Лука 6 - Гирами Китаб

«Инсаниятдин Бай султ йигъʼинра Агъа ву»

¹ Султ йигъан Иса дяхин дубзнайи хутӀлариан гъягъбакк ккуркьну, ва Дугъахъ хъайи ученикари, дяхнин кӀулар ктутӀури, хиларигъ ктӀиршури, итӀури шулу.

² Фарисйирикан бязидари дурариз кӀуру: – Учву султ йигъан Къанунди гъадагъа дапӀнайи ляхин апӀуранчва?

^3-4 Исайи дурариз жаваб туву: – Мегер учвуз Давудри, чаз ва чахъ хъайидариз гаш гъабшиган, гьапӀнуш, фици дугъу, Аллагьдин хулаъ учӀвиган, маллйирилан гъайри шликӀан итӀуз ихтияр адру Аллагьдиз бахш дапӀнайи уьлер гъадагъну гъитӀнуш ва чахъди хъайидаризра тувнуш, Гирами китабариъ гъурхунданчва?

⁵ Хъасин гъапи: – Инсаниятдин Бай султ йигъʼинра Агъа ву.

Гъеебццу хил хъайи кас

⁶ Жара саб султ йигъан Иса мистаз гъягъбакк ва душваъ аьгъювалар тувбакк ккуркьру. Душваъ арччул хил деебццнайи сар кас ади шулу.

⁷ Къанунчйирна фарисйир, Исайик тахсир кипбан бадали, Дугъу султ йигъан думу сагъ апӀидайкӀан кӀури, ул хъипнайи.

⁸ Амма Исайи, дурарин ниятар аьгъяди, хил дебццнайи касдиз кӀуру: – Гъудужвну гъач, варидарин улихь дийигъ. Думу гъудужвну, улихьна гъюру.

⁹ Гьадмуган Исайи дурариз гъапи: – Узу учвхьан гьерхраза: султ йигъан фу апӀуз ихтияр а? Ужʼвал, даршиш писвал? Уьмур уьбхюз, дарш пуч апӀуз? Дурар чӀалкьан даркӀури гъузру.

¹⁰ Вардарилан ул илбицну, Исайи гьадму касдиз кӀуру: – Яв хил гьачӀабкк. Дугъу гьаци гъапӀумитӀла, дугъан хил сагъ шулу.

¹¹ Фарисйирна аьлимар хъюлʼан деллу шулу ва, чпин арайиъ улхури, Исайикан гьапӀруш, аьжуз духьну гъузру.

Исайин вакилар

¹² Гьадму йигъари Иса, ккарагбан бадали, дагъдиз удучӀвуру ва ярхи йишвди Аллагьдиз ккарагури шулу.

¹³ Йигъ улубкьиган, Чан ученикариз дих дапӀну, дурарикан йицӀикьюр кас ктагъуру ва дурариз Чан вакилар кӀуру ччвур тувуру.

¹⁴ Дурар: Петр кӀуру лакӀам хъайи Симонна дугъан чве Андрей, Якьубна Югьанна, Филипна Варфоломей,

¹⁵ Маттана Фома, Алфейин Якьубна Зилот кӀуру лакӀам хъайи Шимон,

¹⁶ Якьубдин Ягьуда ва хъасин душман гъаши Искариот Ягьуда – гьамрар вуйи.

Рази хьубан гафар ва агьрар

¹⁷ Иса, дурарихъди дагъдилан гъафир, дюз майдандиина гъюру. Дугъахъди аьхючӀвеъ Чан ученикарра, вари Ягьудияйианна Ерусалимдиан, хъа гьацира гьюлин гъирагъдихъ хъайи Тир ва Сидон шагьрариан дуфну,

¹⁸ Исайихъ хъпехъуз ва чпи аьзарарихьан сагъ апӀуз гъафидарра, гьацира жинари гъаркӀ апӀурайидарра хъади гъахьну. Хъа, дурар вари сагъ шулира гъахьну.

¹⁹ Вари халкьдиз Исайик кучуз ккунди гъабхьну, фицики Дугъхьан кьувват рабгъури ва диди вари сагъ апӀури гъахьну.

²⁰ Хъа Дугъу, Чан ученикарилан ул илбицури, гъапи: – Бахтаврар вучва, касиб вуйидар, фицики Аллагьдин Паччагьлугъ учвусдаринуб ву.

²¹ Бахтаврар вучва, му вахтари гашлудар, фицики тухъ хьидичва. Бахтаврар вучва, му вахтари ишурайидар, фицики аьлхъидичва.

²² Учву инсанариз даккун гъахьиган, учву дурари утӀурккган ва беябур апӀруган, ичв ччвур нянайикк ккипруган Инсаниятдин Бай бадали, бахтаврар вучва.

²³ Гьадму йигъан рази йихьай ва шадвал ачмиш апӀинай, фицики аьршариъ учвуз айи пешкеш зурба ву. Учву даккнидарин абйирира пайгъамбрарихъди гьаци апӀури гъахьну.

²⁴ Мураризси дарди, пис гьял хьибди ичв, девлетлуйир, фицики учвуз сарун ужувлар дяркъначвуз.

²⁵ Пис гьял хьибди ичв, му вахтари уьлдюгъну гъярайидар, гьаз гъапиш гаш хьибдичвуз. Пис гьял хьибди ичв, му вахтари аьлхъюрайидар, фицики, гьяйиф дизигну, ишидичва.

