Ляхнар 11 - Гирами Китаб

Петр Ерусалимдиз хътакуб

¹ Вари Ягьудия уьлке вуйиси Исайин вакилариз ва гъардшариз, жугьуд дарударира Аллагьдин Гаф кьабул гъапӀну кӀури, ебхьуру.

² Ва Петр Ерусалимдиз гъафиган, жугьдари дугъаз тягьнйир гъивнийи:

³ – Уву суннат дапӀну адрударин хулариз гъягъюри ва дурарихъди уьлихъ деъри гъахьунва!

⁴ Гьадмуган Петри вари гъаши ляхнар хъайи-хъайиси ктитуз хъюгъру:

⁵ – Яффа шагьриъ, ккарагурайи вахтна, аьжайиб рябкъбиинди юкьуб пӀипӀнахъан дибиснайиси саб аьхю суфрасиб аьршариан йиз улихьинди ибхри гъябкъюнзуз.

⁶ Узуз дидʼин жилилан гъягъру гьяйванатар, нахшрар, битӀар-чурчлар ва завун ничхрар гъяркъзуз.

⁷ Хъасин гьамцдар гафар кӀурайи сес гъеебхьунзуз: «Петр! Гъудужвну, дурккну итӀин!»

⁸ Хъа узу жаваб тувза: «Затра дициб дарапӀарза, Агъа, фицики гьич саб вахтнара чӀуру ва марцциб дару мутму гъипӀур дарза».

⁹ Сесну завʼан кьюбпи ражари гъапизуз: «Аллагьди марцц гъапӀуб марцциб даруб вуди гьисаб мапӀан».

¹⁰ Гьамци шубуб ражари гъабхьнийи, ва хъана вари аьршариз гъизигнийи.

¹¹ Му арайиъ дишлади узу дергнайи хуларихьна Къайсарияйиан узухьна гьаънайи шубур кас гъафнийи.

¹² Ва Гирами Рюгьну узуз, шаклу даршиди, гьадрарихъди гъягъюз амур гъапӀнийи. Узухъди гьаму йирхьрид гъардшарра гъафну. Учу Корнилийин хулаз гъафунча.

¹³ Дугъура учуз, чаз фици марцци малайик гъяркънуш ва малайикди фу гъапнуш, ктибтнийчуз: «Яффайиъ айи Петр кӀуру Симон хъади гъюз адмийир гьаъ.

¹⁴ Дугъу увуз уву ва вари яв хизан уьрхру гафар пидивуз», – кӀури.

¹⁵ Узу улхуз хъюгъиган, сифте ухьʼинси, дурариина Гирами Рюгь гъафнийи.

¹⁶ Ва йиз кӀваина думуган Агъайи гъапи гафар гъафнийиз: «Ягьʼяйи инсанар штуан гъапӀну, хъа учву Агъайи Гирами Рюгьнахьди цӀийи апӀидичву».

¹⁷ Гьаци вуйиган, эгер Аллагьди, Агъа вуйи Месигь Исайихъ хъугъу ухьузси, жугьуд дарударизра Гирами Рюгь багъиш гъапӀнуш, Аллагьдиз машат апӀуз узу фуж вухъа?

¹⁸ Му гафар гъеерхьиган, дурари гьерхбар дерккру. – Рябкъюрайиганси, Аллагьди жугьуд дарударизра цӀийи уьмур бадали чпин тахсрар гардандиъ дисуз ихтияр тувну, – кӀури, дурари Аллагьдин ад апӀуру.

Антиохияйин хъугънайидар

¹⁹ Хъа Стефандин вахтари, зулмар дапӀну, утӀуркку хъугънайидар, жугьдаризтӀан дарди Ужувлан хабар рабгъури, Финикия, Кипр ва Антиохияйихънакьан хъуркьнийи.

²⁰ Хъа Киприан ва Киринеяйиан вуйи хъугънайидарикан сакьюдари, Антиохияйиз дуфну, жугьуд дарударихъдира сюгьбатар апӀури, Агъа Исайикан Ужувлан хабар улупури гъахьнийи.

²¹ Дурарихъди Агъайин кьудрат хъайи ва гьаддиз гизафдар, хъугъну, Агъайихьинди илтӀикӀнийи.

²² Мидкан аваза Ерусалимдин хъугънайидарихьна рубкьуру ва дурари Антиохияйиз Варнав гьаъру.

²³ Аллагьди му адмийириз ужʼвал дапӀну дябкъну, дина гъафи Варнав шад шулу, ва Аллагьдиз кӀваантӀан вафалу хьувалиъ дугъу дурар ижми гъапӀнийи.

²⁴ Фицики думу Гирами Рюгьну ва хъугъвали ацӀнайи кас вуйи. Натижайиъ лап гизаф халкь Агъайин терефкрар шулу.

²⁵ Хъасин Варнав Тарсдиз Саул агуз гъягъюру

²⁶ ва, дагну, Антиохияйиз кьяляхъ хъади гъюру. Душваъ дурар сад йисан гъузнийи ва, хъугънайидар уч шлушваз Варнавна Саул гъюри, дурариз аьгъювалар улупури шуйи. Гьаддихъанмина гьадму Антиохияйиъ Исайин ученикариз сифте вуди «христианар», Яна «Месигьдин терефкрар» пуз хъюгъну.

²⁷ Гьадму вахтна Ерусалимдиан Антиохияйиз пайгъамбрар гъюру.

²⁸ Дурарикан, Гирами Рюгьну гьевесламиш дапӀнайи сар Агав кӀурури, вари дюнʼяйиъ зурба гашʼвал абхъди кӀури, хабар дебккнийи, ва гьаци Клавдийи паччагьвал апӀурайиган гъабхьнура вуйи.

²⁹ Думуган Исайин ученикари, гьарури чаан удукьрубкьан, Ягьудия уьлкейиъ айи чпин гъардшариз кюмек апӀуз кьатӀъ гъапӀнийи.

³⁰ Дурари, кюмек уч дапӀну, Варнавдихьди ва Саулихьди хъугънайидарин аьхюдарихьна хътапӀнийи.