Лука 24 - Гирами Китаб

¹ Чпи гьязур дапӀнайи аьтрин ниъ хъайи ягъарра хьади, элгьет йигъан, ахсрарихъди, гьадму дишагьлийир хъана накьвдихьна гъягъюру.

² Хъа дурариз майит айи хьарахь гьипнайи гъван гьидипнади рябкъюру,

³ накьвдизди учӀвиган, дурариз Агъа Исайин беден гъибихъундар.

⁴ Дурари, мидʼин мюгьтал духьну, фикрар апӀури имиди, сабпну дурарин улихьна вацӀрацӀар апӀру палтар али кьюр жви ачмиш шулу.

⁵ Дурари гучӀбаан ис алахъдариз кӀуру: – Учву чӀивир гъачӀидарин арайиъ гьаз агурачва?

⁶ Думу мушваъ адар. Думу чӀиви гъахьну. Дугъу, гьеле Галилей уьлкейиъ имиди фици гъапнийиш, кӀваин апӀинай:

⁷ «Инсаниятдин Бай гунагькрарин хилиз тувди, дариз зигиди, хъа шубудпи йигъан чӀиви хьиди».

⁸ Гьадмуган Исайин му гафар дурарин кӀваина гъафи.

^9-10 Кьяляхъ хътаку дишагьлийири (мурарин арайиъ Магдалайиан вуйи Марʼям, Югьанна, Якьубдин дада Марʼям ва дурарихъди хъади гъаши жарадарра айи) мидкан йицӀисар ученикдиз ва миди вуйидариз хабар дебккру.

¹¹ Ученикари, му гафар ичӀидарси гьисаб дапӀну, дурарихъ хъугъундайи.

¹² Хъа Петр гъудужвну, жаргъну накьвдихьна гъушу ва душваъ ис алахъну гъилигуриз кафнартӀан гъяркъюндар ва, мидʼин мюгьтал духьну, кьяляхъ хътаку.

¹³ Гьадму йигъан ученикарикан кьюр Ерусалимдихьан кьюб сяаьтнан рякъюн манзилнаъ айи Эммаус кӀуру гъулаз гъягъюрайи.

¹⁴ Дурарра Исайиин улукьу гьядисйирикан улхурайи.

¹⁵ Чиб-чпихъди улхури фикрар апӀурайи вахтна, багахь духьну, Исара дурарихъди гъягъюз хъюгъю.

¹⁶ Чпин улар йитӀнайиси, дурариз Иса аьгъю гъахьундар.

¹⁷ Дугъу дурарихьан гьерху: – Учву, рякъди фтикан улхурачва? Дурар пашманди дийигъу.

¹⁸ Дурарикан Клеоп кӀуру сари Дугъаз жаваб туву: – Му йигъари Ерусалимдиъ гъабшиб душваз гъафидарикан сар Уву вува аьгъдрур, дарин!

¹⁹ Исайи дурариз гъапи: – Фтикан? Дурари Исайиз кӀуру: – Аллагьдин ва вари халкьдин улихь, ляхнариъ ва гафнаъ кьувватлу пайгъамбар вуйи Назаретдин Исайикан.

²⁰ Думу жугьдарин маллйирина гьюкумдрари тахсиркар дапӀну, хачрак карсну дариз зигуз гъитну.

²¹ Хъа учу, Думу Израилин халкь азад АпӀрур ву кӀури, умуд апӀурайча, хъа гьамус, магьа шубуд йигъ ву гьамциб гьядиса дубхьну.

²² Хъа гъи ич дишагьлийирикан сакьюдари учу мюгьтал гъапӀну: дурар гвачӀнин ухди Исайин накьвдихьна гъушиган,

²³ дурариз Дугъан беден гъибихъундар ва хъадакну гъафидари, Думу чӀиви гъахьну кӀури, хабар дебккрайи, гьадина гъафи малайикарра гъяркъюнчуз кӀури, ктибтура.

²⁴ Ичдарикан сакьюдар накьвдихьна гъушиган, дураризра гьадму дишагьлийириз гъяркъдар гъяркъну, амма Дугъан беден гъябкъюндар.

²⁵ Гьадмуган Исайи дурариз гъапи: – Агь, пайгъамбрари гъапидарихъ хътругъру ахмакьар ва кӀван кагьалсузар!

²⁶ Месигьди гьацдар аьзабар гъизигхъантӀан, Думу Чан гьяйбатнаъ учӀвидар, дупнадаринхъа?

²⁷ Хъасин Исайи, Мусайилан ккебгъну, вари пайгъамбрари Чакан Гирами китабариъ дидикӀнайидарин гьякьнаан дурар гъаври тӀаъру.

