Лука 3 - Гирами Китаб

Ягьʼяйи инсанар штуан апӀуб

¹ Тиберий кӀуру Римдин паччагьди паччагьвал апӀури йицӀихьудпи йис вуйиган, Ягьудия уьлкейиъ Понтий Пилатди аьхювал апӀурайи девриъ, Гьирод – Галилей уьлкейин, дугъан чве Филип – Итурей уьлкейинна Трагьонит юрднан, хъа Лисаний – Абилей уьлкейин гьюкумдрар вуйиган,

² Гьаннай ва Каяфа аьхюну маллйир вуди гъахьну. Гьадму йисан ичӀи чюлиъ айи Закарʼяйин бай Ягьʼяйиз завариан Аллагьдин дих гъабхьнийи.

³ Гьаму дихнахъди Ягьʼяйи, вари Ярдан нирин гъирагъар вуйиси лицури, гьар касди чан тахсрар гардандиъ дисбан, инсанар штуан апӀбан ва гьамци чпин гунгьарилан хил алдабгъбан бадали, аьгъювалар рагъури гъахьну.

⁴ Му Ишая пайгъамбрин китабдиъ дибикӀну айиси гъабхьну: – ИчӀи чюлиъ дих атӀабгура: «Агъайин рякъ ккабалгай, Дугъаз рякъяр-жилгъйир диш апӀинай.

⁵ Гьарсаб гъяр ругди гъябцӀиди, гьарсаб дагъна тепе – ис, кьяни йишвар – дюз, дюз дару рякъяр цӀалцӀам хьиди.

⁶ Гьарсар жан алириз Аллагьди Чав гунгьариккан азад апӀувал рябкъиди».

⁷ Чахьна штуан апӀуз гъафи халкьдиз Ягьʼяйи кӀуйи: – БитӀракан гъахьидар! Гъюз ккайи Аллагьдин хъюлхьан гьергуз шли улупунчвуз?

⁸ Учву, ичв гунгьар гардандиъ дидисну, уьмур дигиш апӀуз шлуси, ичв ляхнариинди улупай ва, «Ич аба Ибрагьим ву» кӀури, фикиркьана мапӀанай, гьаз гъапиш учвуз кӀуразаки, Аллагьдихьан гьаму гъванариканра Ибрагьимдиз веледар ктауз шулу.

⁹ Гьарин кьаблихъ магьа екӀв гьязурди хъа: гъяни йимиш туври адру гьарсаб гьар алдабтӀиди ва цӀигъна гатӀабхьиди.

¹⁰ Хъа халкьди дугъхьан гьерхру: – Хъа учу гьапӀну ккунду?

¹¹ Ягьʼяйи кӀуру: – Кьюб гъат палат айири, сабнуб адруриз туври; шлиз ипӀруб-убхъруб аш, гьадгъура гьаци пай апӀри.

¹² Налук уч апӀрударира, чпи штуан апӀбан бадали дуфну, дугъаз: «Я мялим! Учу гьапӀча?» – кӀури, гьерхру.

¹³ Ягьʼяйи дураризра жаваб туву: – Учвуз улупнайибтӀан артухъ налук мибисанай.

¹⁴ Эскрарира дугъхьан гьерхру: – Учу гьапӀну ккунду? Хъа дугъу дураризра кӀуру: – Сар касдизкьан гиран макадапӀанай, футна мапӀанай ва ичв дуллугъниин рази йихьай.

¹⁵ Халкь Месигьдиз ккилигуради, вардари: «Гьаяман, му Ягьʼя Месигь даришри гьа?» – кӀури, фикир апӀурайиган,

¹⁶ Ягьʼяйи дурариз вардариз жаваб туври гъахьну: – Узу учву штуан апӀуразачву, амма йиз кьяляхъди узутӀан Кьудратлур гъюра, узу Дугъан шаламарин гъахмйир гъядарчузкьан лайикь дарза. Дугъу Гирами Рюгьнахьдина цӀихьди цӀийи алаидичву.

