Лука 17 - Гирами Китаб

Гунагь ляхникан, швумал хьубкан ва хил алдабгъбакан

¹ Исайи чан ученикариз кӀуру: – Инсан гунагьвалиъ тӀаъру тямягьяр чарасуз гъиди. Аммаки тямягьяр шлиланмина гъюруш, гьадгъан гьял пис хьибди.

² Думу касдиз, тямягьвал кипну, зяифдарикан саркьан рякъʼан адаайиз, чан гардандиъ рягънин ахал ипну, учв гьюлиз гатӀахьнийиш, ужу шлийи.

³ Уягъди гъузай. Эгерки яв чвуччву увуз къаршу гунагьвал апӀураш, мапӀан йип дугъаз, ва эгер тахсир гардандиъ гъибисиш, дугълан хил алдабгъ.

⁴ Сад йигъан увуз къаршу вуди ургуб ражари гунагь ляхин дапӀну, ва ургубан швумал вуза гъапиш, дугълан хил алдабгъ.

⁵ Ученикари Исайиз кӀуру: – Ич хъугърувал артухъ апӀина, Агъа!

⁶ Агъайи дурариз кӀуру: – Эгер учвуъ бицӀи дилсибкьан хъугъувал аш ва учву инжирин гьариз: «КудубчӀвну гьюлиъ убс» гъапнийиш, думу учвухъ хъпехъидийи.

Ужудар лукӀар йихьай

⁷ Чаз хутӀил хъапӀру вая маларихъ гъягъру лукӀ ади, думу чюлиан гъафиган, дугъаз: «Гьяракат апӀин, суфрайихъ деъ» шли кӀуру?

⁸ Дугъаз аьксина вуди: «Узуз хябяхъдин хураг гьязур апӀин ва, юкьвʼан идибтӀну, узу ипӀури ва убхъури имиди, узуз гъуллугъ апӀин, хъасин уву ипӀин ва убхъ», пидаринхъа?

⁹ Му лукӀру чан буйругъ тамам гъапӀну пну, дугъаз аферин пидинхъа? Пидар пну, фикир апӀураза.

¹⁰ Гьаци учвура, учвуз буйругъ дапӀнайи ляхнар тамам гъапӀиган, йипай: «Учу фтинкӀа ккадру лукӀар вуча, гьаз гъапиш учу буржлу вуйиб гъапӀунча».

Хамран аьзар кайидар сагъ апӀуб

¹¹ Ерусалимдиз гъюрайи Иса Самария уьлкейинна Галилей уьлкейин арайиъ айи

¹² саб гъулаъ учӀврайиган, Дугъаз цӀиб ярхласи дийигъну, хамран аьзар кайи йицӀур кас алахъуру.

¹³ Дурари аьхю сесниинди кӀуру: – Я Мялим Иса! Ич язухъ апӀинава!

¹⁴ Дурар дяркъну, Исайи дурариз кӀуру: – Душну учву маллйириз улупай. Дурар, гъягъюри имиди, уьзрихьан марцц шулу.

¹⁵ Дурарикан сар, учв сагъ гъашиб дябкъну, Аллагьдин ад за апӀури, кьяляхъ хътакуру

¹⁶ ва, Исайин ликарикк дахъну, дугъу Исайиз чухсагъул кӀуру. Му Самария уьлкейин агьали вуйи.

¹⁷ Гьадмуган Исайи гьерхру: – Учву йицӀридра сагъ гъахьундайинхъа? Имбуну урчӀвур нашди?

¹⁸ Дурарра гьаз, сар гъураба самариялу ктарди, Аллагьдиз чухсагъул пуз кьяляхъ хътакундар?

¹⁹ Хъа мугъаз гъапи: – Гъудужвну гъарах, яв хъугъували уву гъюрхну.

Аллагьдин Паччагьлугъ улубкьуваликан

²⁰ Фарисйири, Аллагьдин Паччагьлугъ фила улубкьиди, кӀури, гьерхиган, Исайи дурариз жаваб тувру: – Аллагьдин Паччагьлугъ рябкъруси гъибдар.

²¹ Ва сарира пидарки: «думу дуфну магьа гьамшваъ а», вая «магьа гьатшваъ а», фицики Аллагьдин Паччагьлугъ ичв арайиъ а.

²² Гьацира Исайи ученикаризра кӀуру: – Гьацдар йигъар гъидики, сад йигъанкьан Инсаниятдин Бай учуз рякъюз ккунийкӀан пидичва, амма рякъидарчвуз.

²³ Ва учвуз «гьатмагьа гьатушвахь», вая «магьа, гьамушвахь хьа» гъапишра, мягъянай ва мехъерганай:

²⁴ фицики кьюркьлин цӀаси, завун саб кӀулихъ крибчубди фици завун тмуну кӀулиз нур тувруш, гьаци хьиди Инсаниятдин Байра Чан йигъан.

²⁵ Хъа гъи Думу гизаф аьзабар ккюргъбакк ва гьамусдин наслари нигь апӀбакк ккуркьди.

²⁶ Нюгьдин йигъари фици гъабхьнуш, Инсаниятдин Балин вахтарира гьаци хьибди:

²⁷ Нюгь гимийиъ эу йигъʼина гъяйиз, вари халкь ипӀури-убхъури, швушвар хури, швуваз гъягъюри гъахьну, хъа вари дюнʼяйиин шид улубчӀвиган, дурар вари пуч шулу.

²⁸ Лутдин вахтарира гьаци гъабхьнийи: вари халкь, гъайгъусузди, ипӀури-убхъури, ариш-вериш апӀури, тум убзури, хулар тикмиш апӀури гъахьну;

²⁹ хъа Лут Содомдиан удучӀву йигъан завариан цӀинна гугуртин мархь гъубгънийи ва вари тӀанкь гъапӀнийи.

³⁰ Инсаниятдин Бай гъафи йигъанра гьаци хьибди.

³¹ Думу йигъан фуж гъваин алди гъашиш, хъа мутму – хулаъ, дурар гъадагъуз хулаз дурушри, фуж хутӀлиъ ади гъашиш, думура дурушри.

³² Лутдин хпир кӀваин апӀинай.

³³ Фуж чан уьмур уьбхюз хъюгъиш, думу дугъу пуч апӀиди, хъа шли думу пуч гъапӀиш, гьадгъу думу чӀиви апӀиди.

³⁴ КӀуразачвуз: думу йишван саб аьхникк кьюр хьиди, дурарикан сар гъадагъиди, хъа тмунур гъитди.

³⁵ Кьюр хпир ахларихъ хъаш, дурарикан сар гъадагъиди, тмунур гъитди. [

³⁶ ]

³⁷ Хъа гьадмуган ученикари Исайихьан гьерхру: – Мици наан хьибди, Агъа? Дугъу дурариз гъапи: – Майит наан аш, гьадина люкьярра уч хьиди.