Ляхнар 10 - Гирами Китаб

Петр Корнилий кӀуру Римдин юзбашийихь хьуб

¹ Къайсарияйиъ Корнилий кӀуру сар кас яшамиш шули гъахьну. Думу Италияйин кьушмарин юзбаши вуйи.

² Думу, чан вари хизанси, Аллагьдихьан гучӀури шлур ва Аллагьдиз вафалу жви вуйи. Дугъу жумартвалиинди касибариз садакьа тувуйи ва гьаммишан Аллагьдиз ккарагуйи.

³ Аьжайиб рябкъбиинди йигъну, сяаьт шубуб шулайи арайиъ, дугъаз Аллагьдин малайик чан улихьна дуфну ачухъди рякъюру. Малайикдира дугъаз: «Корнилий!» – пну, дих апӀуру.

⁴ Дугъу, гучӀра дубхьну, малайикдихьинди дилигну: «Фу кӀурава, Агъа?» – пну, гьерхру. Малайикди дугъаз жаваб тувру: – Яв ккарагбар ва яв садакьйир Аллагьди кӀваин гъюрхну.

⁵ Гьамус, Яффайиз гьаъну, Петр кӀурайи Симондиз дих апӀуз гъит.

⁶ Думу гьюлихъ хал хъайи гъидкьарин уста Симондихь дергна.

⁷ Малайик гьудучӀвиган, Корнилийи чан кьюр гъаравшиз ва Аллагьдин рякъюъ айи сар эскриз дих апӀуру

⁸ ва, дурариз гъабшибдикан кидибтну, дурар Яффайиз гьаъру.

⁹ Хъайигъан лисун шули, дурар шагьриз багахь шулайи вахтна, Петр ккарагуз гъваин улучӀвуру.

¹⁰ Дугъаз гаш шулу ва дугъу уьл ипӀуз кьатӀъ апӀуру. Хураг гьязур апӀури имиди, думу аьжайиб гьялназ гъюру.

¹¹ Дугъаз, аьршар атӀарццну, юкьбиб пӀипӀарихъанна шли-вуш дибиснайиси аьхю суфрасиб саб шейъ жилиина ис шули рябкъюру.

¹² Дидʼин гьар жюрейин жилилан гъягъру гьяйванатар, битӀар-чурчлар ва завун ничхрар алди рякъюрайи.

¹³ Петрихьна сес шулу: – Гъудужвну, дурккну итӀин, Петр! – кӀури.

¹⁴ Петри: – Дициб дарапӀарза, Агъа, гьаз гъапиш саб вахтнара чӀуру ва марцц дару мутму гъипӀур дарза, – жаваб тувру.

¹⁵ Дугъаз думу сесну кьюбпи ражари кӀуру: – Аллагьди марцц гъапӀуб марцц даруб вуди гьисаб мапӀан.

¹⁶ Гьамци шубуб ражари текрар шулу, хъасин дишла вари хъана завариз зигуру.

¹⁷ Петри, гъябкъюбдин мянайикан фагьум апӀури имиди, Корнилийи гьау адмийир, Симондин хулар гьерхри, дугъан урнарихьна дуфну дийигъуру.

¹⁸ Дурари зарбди гьерхру: – Петр кӀуру Симон гьаму хулариъ дергнайин?

¹⁹ Петри гъябкъюбдикан фагьум апӀури имиди, Рюгьну дугъаз кӀуру: – Узухъ хъебехъ, уву шубур касди агура.

²⁰ Гъудужв, улдучӀв ва, саб фикирра кадарди, дурарихъди гъарах, фицики дурар Узу гьаъназа.

²¹ Петри, улдучӀвну, гьадму касариз кӀуру: – Учву агурайир узу вуза. Учву гьаз дуфнайидар вучва?

²² Дурари жаваб тувру: – Учу юзбаши Корнилийи, вари жугьдари гьюрмат апӀурайи гьякьлу ва Аллагьдихьан гучӀру касди, гьаунчу. Марцци малайикди дугъаз, увуз чан хулаз дих апӀуз ва яв гафарихъ хъпехъуз, амур дапӀна.

²³ Хулаз теклиф дапӀну, Петри дурар хялижв апӀуру. Хъайигъан рякъʼин духьну, Петр дурарихъди гъягъюру, ва Яффайиан сакьюдар гъардшарра дугъахъди хъахьру.

²⁴ Хъайигъан думу Къайсарияйиз хъуркьру. Корнилий, чан майиларна багахьлу дустар уч дапӀну, дурариз ккилигурайи.

²⁵ Петр хулаъ учӀвруган, улихьна удучӀву Корнилийи, дугъан ликарикк дахъну, икрам апӀуру.

²⁶ – Гъудужв! Узу анжагъ увусир инсан вуза – кӀури, Петри думу за апӀуру.

²⁷ Дугъахъди сюгьбат апӀури, Петр хулаъ учӀвиган, дугъаз душваъ аьхючӀвеъ халкь уч духьну рякъюру.