¹⁷ Дугъан хилиъ йирф хьибди, Дугъу дяхинна нахъв жара апӀиди: дяхин Чан танхариъ абхьди, хъа нахъвар хътрубгру цӀигъ гъяхьну ургиди.

¹⁸ Ягьʼяйи гьамци ва хъанара жара гафариинди халкьдиз ужуб хабар дебккри гъахьну.

¹⁹ Хъа Ягьʼяйи гьякимдар Гьироддик, чан чвуччвун хпир Иродиада чаз дитбаз ва жара пис ляхнар апӀбаз лигну, тахсир кипган,

²⁰ Гьиродди чан чӀуру ляхнар, думу дустагъдиъ итбиинди, гужал гъапӀну.

²¹ Вари халкь штуан шулайиган, Исара Ягьʼяйихьна гъафну. Штуан гъахьи Иса ккарагурайиган, зав атӀабццуру,

²² ва Аллагьдин Рюгь луф жюрейиинди Исайиина ис шулу, хъа завʼан дих шулу: – Уву Йиз масан Бай вува! Узу Увʼин гизаф рази вуза!

Исайин ата-бабйир

²³ Исайин, Аллагьдиз гъуллугъ апӀуз хъюгъруган, сумчӀур йис дубхьнайи. Халкьди фикир апӀурайиганси, Думу Юсуфдин бай ву кӀура. Юсуф Гьелийин бай,

²⁴ Гьели Маттатдин бай, Маттат Левийин бай, Левий Мелкийин бай, Мелки Яннайин бай, Янна Юсуфдин бай,

²⁵ Юсуф Маттайин бай, Матта Амосдин бай, Амос Нагьумдин бай, Нагьум Эслимдин бай, Эслим Наггайин бай,

²⁶ Наггай Маатдин бай, Маат Маттайин бай, Матта Симеиндин бай, Симеин Ясегьдин бай, Ясегь Ядайин бай,

²⁷ Яда Яанандин бай, Яанан Рисайин бай, Риса Зеруббабелин бай, Зеруббабел Шеалтиэлин бай, Шеалтиэл Нерийин бай,

²⁸ Нери Мелкийин бай, Мелки Аддийин бай, Адди Косамдин бай, Косам Элмадамдин бай, Элмадам Эрин бай,

²⁹ Эр Ешийин бай, Еши Элизарин бай, Элизар Яфимдин бай, Яфим Маттатдин бай, Маттат Левийин бай,

³⁰ Левий Симеондин бай, Симеон Ягьудайин бай, Ягьуда Юсуфдин бай, Юсуф Янамдин бай, Янам Элиякимдин бай,

³¹ Элияким Мемайин бай, Мема Меннандин бай, Меннан Маттатдин бай, Маттат Натандин бай, Натан Давудрин бай,

³² Давуд Ессейин бай, Ессе Обеддин бай, Обед Воаздин бай, Воаз Салмандин бай, Салман Нецрондин бай,

³³ Нецрон Амминадабдин бай, Амминадаб Арамдин бай, Арам Гьецрондин бай, Гьецрон Перецдин бай, Перец Ягьудайин бай,

³⁴ Ягьуда Якьубдин бай, Якьуб Исакьдин бай, Исакь Ибрагьимдин бай, Ибрагьим Терагьдин бай, Терагь Нагьорин бай,

³⁵ Нагьор Серукдин бай, Серук Реуйин бай, Реу Пелегдин бай, Пелег Эберин бай, Эбер Шелайин бай,

³⁶ Шела Каинандин бай, Каинан Арфакшаддин бай, Арфакшад Симдин бай, Сим Нюгьдин бай, Нюгь Лемекдин бай,

³⁷ Лемек Метушелагьдин бай, Метушелагь Янокдин бай, Янок Яреддин бай, Яред Магьалеелин бай, Магьалеел Кайнандин бай,

³⁸ Кайнан Еношдин бай, Енош Шитдин бай, Шит Адамдин бай, Адам Аллагьдин бай вуди гъахьну.