Лука 2 - Гирами Китаб

Иса бабкан хьуб

¹ Думу йигъари Август кӀуру Римдин паччагьдин чан вари ругариин али агьалйир гьисаб апӀуз амур удубчӀвуру.

² Му Сирия вилаятдиъ Квиринийи паччагьвал апӀурайи девриъ сабпи ражну гъабхурайи ляхин вуйи.

³ Гьаддиз вари, чпи дикӀбан бадали, гьарур чан шагьриз гъушнийи.

⁴ Галилей уьлкейиъ айи Назарет шагьриан Ягьудия уьлкейиъ айи Давуд бабкан гъахьи Вифлеем кӀуру шагьриз Юсуфра гъягъюру, фицики думу Давудгъярин тухмиан вуйи.

⁵ Думу чаз хъирснайи ва гъагъдиъ айи Марʼямдихъди чпи дикӀуз душнайир вуйи.

⁶ Дурар душваъ айиган, Марʼямдин бицӀир шлу вахт улубкьуру,

⁷ ва дугъу чан сарпи велед – Бай апӀуру. Думу ччаппаригъян гъидиржну, аьхъиъ айи тӀунаъ дитру, гьаз гъапиш дурариз хялар дергру хулариъ йишв ади гъибихъундайи.

Малайикари марччлихънариз, Иса бабкан гъахьну, кӀури, хабар дебккуб

⁸ Гьадму уьлкейиъ йишвну чюлиъ марччлихънар чпин сюрйирин гъаравлиъ айи.

⁹ Сабпну дурарин улихьна Агъайин малайик гъафнийи. Агъайин гьяйбатнан нурну дурар варишварихъанди аку гъапӀнийи, ва дурарик гучӀ кабхънийи.

¹⁰ Малайикди дурариз кӀуру: – ГучӀ мапӀанай, узу учвуз вари халкь шад апӀру ужуб хабар дубхназа:

¹¹ гъи Давудрин шагьриъ учву гунгьариккан азад АпӀрур, Агъа Месигь, бабкан гъахьну.

¹² Магьа учвуз мидин лишанра: учвуз, ччаппаригъ гъидиржнади, тӀунаъ БицӀир дихъидичвуз.

¹³ Ва сабпну му малайикдин кьяляхъди гизаф кьадарнаъди жара малаикарра гъюру ва дурари, Аллагьдин ад апӀури, гьамци кӀуру:

¹⁴ – Аьршариин али Аллагьдин ад за ибшри, жилиин Аллагьдиз разивал хурайи инсанарин арайиъ ислягьвал ибшри!

¹⁵ Малайикар дурарихьан завариз удучӀвиган, марччлихънари чиб-чпиз гьамци кӀуру: – Вифлеемдиз душну, душваъ фу гъабхьнуш, Агъайи ухьуз фтин гьякьнаан хабар дебккнуш, лигухьа.

¹⁶ Тядивал кади гъафидариз Марʼямна Юсуф ва тӀунахъ хъайи БицӀир рякъюру.

¹⁷ Дурар гъяркъиган, марччлихънари му БицӀирин гьякьнаан чпиз малайикди гъапибдикан ктибтуру.

¹⁸ Мидкан гъеебхькьандар вари марччлихънари ктитдариин мюгьтал шулу.

¹⁹ Хъа Марʼямди му вари гафар, саб-сабдиин иливури, чан кӀваъ уьрхюру.

²⁰ Марччлихънарра, чпиз малайикди гъапидар, чпин улариз рякъбаз лигну, Аллагь адлу апӀури ва Дугъан тярифар апӀури, кьяляхъ хътакуру.

Иса Аллагьдиз бахш апӀуб

²¹ Миржид йигълан БицӀирин суннат апӀру вахт улубкьиган, Дугъʼин, Учв бабак киршайиз малайикди улупу, гьадму Иса кӀуру ччвур иливуру.

²² Хъа, Мусайин къанундиз лигну, суннат марцц хьпан йигъар тамам гъашиган, Думу Агъайин улихь дерккбан бадали, Ерусалимдиз хуру.

²³ Агъайин Къанундиъ улупнайиганси, «гьарсаб хизандиъ сарпи жили бай Агъайиз бахш апӀуб лазим вуйи».

²⁴ Ва, гьадму Къанундиъ дибикӀнайиганси, «кьюб гъюд вая луфран чиркквар, гъурбан дапӀну, урккуб лазим вуйи».

Симеон ва Анна

²⁵ Думу деврин Ерусалимдиъ Симеон кӀуру сар кас айи. Думу Израилиз Аллагьдихьан кюмек рубкьайиз ккилигурайи дугъри ва аьдалатлу адми вуйи. Дугъʼин Аллагьдин Рюгь алийи.

²⁶ Дугъаз Аллагьдин Рюгьну, Агъайи кадагънайи Месигь чаз рякъяйиз, аьжал хьибдарив пну, улупнайи.

