Лука 22 - Гирами Китаб

Пасхайин хураг

¹ ЛичӀван лавшар итӀру Пасха кӀуру машквар багахь шулайи.

² Аьхю маллйирина къанунчйири Иса йикӀуз чарйир агурайи, аммаки дурариз халкьдихьан гучӀурайи.

³ Хъа Исайин йицӀикьюр ученикдикан сариъ, Искариот лакӀам хъайи Ягьудайиъ, иблис убчӀвру.

⁴ Думу аьхю маллйирихьна ва гъаравларин аьхюдарихьна, Иса фици дурарин хилиз тувруш, йикьрар апӀуз гъягъюру.

⁵ Дурар, шад духьну, дугъаз пул тувуз рази шулу.

⁶ Ягьудайи гаф тувру: халкь алдру йишваъ Иса дурарин хилиз тувуз гъулай вахт абгури шулу.

⁷ Лавшарин йигъ улубкьуру, ва гьадмуган Пасхайин ччил, гъурбан дапӀну, дубккну ккундийи.

⁸ Исайи Петрна Югьан: «Душну ухьуз пасхайин хураг гьязур апӀинай», – дупну, гьаъру.

⁹ Дурари Дугъхьан гьерхру: – Учу наан гьязур дапӀну ккундувуз?

¹⁰ Дугъу дурариз кӀуру: – Учву шагьриъ учӀвиган, шид айи гажин гъабхурайи сар кас гьахъдичвуз. Гьадгъан кьяляхъди душну, гьадму учӀву хулаъ учӀвай,

¹¹ ва хулан эйсийиз йипай: «Мялимди гьерхра: „Узу ученикарихъди пасхайин хураг ипӀру хал набши?“»

¹² Дугъу, учвуз ккабалгнайи заан аьхю хал улупиди; хураг гьадушваъ гьязур апӀинай.

¹³ Дурар гъушу, ва чпиз гъаписи дибихъну, пасхайин хураг гьязур гъапӀу.

¹⁴ Хъа вахт гъабшиган, Чан вакиларра хъади, Иса, гъюн йивну, суфрайихъ деънийи.

¹⁵ Исайи дурариз кӀуру: – Узу аьзабнакк ккуркьайиз, учвухъди гьаму пасхайин хураг ипӀуз гизаф юкӀв хъайиз.

¹⁶ КӀуразачвузки, сарун му пасхайин хураг, Аллагьдин Паччагьлугъдиъ гьязур дархьикьан гагьди, ипӀидарза.

¹⁷ Зах гъадабгъну, Аллагьдиз чухсагъул дупну, Исайи кӀуру: – Гьаму бисай ва ичв арайиъ пай апӀинай,

¹⁸ кӀуразачвуз: Узу сарун тӀумтӀарин му чяхир убхъидарза. Узу цӀийи чяхир Аллагьдин Паччагьлугъдиъ убхъидиза.

¹⁹ Хъасин уьл гъадабгъну, Аллагьдиз чухсагъул дупну, думу гьудубтӀуру ва, дурарихьна тувну, кӀуру: – Му учвхъанди туврайи Йиз жан ву. Узу кӀваин алаури, гьамци апӀинай.

²⁰ Ари гьамци, хябяхъдин хураг ипӀбахъан, Исайи хъанара, зах дибисну, кӀуру: – Му зах учвхъанди удубзурайи Йиз ифдиинди йитӀурайи цӀийи йикьрар вуйиз.

²¹ Хъа магьа Узу масу тувуз ккайир Узухъди саб суфрайихъ деъна.

²² Инсаниятдин Бай Чаз улупнайиганси гъягъюра, вушра Думу масу туврайи касдин гьял пис хьибди!

²³ Ученикари чиб-чпихьан, гьамци апӀуз ккайир ухькан фуж ву, кӀури, гьерхру.

²⁴ Дурарин арайиъ, чпикан фуж аьхюр вуш, гьюжатра абхънийи.

²⁵ Исайи дурариз гъапи: – Паччгьари чпин халкьариин агъавал апӀура, хъа халкьди, чпи хилиъ дючӀюркьнайидариз: «халкьдиз ужʼвал апӀрудар» кӀура.