²⁸ Петри дурариз кӀуру: – Учвуз аьгъячвузки, жугьудриз жара миллетдиндарихъди ттикӀуб вая дурариин улуркьуб гъадагъа вуйивал. Аммаки Аллагьди узуз гьич сар адмикьана кифир, ясана марцци дарур вуйиб гьисаб дарапӀуб табшурмиш гъапӀунзуз.

²⁹ Гьаддиз лигну, узуз теклиф гъапӀумитӀла, чӀалкьан дарпиди мина гъафунза. Гьаци вуйиган, учвхьан гьерхраза: узуз гьаз дих дапӀначва?

³⁰ Гьадмуган Корнилийи кӀуру: – Юкьуд йигъ мидиз улихьна, лисхъан сяаьт шубуб шули, гьаму вахтна, узу йиз хулаъ ккарагурайза. Сабпну йиз улихь аку палтар али сар кас ачмиш гъахьну

³¹ ва дугъу узуз гьамци гъапну: «Корнилий, яв ккарагувал аьршариз деебхьна ва уву касибариз туву садакьйир Аллагьди кӀваин дюрхна.

³² Гьаци вуйиган, Яффайиз Петр кӀуру Симон хъади гъюз адми гьаъ, думу гьюлихъ яшамиш шулайи гъидкьарин уста Симондин хулаъ хялижвди дергна».

³³ Узура дишлади увухьна гьаунза, ва гъюб ужу гъапӀунва. Гьамус ухьу вари Аллагьдин улихь дийигънахьа, ва Агъайи увуз йип гъапибдихъ хъпехъуз учу гьязур вуча.

Петрин улхуб

³⁴ Гьадмуган Петр дурариз кӀуру: – Дугъриданна аьгъю гъабшизуз, Аллагь адмийирин машназ дилигрур вуйиб.

³⁵ Дугъу Чахьан гучӀрур ва гьякь вуйир, фуну миллетдин адмийир вушра, кьабул апӀура.

³⁶ Дугъу Месигь Исайин мелзналантина Израилин халкьдиз мясляаьтнан ужуб хабарнакан гаф гьапӀну. Думу варидарин Агъа ву.

³⁷ Улихьнаси Ягьудияйиъ гъаши гьядисйирикан, Ягьʼяйи Галилейиъ улупу штуан апӀувалихъан ккергъу гьядисйирикан аьгъячвуз.

³⁸ Гирами Рюгь ва кьувват туву, Аллагьди Месигь гъапӀу Назаретлу Исайикан аьгъячвуз. Аллагь гьарган Исайихъди гъахьну ва Иса варишвариъ ужувлар апӀури ва иблисдин гьюкмикк ккайикьандар вари сагъ апӀури, лицури гъахьну.

³⁹ Учу Дугъу Ерусалимдиъ ва вари жугьдарин уьлкейиъ гъапӀкьан ляхнарин шагьидар вуча. Думу, гакӀвлин хачрак кьумарихьди карсну, гъакӀну.

⁴⁰ Хъа дукӀну шубудпи йигъан Аллагьди Думу чӀиви гъапӀну, ва Думу инсанарихьна ачмиш шуйи.

⁴¹ Анжагъ Думу варидариз ваъ, хъа Аллагьди улихьмиди ктагъу шагьидариз, яна Думу чӀиви гъашихъан, Дугъахъди ипӀури-убхъури гъаши учузтӀан, улупну, ачухъ гъапӀундар.

⁴² Аллагьди чӀивидарин ва гъийихдарин зиин Диванбеги вуди дерккнайир гьадму Кас вуйиваликан инсанариз аьгъювалар улупуз ва дидин шагьидвал апӀуз учуз амур гъапӀну.

⁴³ Вари пайгъамбрари, Дугъахъ хъугъу гьарсарин гунгьарилан Дугъан ччвурнахъан хил алдабгъиди кӀури, Дугъкан шагьидвал апӀури гъахьну.

Жугьуд дарудари Гирами Рюгь кьабул апӀуб

⁴⁴ Петр улхури имиди, дугъахъ хъпехъурайидариина Гирами Рюгь гъюру.

⁴⁵ Петрихъди гъафи суннат дапӀнайи хъугънайидар, Аллагьди Чан Гирами Рюгь жугьуд дарударизра тувбиин мюгьтал духьнайи.

⁴⁶ Фицики дурариз гьадрари фици, жара чӀалариинди улхури, Аллагьдин аьхювалин тяриф апӀураш, ебхьурайи. Гьадмуган Петри кӀуру:

⁴⁷ – Мурариз ухьузси Гирами Рюгь багъиш гъабхьну. Гьаддиз штухъди штуан хьуз дурариз шлихьан гъадагъа апӀуз шул?

⁴⁸ Ва дугъу дурар Месигь Исайин ччвурнахъан штуан хьуз гъитру. Хъасин дурарира Петрикан чпихъди сакьюдар йигъари гъузуб тӀалаб апӀуру.