Лука 21 - Гирами Китаб

АчӀни дишагьлийин садакьа

¹ Кьяляхъ илдициган, Исайиз Аллагьдин хулан хазнайиъ садакьйир иврайи девлетлуйир рякъюру.

² Дугъаз гьацира кьюб шигьи дирчу сар касиб ачӀни хпирра рякъюру.

³ Гьадмуган Исайи кӀуру: – Гьякьди кӀуразачвуз, гьаму ачӀни дишагьлийи вардаритӀан гизаф дивну,

⁴ Фицики миди вуйидари садакьйир уьлдюгънайивалиан артухъ вуйибдикан дивну, хъа дугъу чан касибвалиан чаз айи-адруб вари дивну.

Аллагьдин хал дабгъуб

⁵ Ученикарикан сакьюдари: «Аллагьдин хал фукьан уччву гъванарихьди ва багъишарихьди фукьан ужуди дабалгнадаринхъа!» гъапиган, Исайи гьамци кӀуру:

⁶ – Гьацдар йигъар гъидики, учвуз рябкъюрайишваъ гъван гъвандиин гъубзидар, вари даргъиди.

⁷ Хъа Дугъхьан гьерхру: – Я Мялим! Дици фила хьибди? Мици шлу вахт фициб лишниинди аьгъю хьибди?

⁸ Исайи гъапи: – Учву алдатмиш апӀуз мигъитанай, фицики гизафдар Йиз ччвурнаккди, «Месигь вуза» кӀури, вая «Месигь гъюру вахт улубкьна» кӀури, гъиди. Вара-вара дурарихъди мягъянай.

⁹ Учвуз дявйириканна гъалабулугъарикан гъеебхьиган, гучӀ мапӀанай, фицики дурар вари улихь хьуз ккайи ляхнар ву, хъа му сабан аьхир дар.

¹⁰ Хъана Исайи ученикариз гъапи: – Халкь халкьдиин ва паччагьлугъ паччагьлугъдиин алархьиди.

¹¹ Жюрбежюр йишвариъ зурбади жилар тӀурччвиди, гашʼвал ва уьзрар ахьди, завариан гучӀ шлу гьядисйир хьиди ва зурба аьламатнан лишнар гъиди.

¹² Вари гьамрар хьайиз, учву дисбан бадали, ичв кьяляхъ хъергди. Узу себеб духьну, мажлисариъ ичв диван апӀиди, учву дустгъариъ итди, паччгьаринна гьюкумдрарин улихь учвухь жаваб тувуз гъитди.

¹³ Учву Йиз шагьидар хьидичва.

¹⁴ Гьаци вуйиган, Узхъанди учву фициб жаваб тувруш, дидкан улихьмиди фикир мапӀанай,

¹⁵ фицики учвуз къаршу дийигъуз вая учву батӀул апӀуз гьич сарихьанра даршлуси гафар ва акьюллувал Узу тувдизачвуз.

¹⁶ Гьацира абйир-бабари, чвйирина мирасари ва дустари учву масу тувди, учвкан саспидар йивну йихиди.

¹⁷ Йиз ученикар хьпаз лигну, учву варидариз даккун хьиди.

¹⁸ Хъа ичв кӀуллан гьич саб чӀаркьан алдабхъидар.

¹⁹ Ичв сабур апӀувалиинди ичв рюгь-юкӀв уьрхидичва.

Ерусалим дабгъуб

²⁰ Ерусалим кьушмари кьялаъ тӀапӀну гъябкъиган, аьгъю йибхьайки, думу ккадабхъуз багахь дубхьна.

²¹ Гьадмуган Ягьудия уьлкейиъ айидар дагълариз гьергри, фуж шагьриъ ади гъашиш, дидʼан удучӀври, хъа фуж шагьрин аьтрафарихъ хъади гъашиш, дидиъ удручӀври.

²² Гьаз гъапиш му йигъар жаза гьадабтӀру йигъар хьиди ва вари дибикӀнайиб гьадмуган тамам хьибди.

²³ Гъагъдиъ айидаринна нанайихъ бицӀидар хъайидарин гьадму йигъари гьял пис хьибди! Аллагьдин хъял гьаму халкьдиин алабхъиди.

²⁴ Гизафдар ханжлин мурзнахьан йихиди ва гизафдар жара халкьарин йисирвалиъ хьиди. Хъа Ерусалим жара халкьари, чпин деврар ккудукӀайиз, ликриккан апӀури хьибди.

²⁵ Хъа ригъдиин, вазлиин ва хядариин аьламатнан лишнар хьиди. Жилиин гьюлерин сесерихьан ва ирикьуваларихьан халкьариз аьжузвал ва гъалабулугъ хьибди.

²⁶ Инсанар гучӀбаан ва дюнʼяйиина гъюз ккайи бедбахтвалариз ккилигувалиан зяйиф хьиди, гьаз гъапиш завар ккадаршвиди.

²⁷ Хъа гьадмуган дурариз кьувват ва зурба гьяйбат хъади дифриинди гъюрайи Инсаниятдин Бай рякъиди.

²⁸ Гьамрар вари кӀулиз удучӀвуз хъюгъиган, гучӀ мапӀанай ва ичв кӀулар за апӀинай, фицики гьадмуган учву азад апӀру вахт хъубкьра.

²⁹ Хъасин Исайи дурариз тахалус ктибтуру: – Инжирин ва миди вуйи вари гьарариз лигай:

³⁰ дурари кӀаж адабшвурайиган, учвуз, му дябкъну, хьад багахь шулайиб аьгъю шулучвуз.

³¹ Гьаци учвузра, гьамрар гъяркъган, Аллагьдин Паччагьлугъ багахь дубхьнайивал аьгъю апӀинай.

³² Гьякь кӀуразачвуз: му вари улубкьайиз гьамусдин насил гъубзди.

³³ Заварна жилар ккадахьиди, хъа Йиз гафар дургидар.

³⁴ Учвʼин гьадму йигъ хабарсузди улулубкьбан бадали, убхъбиинди, ичкивалиинди ва яшайишдин гъайгъушнариинди ичв юкӀвар тямягьвалиъ адрахьбаз ихтият йихьай,

³⁵ фицики му жилиин яшамиш шулайи вардариин якьинди улубкьиди.

³⁶ Гьаци вуйиган гьарсаб вахтна уягъди гъузай, гъюзимбу вари завалариккан ккадархьруси, ккарагури йихьай ва Инсаниятдин Балин улихь дийигъуз шлуганси гъузай.

³⁷ Йигъар Исайи Аллагьдин хулаъ аьгъювалар улупури, хъа йишвар, кӀуруш, дилин удучӀвури, Елион дагъдиин адауйи.

³⁸ Вари халкь гвачӀнин Аллагьдин хулаз Исайихъ хъпехъуз гъюри гъахьну.