Лука 7 - Гирами Китаб

Юзбашийин гъуллугъчи сагъ апӀуб

¹ Чахъ хъебехънайидариз пуз ккайи гафар ккудукӀиган, Иса Кафернагьумдиъ учӀвру.

² Римдин юзбашийин чаз ккуни сар гъуллугъчи кетӀерццну йикӀру гьялнаъ ади шулу.

³ Исайикан хабар дубхьну, юзбашийи, чан гъуллугъчи сагъ апӀбан бадали, Думу хъади гъюз жугьдарин агъсакълар гьаъру.

⁴ Дурари, Исайихьна дуфну, Дугъкан ижмиди миннат апӀуру: – Му юзбаши Уву кюмек апӀбаз лайикьлу кас ву,

⁵ фицики думу кас ич халкь гизаф ккунир ву ва дугъу учуз ккарагру хал тикмиш гъапӀну.

⁶ Иса дурарихъди гъягъюру. Думу юзбашийин хуларихьна хъуркьради, юзбашийи Исайихьна гьамци пуз чан дустар гьаъру: – Инжиг махьан, Агъа, гьаз гъапиш Уву йиз хулаъ учӀвбаз узу лайикь дарза.

⁷ Гьаддиз узу Увухьна гъюзкьан жвув лайикьлур вуди гьисаб гъапӀундарза. Анжагъ Уву саб гаф йип, ва йиз гъуллугъчи сагъ хьиди.

⁸ Фицики узура жарарин хликк ккайир вуза, ва узуз мютӀюгъ вуйи эскрарра азуз. Дурарикан сариз узу «гъарах» кӀурза – думу гъягъюру, тмунуриз «гъач» кӀурза – гъюру, йиз гъуллугъчийиз «гьамци апӀин» кӀурза, дугъу тамам апӀуру.

⁹ Му гафар гъеерхьиган, Иса дугъʼин мюгьтал шулу ва, илдицну, Чан кьяляхъ хъайи халкьдиз кӀуру: – КӀуразачвузки, Израилиъра Аллагьдихъ гьамкьан хъугърайи кас гъяркъюндарзуз.

¹⁰ Юзбашийи гьаъдариз, чпи дугъан хулаз хъадакну гъафиган, кетӀерццнайи гъуллугъчи сагъ духьнади рякъюру.

ДукӀнайириин жан алапӀуб

¹¹ Дидхъантина Иса Наин кӀуру шагьриз гъушу. Дугъахъди Чан ученикар ва аьхючӀвеъ халкьра гъягъюри гъахьну.

¹² Хъа Иса шагьрин урнарихьна багахь гъашиган, сар ачӀни хпирин айина-адру бай дукӀну, дугъан майит накьваригъна гъабхуз адабгъури шулу, ва майтихъ хайлин халкьра хъайи.

¹³ Агъайиз, балин дада гъяркъиган, язухъ шулу ва дугъаз, мишан, кӀуру.

¹⁴ Хъа багахьна дуфну, Исайи мягьражарик хил катру, майит гъабхурайидар дийигъуру ва Дугъу кӀуру: «Живан! Увуз кӀураза, гъудужв!»

¹⁵ ДукӀнайир за духьну деъру ва улхуз хъюгъру, хъа Исайи думу дадайихьна тувру.

¹⁶ Мушвʼин вардарик пис гучӀ кабхъну, Аллагьдин адар апӀури, гьамци кӀури гъахьну: – Ихь арайиз зурба пайгъамбар адахъна, ва Аллагь Чан халкьдин гъайгъушнаъ а.

¹⁷ Исайикан гьамциб фикир вари Ягьудия вилаятдиъ ва аьтрафарихъ хъайи миди вуйи юрдариъ рабгъуру.

Ягьʼяйихьан вуйи илчйир

¹⁸ Хъа Ягьʼяйиз чан ученикари гьамрар варидарикан ктитуру.

¹⁹ Ягьʼяйи, чан ученикарикан кьюриз дих дапӀну, дурар Агъа Исайихьна гьамци гьерхуз гьаъру: «Гъюз ккайи Месигь Уву вуна, даршиш жарариз ккилигуча?»

²⁰ Дурари, Исайихьна дуфну, кӀуру: – Штуан апӀру Ягьʼяйи учу Увухьна гьерхуз гьаъна: «Гъюз ккайи Месигь Уву вуна, даршиш жарариз ккилигуча?»

²¹ Му вахтназ Исайи аьзарарикканна иццрушнариккан гизафдар ккадаъну, жинар кадаъну, аьхючӀвеъ кур вуйидариз акв улупну айи.

²² Гьаддиз Исайи дурариз жаваб вуди кӀуру: – Душну Ягьʼяйиз, учвуз гъяркъдар ва гъеерхьдар кидитай: кур вуйидариз рябкъюра, ликудар лицура, хамран уьзур кайидарин хам марцц шула, кар вуйидариз ебхьура, гъачӀидар чӀиви шула ва касибариз Ужувлан хабар рабгъура.

²³ Шли Узʼина вуйи хъугъвал дубградарш, думу бахтавар ву.

Штуан апӀру Ягьʼяйикан Исайин гаф

²⁴ Ягьʼяйи гьаъдар гъушхъан, Исайи Ягьʼяйикан халкьдиз гьамци кӀуру: – ИчӀи чюлиз фтиз лигуз гъушнийчва? МикӀлу тӀубччвурайи чӀеъдиз лигуз гъушнийчвахъа?

²⁵ Шлиз лигуз гъушунчва дина? Багьа палтар али касдиз? Хъа дамагънан палтар алахьрудар ва чпиз ккуниси яшамиш шлудар паччгьарин дараматариъ а.