²⁸ Дурар чпи гъягъюрайи гъулаз багахь гъашиган, Исайи Чаз дилинтина гъягъюз ккунди айиганси улупури гъахьну.

²⁹ Хъа дурари Дугъаз гъапи: – Учухъди дерг, йигъ хябяхъ шула. Исара гьадму гъулаъ дурарихъди гъузру.

³⁰ Дурарихъди суфрайихъ гъюн йивну деънайиган, Исайи, уьл гъадабгъну, Аллагьдиз баркаллагь дупну, гьудубтӀуру ва дурариз пай апӀуру.

³¹ Гьадмуган дурарин улар ачмиш шулу ва дурариз Думу Иса вуйиб аьгъю шулу, хъа Думу дурарин улариккан дургру.

³² Хъа дурари чпи-чпиз кӀуру: – Дугъу рякъюъди ухьухъди улхруган ва Гирами китабариъ дибикӀнайибдин гъаврикк ккаъруган, ихь юкӀвар ургури гъахьундайинхъа?

³³ Гьадму сяаьт гъудужвну, дурар Ерусалимдиз хътакуру ва йицӀисар вакиларна имбудар сатӀиди ади дихъуру.

³⁴ Дурари: «Агъа дугъриданра чӀиви гъахьну ва Симондиз ачмиш гъахьну», кӀурайи.

³⁵ Хъа мурарира, рякъюъ чпиин улуркьдар ва, уьл гьудубтӀруган, чпиз Думу фици аьгъю гъахьнуш, ктитуру.

³⁶ Мурар мидкан улхури имиди, Иса Учв дурарин арайиъ ачмиш шулу ва Дугъу: «Учвуз мясляаьт ибшри!» кӀуру.

³⁷ Дурари, аьжайиб духьну ва гучӀ кабхъну, чпиз рюгь рябкъюра пну, хиял гъапӀу.

³⁸ Хъа Исайи дурариз гъапи: – Гьаз аьжайиб духьначва ва дицдар хиялар ичв юкӀвариъ гьаз учӀвра?

³⁹ Йиз хиларизна ликариз лигай: Му Узу вуза, хил кучри ва лигури Узу ахтармиш апӀинай, рюгь жан хъайиб ва кӀурбар айиб шулдар.

⁴⁰ Гьамци дупну, Исайи дурариз чан хилар ва ликар улупуру.

⁴¹ Хъа дурар шадвалиан мегьел хътругъри ва мюгьтал шули айиган, Дугъу дурариз гъапи: – Мушваъ фициб-вушра ипӀруб аничв?

⁴² Дурари Исайихьна гъубжу балугъин пай гьачӀабккуру.

⁴³ Исайи, дурариз рябкъюри, ипӀуру

⁴⁴ ва кӀуру: – Узу учвухъди хъимиди, учвуз гъаписи, Узкан Мусайин къанундиъ, Пайгъамбрарин китабдиъ ва гьацира Мяълийирин китабдиъ дибикӀнайиси, Йиз кӀулʼина гъюз ккайидар вари тамам духьну ккундийи.

⁴⁵ Гьадмуган Дугъу Гирами китабариъ дибикӀнайибдин гъаври ахъбан бадали, дурарин фагьум ачмиш апӀуру.

⁴⁶ Хъасин дурариз гъапи: – Гирами китабариъ дибикӀнаки, Месигь аьзабарикк ккуркьди ва, дукӀну, шубудпи йигъан чӀиви хьиди

⁴⁷ ва, вардари чпин гунгьар гардандиъ дисруси, Аллагьди чпилан хил алдабгъруси, Ерусалимдилан ккебгъну варишвариъ Йиз ччвурнахъан Ужувлан хабар рабгъиди.

⁴⁸ Магьа гьаци хьузра гъабшибдин учву шагьидар вучва.

⁴⁹ Хъа Узу Йиз Адашди учвуз тувурза дупнайиб гьамус тувдизачвуз. Учву, аьршариан учвухьна кьувват рубкьайиз, Ерусалим шагьриъ гъузай.

⁵⁰ Хъасин Исайи дурар шагьриан адаъну, Вифанияйихьнакьан хъади гъюру ва, Чан хилар за дапӀну, дурариз ужувлар ккун апӀуру.

⁵¹ Дурариз ужувлар ккун апӀури айи арайиъ, Иса, ученикарихьан гьудучӀвури, завуз за шулу.

⁵² Дурари, жилиина ахьну, Дугъаз икрам апӀуру, хъасин зурба шадвалиинди Ерусалимдиз хътакуру

⁵³ ва, гьаммишан Аллагьдин ад за апӀури, Аллагьдин хулаъ гъузру.