²⁶ Учву дицдар дарчва: учвкан фуж аьхюр вуш, варитӀан бицӀи гъуллугъчиси йихь ва, гьюкумдарвал апӀрур гъаравашси йихь.

²⁷ Фицики, фуж зиина ву: суфрайихъ гъюн йивну дахънайир, дарш дугъаз гъуллугъ апӀурайир? Суфрайихъ дахънайир зиина даринхъа? Хъа Узу ичв арайиъ суфрайихъ гъуллугъ апӀурайирси аза.

²⁸ Учву гьарган Йиз вари дарвалариъ Узухъди гъахьунчва.

²⁹ Узуз Йиз Адашди Паччагьвал фици табшурмиш гьапӀнуш, гьаци Узура учвуз Паччагьвал табшурмиш апӀураза.

³⁰ Йиз Паччагьлугъдиъ Йиз суфрайихъ ипӀури-убхъидичва ва, тахтниин деъну, Израилин йицӀикьюб тухмин суд апӀидичва.

³¹ Симон, я Симон! Магьа иблисдиз учву, сифккан дапӀнайи дяхинна харукси, ужур-харжир жара дапӀну ккунди а.

³² Хъа Узу, яв хъугъвал дурубгри пну, ккарагунза. Узухьна хътакиган, уву яв чвйирин хъугъувал мюгькам апӀин.

³³ Дугъу Исайиз жаваб туву: – Я Агъа! Увухъди узу дустагъдизра, аьжалназра гъягъюз гьязур вуза.

³⁴ Хъа Исайи дугъаз гъапи: – КӀуразавуз, Петр, гъи даттли уьъйир дапӀну ккудубкӀайиз, Узу шубубан аьгъюр дарзуз пидива.

³⁵ Исайи давам апӀуру: – Узу учву я пул, я тавра, я шаламар хьадарди гьаъруган, учвуз фукӀа гьудрубкӀуб гъабхьунчвуз? Дурари: «Ваъ» пну, жаваб тувру.

³⁶ Исайи дурариз гъапи: – Хъа гьамус, шлиз пул аш, гьадму гъадабгъри, гьаци – таврара, хъа шлиз адарш, чан палтар масу тувну, ханжал гъадабгъри.

³⁷ КӀуразачвузки, Узʼин гьамци дибикӀнайибра улубкьиди: «къанунсузарикан вуди гьисаб апӀиди». Гьацира Узкан фу дибикӀнаш, дурар вари тамам хьиди, ва магьа аьхирихънара гъюра.

³⁸ Дурари гъапи: – Я Агъа! Лиг, магьа мушваъ кьюб ханжал а. Исайи дурариз: «ЧӀяаьн ву» кӀуру.

³⁹ Хъа хулʼан удучӀвну, Иса, Чан аьдат вуйиганси, Елион дагъдиина гъягъюру. Дугъан кьяляхъди ученикарра гъушнийи.

⁴⁰ Йишвʼина гъафиган, Исайи дурариз гъапи: – Тямягьвалариъ адрахьбан бадали ккарагай.

⁴¹ Хъа Учвра, душвхьан хил хъапӀну гатӀабхьру кӀекӀлин манзилиъ кьамкьариина ис духьну, гьамци ккарагуз хъюгъру:

^42-44 – Адаш! Эгер Увуз ккундуш, Узхьан гьаму аьзабнан зах гьадабгъ! Вушра Йиз ният ваъ, хъа Явуб гъит ибшри.

⁴⁵ Ккарагбахъан ученикарихьна гъафиган, Исайиз дурар хажалатнаан даахнади рякъюру.

⁴⁶ Ва дурариз кӀуру: – Гьаз даахначва? Гъудужвну, тямягьвалариъ адрахьбан бадали ккарагай.

Иса дисуб

⁴⁷ Дугъу гьамци кӀури имиди, адмийирин саб аьхю гъварч гъюру. Дурарин улихь йицӀикьюр ученикдикан сар Ягьуда хьади шулу. Думу Исайиз мак апӀуз Дугъаз багахь гъахьи.

⁴⁸ Исайи дугъаз кӀуру: – Ягьуда! Мак апӀбиинди Инсаниятдин Бай масу тувранахъа?

