Ляхнар 1 - Гирами Китаб

Иса чӀиви хьуваликан

¹ Йиз сабпи китабдиъ, Феофил, узу Исайи гъапӀу вари ляхнар ва улупу аьгъювалар ктитунза,

² Дугъан уьмур, Дугъу Чан ученикарикан ктагъу вакилариз Гирами Рюгьналантина насигьятар тувну, Учв аьршариз удучӀвайиз, лап эвелиан хъюгъну улупунза.

³ Учв дукӀну чӀиви гъахьихъантинара, Иса швнубсабан дурарин улихьна гъюри гъахьну ва Дугъу, Учв чӀиви хьувал усбат апӀури, хайлин шагьидвалар улупну. Учв чӀиви гъахьихъантина ягъчӀвур йигъандин арайиъ Чан вакилариз ачмиш шули, Дугъу дурариз Аллагьдин Паччагьлугъдикан ктибтури гъахьну.

Иса аьршариз удучӀвуб

⁴ Саб ражари, вакиларихъди уьлихъ хъайи вахтна, Исайи дурариз амур апӀуру: – Ерусалим мидипанай, хъа Адашди тувурза гъапибдиз ккилигури гъузай, фицики Дугъу, учвуз Узкан гъеебхьубси, гьамци дупна:

⁵ «Ягьʼяйи инсанар штуан апӀури гъахьну, хъа учву багарихьди Гирами Рюгьниинди цӀийи алаидичву».

⁶ Хъасин дурар вари сабишвʼина уч гъашиган, вакилари Исайихьан гьерхнийи: – Я Агъа! Уву гьамус Израилиз паччагьлугъвал дебккрадарнахъа?

⁷ Исайи дурариз жаваб тувру: – Адашди Чан гьюкмиъ тӀаънайи вахтарна муддатар аьгъю хьувал ичв ляхин дар.

⁸ Гирами Рюгь учвʼина гъафиган, кьувватну ацӀдичву ва Йиз шагьидар, сифте Ерусалимдиъ хъа вари Ягьудияна Самария уьлкйириъ, ва гьацира тап дюнʼяйин тмуну кӀулизкьан, хьидичва.

Иса аьршариз за хьуб

⁹ Гьамци дупну, Иса, дурариз рякъюри, аьршариз за гъахьну ва дифру Думу дурарихьан ккеркру.

¹⁰ Дурар дикъатниинди завариз лигури имиди, дурарин улихьна лизи ккурттар али кьюр жви ачмиш шулу.

¹¹ Дурари гъапну: «Галилей уьлкейин агьалйир! Завариз лигури, мушвʼин гьаз дийигъначва? Учвуз, Думу фици аьршариз за гъахьнуш, гъяркъюнчвуз. Ва гьадму Иса, учвуз аьршариз за шули гъяркъиганси, кьяляхъра гъиди».

¹² Хъасин вакилар шагьрихьан саб километр манзилиъ айи Елион дагъдилан Ерусалимдиз хътаркуру.

¹³ Чпи дергнайишваз дуфну, дурар заан хулаз удучӀвуру. Душваъ Петр, Югьан, Якьубна Андрей, Филипна Фома, Варфолемейна Матта, Алфейин бай Якьуб, Женгчи кӀуру лакӀам хъайи Симон ва Якьубдин бай Ягьуда айи.

¹⁴ Дурар вари сатӀиди ккарагурайи. Дурарихъди Исайин дада Марʼям, Дугъан чвйир ва гьацира сакьюр дишагьлйир хъайи.

Вакил ктагъуб

¹⁵ Сакьюд йигълан Исайихъ хъугънайидар сабишвʼина уч шулу (душваъ вари варжна къар касдихьнакьан айи). Петри, ученикарин арайиъ дийигъну, кӀуру:

^16-17 – Эй йиз гъардшар! Гирами китабариъ Гирами Рюгьну Давудрин мелзналан дупнайиб улубкьну ккунду: ухьухъди зегьмет дизигнайи, ухькан сар вуйи Ягьудайи, Иса дисуз ккеънайидар хъади гъиди, дибикӀна. (

¹⁸ Ягьудайи Иса масу тувну гъибису пулихъ хутӀил гъадабгъну. Думу душвʼин кӀулихъди алдакну гъакӀну ва дугъан айитӀишвар чӀатна адахьну.

¹⁹ Му ляхин Ерусалимдиъ яшамиш шулайидариз варидариз аьгъю шулу ва му хутӀлиз жугьуд чӀалниинди Акелдама кӀуру, яна «Ифдин хутӀил»).

²⁰ Мяълийирин китабдиъ мидин гьякьнаан гьамци дибикӀна: «Дугъан жил ичӀи ибшри, душвʼин фужкӀа яшамиш даришри». Ва хъанара: «Дугъан йишв жара касди бисри».

^21-22 Гьаддиз ухьу Иса чӀиви хьувалин шагьид гъаши сар жара кас кадагъну ккунду. Думура, Ягьʼяйи адмийир штуан апӀуз хъюгъю вахтналан ккебгъну, Иса, ухьухъди хъади гъаши вахтра кади, тап аьршариз удучӀвайизкьан, гьарган ухьухъди гъашир духьну ккунду.

²³ Хъа дурари кьюр кас улупуру: Варсава вая Юст кӀури шлу Юсуф ва Матта.

²⁴ Хъасин вакилари ккарагури гъапнийи: – Я Агъа, Увуз гьар касдин кӀваъ айиб аьгъявуз. Гьаму кьюрикан Уву фуж ктагъуруш,

²⁵ яна учв гъягъюз лайикь гъахьи йишваз гъушу Ягьуда гьадахъу вакилвал шли гъабхуруш, учуз улуп.

²⁶ Хъа дурари тупут ипу, ва Аллагьдин амриинди думу Маттайиз удубчӀву. Гьамци Маттайикан, миди вуйи йицӀисариканси, Исайин вакил шулу.