²⁶ Учвкан жарадар ужуди улхруганра, пис гьял хьибди ичв, фицики дурарин абйири кучӀлин пайгъамбрариканра гьаци апӀури гъахьну.

Душмнарра ккун апӀинай

²⁷ Хъа вари Узухъ хъебехънайидариз кӀураза: ичв душмнар ккун апӀинай, учву даккнидариз ужʼвал апӀинай.

²⁸ Учву нянатлу апӀурайидариз гьюрматлу гафар апӀинай ва учвуз гиран ктапӀрударихъанди ккарагай.

²⁹ Яв саб гарцӀликкан бачӀ ккадатуриз тмунубра ккив ва яв зиълан палат илдибтруриз кӀанакк ккайи ккурттра чаз гъадабгъуз манигъʼвал мапӀан.

³⁰ Увкан тӀалаб апӀурайириз тув ва явуб гъадабгъуриз «кьяляхъ ча» макӀан.

³¹ Учвуз учвухъди адмийир фици духьну ккундуш, гьадрарихъди учвура гьаци йихьай.

³² Хъа эгер учву ккунидартӀан учвуз ккундарш, мидкан фу чухсагъул ачвуз? Фицики гунагькраризра чиб ккунидар ккунди шулу.

³³ Учвуз ужʼвал апӀрудариз учвура ужʼвал апӀураш, мидкан фу чухсагъул ачвуз? Фицики гунагькрарира гьаци апӀуру.

³⁴ Хъа эгер учву бурж кьяляхъ апӀуз удукьрурихьна миж кади тувраш, мидкан фу чухсагъул ачвуз? Фицики гунагькрарира чпи буржназ тувкьануб кьяляхъ гъадабгъуз ният ади туври шулу.

³⁵ Хъа учву ичв душмнар ккун апӀинай, ужувлар апӀинай, кьяляхъ бисуб миж ктарди, буржназра тувай, ва учвуз зурба пешкеш хьибди, ва учву ВаритӀанзаанурин баяр хьидичва. Фицики чпиз гъапӀу ужʼвал аьгъю даршлударизра, пис касаризра Аллагь гъянир ву.

³⁶ Гьаци учвура, ичв Адашси, мани юкӀвар ади йихьай.

Жарарин диван мапӀанай, Аллагьди ичвра апӀидар

³⁷ Жарарин диван мапӀанай, Аллагьди ичвра апӀидар; жарар тахсир мапӀанай, учвура тахсир апӀидар. Хил алдабгъай, учвланра алдабгъиди.

³⁸ Хил ачухъ апӀинай, учвузра тувди: убжнайи ва кӀакӀ алди абцӀнайи уьлчмейиинди ичв танхлиъ абхьди, фицики учву фициб уьлчмейиинди ебцураш, учвузра гьацибдиинди ебциди.

³⁹ Дурариз Исайи тахалусарра ктитуру: – Курихьан кур хъади гъягъюз шулинхъа? Дурар кьюридра ичӀаъ ахьидаринхъа?

⁴⁰ Ученик чан мялимтӀан заан дар, амма зегьмет зигури, дубгъури гъабхьиш, гьарсар чан мялимдихъ хъуркьди.

⁴¹ Увуз яв чвуччвун улиъ айи чӀюрх гьаз рябкъюрвуз, яв улиъ айи хамхар дярябкърайи вахтна?

⁴² Ваяки яв гъардшиз: «Яв улиъ айи чӀюрх адабгъуза», – фици пидива, увуз яв улиъ айи хамхар дярябкърайиган? Эй, кьюб маш гъяйир! Сифте яв улиъ айи хамхар адабгъ, хъа гьадмуган увуз, яв гъардшин улʼан чӀюрх фици адабгъуруш, рябкъидивуз.

Гьар йимишдиз лигну аьгъю шулу

⁴³ Гъяни гьари чӀуру бегьер, чӀуру гьари гъяни бегьер хурдар,

⁴⁴ фицики гьарсаб гьар чан йимишдиз лигну аьгъю шулу. Гьаддиз зазарилан инжир, чӀуру хутарилан тӀумутӀ уч апӀури шулдар.

⁴⁵ Ужур касди чан кӀван хазнайиан ужуб, хъа чӀурури чан кӀван хазнайиан чӀуруб адабгъуру, фицики инсандин мелз, дугъан юкӀв фти абцӀнаш, гьаддикан улхури шулу.

Кьюб шибритӀ

⁴⁶ Учву Узуз: «Я Агъа, я Агъа!» гьаз кӀуручва, Узу учвуз гъапиб дарапӀрайиган?

⁴⁷ Узухьна дуфну, Узухъ хъебехъну, Йиз гафар тамам апӀру гьарсар кас шлиз ухшар вуш, кӀарзачвуз:

⁴⁸ Думу, хулар дивруган, жил дериндиз дирибккну, шибритӀар гъвандиин диву касдиз ухшар ву, фицики, селлер дуфну, шид улубчӀвиган, думу хулар ришвуз гъахьундар, гьаз гъапиш дурар гъвандиин дивнайидар вуди гъахьну.

⁴⁹ Хъа Йиз гафар ерхьури, дурар тамам дарапӀрайи кас шибритӀар ккадру хулар диву касдиз ухшар ву, фицики шид улубчӀвиган, дурар дишлади ахьну, дармадагъин хьиди.