²⁷ Симеон Аллагьдин Рюгьнаккди Аллагьдин хулаз гъюру. Абйир-бабари БицӀи Иса Къанундиъ улупнайиб апӀуз гъахиган,

²⁸ Симеонди, Иса хилариина гъадагъуру ва, Аллагьдин ад дапӀну, кӀуру:

²⁹ – Я Гьюкумдар! Уву гъапиганси, гьамус узу, Яв лукӀ, разивалиинди деет,

^30-32 сарун, магьа вари халкьарин улихь Уву улупу, учу завалариккан уьрхюз дуфнайи Месигь Вуйир, аллагьсузар зигьимдихьна гъахру нур Вуйир ва Яв Израилин халкьдин адлувал Вуйир йиз улариз гъяркъниз.

³³ Юсуфна Марʼям БицӀи Исайикан гъапидариин мюгьтал шулу.

³⁴ Симеонди, дурариз ужʼвал ккун дапӀну, Марʼямдиз гьамци кӀуру: – Гьаму яв Бай Израилиъ гизафдар асккан хьпан, гьам заан хьпан себеб хьиди. Мугълантина гизаф улхбар хьиди.

³⁵ Яв кӀваантина яракь итӀибгъиди ва гьаддиинди аьхючӀвеъ юкӀвариъ айи ниятар ачухъ хьиди.

³⁶ Мушваъ гьацира Ашерин тухмиан вуйи, гизаф кьаби яшнаъ айи, чан жилирихъди ургуд йисантӀан яшамиш дарши, Фануилин риш аьяндар Аннара айи.

³⁷ Думу, миржцӀурна юкьуд йисаъ айи ачӀни гъари, йигъ-йишвди ушвар дисбииндина ккарагбиинди Аллагьдиз гъуллугъ апӀури, Аллагьдин хулхьан гьудудучӀври шуйи.

³⁸ Аннайи, гьадму вахтна душвахьна дуфну, Аллагь адлу апӀури, Ерусалим азад хьувализ ккилигурайикьандариз вардариз Исайин гьякьнаан ктитури гъахьну.

³⁹ Вари ляхнар Агъайин Къанундиъ улупнайиси ккудукӀиган, Юсуфна Марʼям Галилей уьлкейиъ айи чпин Назарет шагьриз хътакуру.

⁴⁰ Хъа БицӀир аьхю шули, мюгькам шули, аьгъювалари ацӀри, Дугъʼин Аллагьдин ужʼвал алди гъабхьну.

«Узу йиз Адашдин ужагъдиъ духьну ккун»

⁴¹ Исайин абйир-бабар гьар йисан Ерусалимдиз Пасхайин машквраз гъягъюри шуйи.

⁴² Исайин йицӀикьюд йис тамам гъабшиган, дурар, чпин аьдат вуйиганси, Ерусалимдиз гьадму машквраз гъафну.

⁴³ Машквран йигъар ккудукӀну, кьяляхъ хътакру вахтна, живан Иса Ерусалимдиъ гъузру. Амма абйир-бабариз мидкан аьгъяди гъабхьундар.

⁴⁴ Дурари, Иса жарадарихъди гъюрашул кӀури, фикир апӀуру. Хъа сад йигъандин рякъ ккадапӀиган, дурари багахьлуйирин ва таниш вуйидарин арайиъ Иса агуз хъюгъру.

⁴⁵ Хъа чпиз Иса дидрихъиган, Дугъахъ лицури Ерусалимдиз хътакуру.

⁴⁶ Шубуд йигълан Думу, Аллагьдин хулаъ мялимарин арайиъ деъну, дурарихъ хъпехъури ва дурариз суалар туври рякъюру.

⁴⁷ Исайихъ хъпехъурайидар вари Дугъан фагьумлувалиин ва Дугъан жавабариин мюгьтал духьнайи.

⁴⁸ Душваъ Иса гъяркъиган, абйир-бабар мюгьтал гъахьи. Дадайи Дугъаз гъапну: – Я жан Бай! Уву учкан гьапӀунва? Магьа узуна Яв адашди зурба хажалат кади Уву агури гъахьунча.

⁴⁹ Исайи дурариз гъапи: – Узу гьаз агури гъахьунчва? Мегер учвуз узу йиз Адашдин ужагъдиъ духьну ккуниб аьгъданчвуз?

⁵⁰ Амма дурар Дугъу гъапи гафарин гъаври ахъундайи.

⁵¹ Хъа Иса дурарихъди Назаретдиз гъюру ва мютӀюгъ шулу. Дугъан дадайи вари гьаму ляхнар чан кӀваъ уьрхюри шуйи.

⁵² Иса гьам фагьумлувалиъ, гьам яшнаъ улихьна гъягъюри гъахьну. Думу Аллагьдизра, инсанаризра ккунди гъузру.