Лука 18 - Гирами Китаб

АчӀни дишагьлийикан ва диванбегийикан тахалус

¹ Хъасин Исайи ученикариз, чпи гьарган ккарагури ва юкӀв дар дарапӀди духьну ккун кӀури, дурариз саб тахалус ктибтуру:

² – Саб шагьриъ Аллагьдихьан гучӀ ва инсанарихьан нач адру диванбеги ади гъахьну.

³ Гьадму шагьриъ сар ачӀни дишагьли ади ва дугъу, диванбегийихьна гъюри, учв душмнихьан уьрх, кӀури гъахьну.

⁴ Амма диванбегийи хайлин вахтна дугъаз иб дириври гъахьну. Хъа аьхирки дугъу чав-чакди кӀуру: узуз я Аллагьдихьан гучӀударшра, я адмийирихьан нач кадаршра,

⁵ гьаму ачӀни дишагьлийи узу сикинди гъидритди хьпаз лигну, гьарган гъюри, узу инжик дарапӀбан бадали, думу уьрхидиза.

⁶ Агъайи хъа кӀуру: – Ебхьуранчвуз, гьякьсуз диванбегийи фу кӀураш?

⁷ Аллагьди уьрхидаринхъа, Чаз йигъ-йишвди ккарагурайи, Чав ктагъдар, гьеле дурар уьрхюз кьан апӀурушра?

⁸ КӀуразачвузки, Дугъу дишлади дурар уьрхюз кюмек тувди. Амма Инсаниятдин Бализ, жилʼина гъафиган, хъугъувал бихъуйкӀан яраб?

Фарисейиканна налук уч апӀрурикан тахалус

⁹ Исайи гьацира чпин дугъривалиин шак алдарди, имбудар асккан апӀурайидаризра гьамциб тахалус хуру:

¹⁰ – Кьюр кас Аллагьдин хулаъ ккарагуз учӀвну: сар – фарисей, тмунурра – налукар гъадагърур.

¹¹ Фарисейи, ккарагруган, чакна гьамци кӀуру: «Я Аллагь! Увуз чухсагъул кӀураза, узу миди вуйи пис инсанарсир, тӀарашчйирсир, алдатмиш апӀрударсир, кьяппйирсир вая гьаму налукар уч апӀрурсир дарапӀбаз.

¹² Гьяфтайиъ кьюб ражари ушв бисури шулза, вари гъазанмиш гъапӀубдин йицӀубпи пай тувраза».

¹³ Налукар гъадагърурихьан, ярхласи дийигъну, завузди улар за апӀузкьана гъабхундайи, хъа чан мухур убччвури, кӀури гъахьну: «Я Аллагь! Язухъ апӀина йиз, гунагькрин!»

¹⁴ КӀуразачвуз, думу чан хулаз фарисейтӀан артухъди марцц духьну гъушну, фицики чав учв заан апӀурайи гьарсар кас асккан апӀиди ва чав учв аскканди дисурайир заан хьиди.

Исана бицӀидар

¹⁵ Исайихьна, дурарилан хил алдатри кӀури, набалугъ бицӀидарра хури шуйи; ученикари, кӀуруш, му гъябкъиган, гъадагъа апӀуру.

¹⁶ Хъа Исайи, бицӀидариз чахьна дих дапӀну, кӀуру: – БицӀидар узухьна гъюз гъитай, гъадагъа мапӀанай, Аллагьдин Паччагьлугъ гьацдаринуб ву.

¹⁷ Гьякь кӀуразачвуз, Аллагьдин Паччагьлугъ бицӀириси кьабул дарапӀур дидиъ учӀвидар.

¹⁸ Гьюкумдрарикан сари Исайихьан гьерхру: – Я гъяни Мялим! КкудудубкӀру уьмур рубкьбан бадали, узу фу дапӀну ккунду?

¹⁹ Исайи дугъаз гъапи: – Гьаз Узуз гъянир кӀурава? Сар Аллагьдилан гъайри саркьан гъянир дар.

²⁰ Хъа гьамцдар Аллагьдин табшуругъар аьгъявузки: «кьяппавал мапӀан», «адми миликӀан», «мигьитӀибкӀан», «кучӀлин шагьидвал мапӀан», «адашдизна дадайиз гьюрмат апӀин».

