз ккарагурайи.

Петр азад хьуб

⁶ Гьиродди думу халкьдихьна адауз ккайи йигъ хьайиз йишвну, Петр, кьюр эскрин арайиъ зунжрарихьди дитӀнайир, даахнайи. Хъа дустагъ урнарихъ хъайи гъаравлари уьбхюрайи.

⁷ Сабпну дустагъдиз Агъайин малайик гъюру ва душвайишв аквну абцӀру. Петрик хил кучну, «Ухди гъудужв!» – пну, малайикди думу хъиргру. Ва дугъан хилариин али зунжрар алдахьуру.

⁸ Хъа малайикди Петриз кӀуру: – Юкьвʼан идибтӀ ва ликариин алахь. Петри гьаци гъапӀиган, малайикди кӀуру: – Чуха хъипну, узухъди гъач.

⁹ Малайикди апӀурайи му ляхнар, гьякьикьатдиъ дарди, аьжайиб рябкъбиинди шулайидарси гьигъри, Петр дугъан кьяляхъди удучӀвуру.

¹⁰ Сабпи ва кьюбпи жергейин гъаравларихьан гьудучӀвну, дурар шагьриз гъягъру урнарихьна гъюру. Хъа чиб-чпилан арццу урнариан дурар удучӀвуру. Саб кючейиан удучӀвиган, малайик сабпну дургру ва Петр сарди гъузру.

¹¹ Чан фикрихъна гъафи Петри кӀуру: – Гьамус дугъриданра, Агъайи, Чан малайик гьаъну, узу Гьироддин хилккан ва жугьдари узʼина хуз ккайи вари бала-кьазйириккан уьрхюб гъябкъюнзуз.

¹² Му аьгьвалат аннамиш дапӀну, Петр Маркра кӀуру Югьандин дада Марʼямдин хуларихьна гъюру. Душваъ хайлин халкь уч духьну, ккарагурайи.

¹³ Петр урнарик кучиган, Рода кӀуру гъараваш риш удучӀвуру ва дугъу, думу фуж вуш, гьерхру.

¹⁴ Хъа Петрин сес аьгъю дубхьну, шадвалиан урнар арццуз гьархну, думу хулаъ архьру, ва, урнарихъ Петр дийигъна пну, хабар тувру.

¹⁵ Дугъаз: «Уву яв фикирнахъ хъана?» – кӀуру, амма шуру чан гафар гьякь вуйиб хъана тасдикь апӀуру. Дурари шураз: «Думу Петрин рюгь вушул», – кӀуру.

¹⁶ Петри урнар урччвуб давам апӀури шулу ва, урнар арццну, чпиз Петр гъяркъиган, вари мюгьтал шулу.

¹⁷ Хили ишара дапӀну, дурариз ккебехъ дупну, Петри, учв Агъайи дустагъдиан фици адаънуш, ктибтуру, хъа кӀуру: «Мидкан Якьубдиз ва миди вуйи гъардшариз кидибтай». Хъасин дилин думу жара йишваз гъягъюру.

¹⁸ Йигъ улубкьуради, эскрарин арайиъ, Петр нашдикӀан кӀури, аьхю гъалмагъал абхъру.

¹⁹ Гьиродди Петр агури гъахьну, амма дугъаз думу гъидихъундар, ва дугъу, эскрарихьан силис гъадабгъну, дурар дариз зигуз буйругъ тувру. Хъасин Гьирод Ягьудия уьлкейиан Къайсарияйиз гъягъюру ва саб кьадар вахтна гьадушваъ гъузру.

Гьироддин аьжал

²⁰ Гьироддиз Тирин ва Сайдайин агьалйирикан гизаф хъял кайи. Дурари Гьироддин дахъру хулан гъуллугъчи Власт чпин терефназди илтӀикӀну, дугъан кюмекниинди вари паччагьдихьна дуфну, дугъкан мясляаьт гъитуб ккун апӀуру, гьаз гъапиш дурарин уьлке Гьироддин вилаятдикан итӀру сурсатариинди асиллу вуйи.

²¹ Гюрюшмиш шуз улупнайи йигъан Гьирод, паччагьвалин палтар алди, тахтниин деъру ва халкьдихъди улхуз хъюгъру.

²² Халкьди дугъаз: «Му инсандин ваъ, хъа Аллагьдин сес ву!» – кӀури, чӀигъар апӀури гъахьну.

²³ Хъа Гьиродди му гафар лайикь вуйидарси кьабул апӀуру, амма Аллагьдин ад гъапӀундар. Мидиз лигну Аллагьдин малайикди дугъаз йивуру, йикӀуру ва думу мялхъвяри хътитӀуру.

²⁴ Аллагьдин Гаф рабгъури, хъугънайидарин кьадар артухъ шулайи.

²⁵ Варнавна Саул, Ерусалимдиъ чпиз туву табшуругъ тамам дапӀну, чпихъди Марк кӀуру Югьан хъади, Антиохияйиз хътакуру.