²⁶ Шлиз лигуз гъушунчва учву? Пайгъамбриз лигуз? Ав, кӀуразачвуз, пайгъамбартӀан аьхюриз лигуз гъушунчва.

²⁷ Гьадму Ягьʼяйикан ву гьамци дибикӀнайиб: «Магьа, Яв улихьди Узу Йиз кас гьаъраза: дугъу Яв улихь Яв рякъ ккабалгиди».

²⁸ КӀуразачвуз: дишагьлийири бабкан гъахидаригъ ЯгьʼятӀан зурба кас гъядар; хъа Аллагьдин Паччагьлугъдиъ айидарикан варитӀан бицӀир думутӀан зурба ву.

²⁹ Дугъахъ хъпехъурайи вари халкьди ва налук гъюдюбхрударра кмиди, Ягьʼяйин штуан апӀувалиинди цӀийи духьну, Аллагь гьякь вуйиб гардандиъ гъибису.

³⁰ Хъа фарисйирна къанунчйир, Аллагьдихьан чпиз вуйи ният гьясбикк дарапӀри, Ягьʼяйихь штуан гъахьундар.

³¹ – Гьаму наслин адмийир шлихь тевза ва дурар шлиз ухшар ву? – пну, гьерху Исайи. –

³² Дурар, чиб-чпиз чӀигъар апӀури, раццариъ гьамци кӀури деънайи бицӀидариз ухшар ву: «Учу учвуз швутӀрамар йивури гъахьунча, хъа учву ялхъвнаркьан гъапӀундарчва; учу учвуз ишлар апӀури гъахьунча, хъа учву ишузкьан гъишундарчва».

³³ Штуан апӀру Ягьʼя гъафну ва дугъу я уьл ипӀури, ясана чяхир убхъури гъахьундар. Хъа учву: «Дугъаъ жин а», кӀурачва.

³⁴ Инсаниятдин Бай гъафну, Дугъу ипӀуру ва убхъуру, ва дурари Дугъаз: «Лигай, магьа уьж ва пияниска, налукар гъюдюхрударинна гунагькрарин дуст», кӀурачва.

³⁵ Аькьюллувал вари аькьюллудари улупну ккун.

Дишагьлийин аьхючӀвеъ гунгьарилан хил алдабгъну

³⁶ Фарисйирикан сари Исайикан чан хулаз уьл ипӀуз гъюб теклиф апӀуру. Фарисейин хулаз гъушу Иса гъюн йивну дахъру.

³⁷ Хъа магьа, гьаму шагьриан вуйи сар гунагькар дишагьлийи, Думу фарисейин хулаъ гъюн йивну дахънайиб аьгъю дубхьну, лизи ругдин гажниъди аьтрин ниъ хъайи ягъсиб хуру ва,

³⁸ Исайин ликарихъ дийигъну ишури, Дугъан ликар нивгъарихъди кьяши апӀури ва чан кушарихъди марцц апӀури, Дугъан ликариз макар апӀури, гьадму ягъ ктатури шулу.

³⁹ Му ляхин гъябкъиган, теклиф дапӀну, Иса хулаз хъади гъафи фарисейи чав-чакди фикир апӀуру: – Эгер Думу дугъриданра пайгъамбар вуйиш, Чак хилар катрайи дишагьли фуж вуш, Дугъаз аьгъю шлийи. Думу гунагькар даринхъа!

⁴⁰ Фарисейихьинди илдицну, Исайи дугъаз гъапи: – Я Симон! Увуз кӀуру саб гаф айиз. Дугъу: «Йип, Мялим!» – гъапи.

⁴¹ Исайи кӀуру: – Сар пул буржназ туврурихъ кьюр буржлу кас шулу. Дурарикан сар хьудварж динар-пул буржлу вуйи, тмунур – хьцӀур.

⁴² Хъа дурарихъ кьяляхъ тувуз пул хътарди хьпаз лигну, дугъу кьюриддизра буржар гьялал апӀуру. Йип ари, гьадму жви гьадрарикан фунуриз артухъди ккун шул?

⁴³ Симонди жаваб тувру: – Аьхю бурж кайириз вушул, пну, фикир апӀураза. Исайи дугъаз: «Ари дюзди фагьум гъапӀунва» кӀуру.

⁴⁴ Хъа дишагьлийихьинди илдицну, Симондиз гъапи: – Гьаму дишагьли рякъюрануз? Узу яв хулаз гъафунза, уву Узуз ликар жикӀуз шид тувундарва; хъа дугъу Йиз ликар чан нивгъариинди гъижикӀнийиз, чан кушарихьди марцц гъапӀнийиз.

⁴⁵ Уву Узуз мак гъапӀундарва, хъа дугъу, Узу гъафихъантина Йиз ликариз сикин дарди макар апӀура.

⁴⁶ Уву Йиз кӀулкан ягъ ктатундарва, хъа дугъу Йиз ликарикан ягъ ктатну.

⁴⁷ Магьа гьаддиз кӀуразавуз: чан гизаф ккун хьували дугъан аьхючӀвеъ гунгьарилан хил алдабгъурайиб улупура. Хъа шлиз цӀибди багъишламишʼвал тувруш, дугъан ккунивалра цӀибтӀан дар.

⁴⁸ Дишагьлийиз Исайи кӀуру: – Яв гунгьарилан хил алдабгъна.

⁴⁹ Хъа дугъан багахь гъюн йивну дахънайидари чиб-чпикди пуз хъюгъю: – Му фуж ву гунгьариланра хил алдабгъуз?

⁵⁰ Исайи, кӀуруш, дишагьлийиз гъапи: – Яв хъугъували уву гъюрхну, архаин духьну гъарах.