²¹ Дугъу жаваб туву: – Вари гьамрар йиз жигьил вахтарихъанмина тамам апӀураза.

²² Гьаму деебхьну, Исайи дугъаз гъапи: – Сабсан увуз гьубкӀрадар: увуз айи-адру девлет масу тувну, касибариз пай апӀин, гьадмуган аьршариъ увуз девлет хьибдивуз. Хъасин Узухъди гъач.

²³ Му гафар гъеерхьиган, му кас пашман шулу, гьаз гъапиш думу гизаф девлетлу вуйи.

²⁴ Дугъан пашманвал гъябкъю Исайи кӀуру: – Девлетлуйириз фукьан читин дарин Аллагьдин Паччагьлугъдиъ учӀвуз!

²⁵ Девлетлуйиз Аьршарин Паччагьлугъдиъ учӀвубтӀан, девейиз рубдин гъюнʼан удубчӀвуб рягьят ву.

²⁶ Му гафар гъеерхьдари гьерхру: – Шилхьан учв уьрхюз хьиди?

²⁷ Исайи кӀуру: – Инсанарихьан даршлуб Аллагьдихьан шулу.

²⁸ Петри Дугъаз кӀуруки: – Магьа учу, вари учуз айиб гъибтну, Увухъди хъачаки.

²⁹ Исайи дурариз кӀуру: – Дугъриди кӀуразачвуз: Аллагьдин Паччагьлугъ бадали чан хал вая шив, ваяки чвйирна чйир, ясана абйир-бабар ва веледар дирчну, фуж Узухъди гъафиш,

³⁰ гьадгъаз му вахтари мурартӀан швнубсабан артухъ хьибди ва гъюзимбу вахтарира ккудудубкӀру уьмур хьибди.

³¹ Хъа йицӀикьюр Чан ученикар гъирагъдиз гьадаъну, дурариз кӀуру: – Магьа ухьу Ерусалимдиз гъягъюрахьа ва Инсаниятдин Балкан пайгъамбрарилантина дибикӀнайиб вари тамам хьибди:

³² «Ав, Думу аллагьсузарин хилиз тувди, Дугъʼина аьрвалар хиди, Думу алчагъ апӀиди, Дугъʼин тутйир алатӀиди.

³³ Думу гъирмажарихьди урччвиди ва, аьхирки, йикӀиди, хъа шубудпи йигъан Думу чӀиви хьиди».

³⁴ Амма ученикар фтинкӀа гъаври ахъундайи; му гафарин сир дурарихьна гъурубкьундайи ва дурарихьан Исайи гъапиб аннамиш апӀуз шуладайи.

³⁵ Иса Ерихон шагьрихьна гъюрайиган, сар кур кас, садакьа ккун апӀури, рякъюхъ деънайи.

³⁶ Дугъу, чан гъвалхъантина халкь гъягъюрайиб деебхьну, гьерхру: – Му фу хабар ву?

³⁷ Дугъаз: «Назаретдиан вуйи Иса гъюра», – гъапнийи.

³⁸ Гьадмуган дугъу чӀигъ апӀуру: – Я Давудгъярин Бай Иса! Йиз язухъ апӀина!

³⁹ Улихьди гъягъюрайидари куриз ккебехъ кӀуйи, амма дугъу айибтӀан артухъ чӀигъ гъапӀу: – Давудгъярин Бай! Йиз язухъ апӀин!

⁴⁰ Исайи, хъугъужвну, думу Чахьна хуз амур апӀуру. Ва думу гъафиган, дугъхьан гьерхру:

⁴¹ – Узкан фу ккундувуз? Дугъу кӀуру: – Агъа! Узуз рябкъюз ккундузуз.

⁴² Исайи дугъаз гъапи: «Рябкъ! Яв хъугъвали уву гъюрхну».

⁴³ Дугъаз дишлади рябкъюри шулу, ва думу, Аллагьдин ад за апӀури, Исайихъди гъушу. Вари халкьди, му дябкъну, Аллагьдин тяриф апӀури гъаши.