⁴⁹ Исайихъ хъайидариз, му гьял наанди илтӀибкӀураш дябкъну, Дугъаз кӀуру: – Агъа! Ханжал йивидикӀан?

⁵⁰ Дурарикан сари жугьдарин аьхю маллайин гъаравшиз йивну, арччул иб ктабтӀуру.

⁵¹ Гьадмуган Исайи гъапи: «Гъибтай, чӀяаьн ву!» ва лукӀран ибак хил кучну, думу сагъ апӀуру.

⁵² Учв дисуз дуфнайи жугьдарин аьхюну маллйириз, Аллагьдин хулан гъаравларин аьхюдариз ва агъсакълариз Исайи гъапи: – Узу дисбан бадали, учву, гъачгъиинаси, ханжларна маргъар хьади удучӀвначва!

⁵³ Узу учвухъди гьар йигъан Аллагьдин хулаъ шуйза, учву Узʼина хил за гъапӀундайчва. Хъа гьамус, мучӀушну гьюкум апӀурайи вахт ичв вахт ву.

Петр инкар хьуб

⁵⁴ Иса, дидисну, жугьдарин аьхюну маллайин хулаз хуру. Петр ярхла-ярхлади дугъан кьяляхъди гъягъюру.

⁵⁵ Гьяятдиъ уч духьнайидар, цӀа алапӀну, вари сатӀиди деиган, Петрра дурарин арайиъ деъру.

⁵⁶ Сар гъараваш дишагьлийи, думу цӀихъ деънади дяркъну, дугъаз уччвуйи дилигну, гъапи: – Гьамура Исайихъ хъайидарикан ву.

⁵⁷ Амма Петри: «Узуз Думу аьгъюр дарзуз» дупну, кӀул ккадабгъуру.

⁵⁸ Саб бицӀи арайилан, Петр дяркъну, дугъаз сар жарарира: «Увура гьадрарикан вува», – кӀуру. Петр, му касдизра: «Ваъ, дарза» пну, инкар шулу.

⁵⁹ Саб сяаьткьан вахт улдубчӀвиган, хъана сари ижмишнаан кӀуру: – Якьин гьамура Исайихъ хъайир ву, фицики му Галилей уьлкейиан ву.

⁶⁰ Хъа Петри думу касдиз кӀуру: – Уву фу кӀурашра, аьгъдарзуз. Дугъу му гафар кӀури имиди, даттли уьъйир гъапӀу.

⁶¹ Гьадмуган Агъа, илдицну, Петрихьинди гъилигу, ва Петрин Агъайи чаз гъапи гьаму гафар кӀваина гъюру: «Гъи даттли уьъйир дапӀну ккудубкӀайиз, шубубан Узу аьгъюр дарзуз пидива!»

⁶² Гьадмуган Петр, гьяятдиан удучӀвну, дердлуди гъишу.

⁶³ Иса дидиснайи адмийир, Дугъʼин аьлхъюри, Дугъаз йивури гъахьну.

⁶⁴ Дугъан улар гьеркри: «Увуз шли гъивнуш, йипа, эгер Уву пайгъамбар вуш!» кӀури, йивури гъахьну.

⁶⁵ Гьацира Исайиз хъанара жара аьрвалар апӀури гъахьну.

⁶⁶ Хъайигъан гвачӀинган агъсакълар, жугьдарин аьхю маллйир ва къанунчйир уч духьну, Иса заан диванханайиз гъахуру.

⁶⁷ Дугъхьан гьерхру: – Эгер Уву Месигь вуш, йип учуз? Дугъу дурариз кӀуру: – Узу учвуз гъапишра, хъугъидарчва;

⁶⁸ Хъа Узу учвуз суал тувишра, Узуз жаваб тувидарчва;

⁶⁹ Гьамусдихъантина Инсаниятдин Бай кьудратлу Аллагьдин арччул гъвалахъ деъди.

⁷⁰ Хъа вардари Дугъаз кӀуру: – Яна Уву Аллагьдин Бай вува, сарун? Исайи дурариз жаваб тувру: – Учву кӀурайиси ву.

⁷¹ Дурари кӀуруки: – Ухьуз сарун фициб шагьидвал лазим вухъа, фицики му гафар ухьуз Мугъан Чан мелзналан гъеерхьунхьуз!