Лука 16 - Гирами Китаб

Дугъривал ктру идарачийикан тахалус

¹ Хъа Исайи Чан ученикариз кӀуруки: – Сар девлетлуйиз чан мяишат идара апӀру сар кас ади гъахьну. Гьадгъу эйсийин мяишат зяя апӀура кӀури, аьрза гъюру.

² Эйсийи дугъаз дих дапӀну гъапи: «Увкан узуз ерхьурайи аьрзйир гьапӀрудар ву? Яв идара апӀбан ляхнарин гьякь-гьисаб ча, фицики сарун увхьан мяишат идара апӀуз шулдарвухьан».

³ Гьадмуган мяишатдин идарачийи чав-чакна кӀуру: «Узу гьапӀну ккун? Йиз агъайи хулан мяишат идара апӀувал узхьан тадабгъиди: жил йибккуз узхьан удубкьидар, шликанкӀа пул тӀалаб апӀуз начди вузуз.

⁴ Йиз ляхнихьан гьадаиган, узу жарадарин хулариъ кьабул апӀру ужуб аьмал аьгъязуз».

⁵ Хъа чан агъайин буржар кайидариз жа-жаради чахьна дих апӀури, дугъу сарпирихьан гьерхну: «Уву йиз агъайиз фукьан буржлу вува?»

⁶ Дугъу: «Варж бети ччимдин» кӀуру. Хъа дугъаз идарачийи: «Ма яв расписка» ва тядиди «хьуцӀур бети бикӀ» кӀуру.

⁷ Хъасин тмунурихьан гьерхру: «Хъа уву фукьан буржлу вува?» Дугъу: «Варж шишал дяхнин» кӀуру. Дугъазра кӀуру: «Ма яв распискара ва „миржцӀур шишал“ бикӀ».

⁸ Хъасин эйсийи, чан нягьякь идарачийи аькьюллу ляхин гъапӀну кӀури, дугъан тяриф апӀуру. Фицики гьамусдин деврин адмийир аквнахьна чалишмиш шулайидартӀан чпин хайирнан гъаврикк ккайидар ву.

⁹ Хъа гьаддиз Узу кӀуразачвуз: учвуз жилʼин тувнайи девлетниинди жарадариз хайир тувай. Фицики му дюнʼяйин девлетар тӀанкь гъапиган, учву Агъайин гьаргандин хулариъ кьабул апӀидичву.

¹⁰ ЦӀиб вуйибдиъ дугъри кас – аьхюбдиъра дугъри ву, хъа цӀиб вуйибдиъ угъри – аьхюбдиъра угъри ву.

¹¹ Гьаци вуйиган, эгер учвʼина жилариин али девлет аманат апӀуз шулдарш, хъа аьршариин али хазна шли учвʼинна аманат апӀиди?

¹² Ва эгер учву жарарин девлетнаъ угъри гъахьнуш, учвуз ичвуб шли тувди?

¹³ Гьич сар гъуллугъчийихьанра кьюр агъайиз гъуллугъ сабси апӀуз шулдар, фицики дугъаз санур даккун, хъа тмунур ккун хьиди, вая сариз ужуди гъуллугъ апӀиди, хъа тмунуриз – чӀуруди. Аллагьдизра девлетназра сатӀиди гъуллугъ апӀуз хьибдарчвухьан.

Къанун ва Аллагьдин Паччагьлугъ

¹⁴ Пул ккуни фарисйир, гьаму гафарихъ хъпехъури, Исайиин аьлхъюри гъаши.

¹⁵ Дугъу дурариз гъапи: – Учву инсанарин улихь гьякьлудар вуди улупурачва, хъа Аллагьдиз ичв юкӀвар аьгъя, фицики инсанариз фу заан вуш, Аллагьдиз думу алчагъвал ву.

¹⁶ Ягьʼя гъяйизкьан къанун ва пайгъамбрар ади гъахьну. Хъа Ягьʼя гъафихъанмина Аллагьдин Паччагьлугъдикан Ужувлан хабар рабгъура ва гьарсар дидиъ гужниинди учӀвуз чалишмиш шула.

¹⁷ Амма къанундин саб цӀаркьанра дубгайиз, заварна жилар ухди дармадагъин шул.

¹⁸ Чан хпир гьадаурайири ва жарар хурайири кьяппавал апӀура. Хъа гьарсар жилирихьан гьудучӀву хпир хурайирира кьяппавал апӀура.

Девлетлуйинна Лазарин гештваликан ва аьзабнакк хьуваликан

¹⁹ Сар кас девлетлу вуди, багьа вуйи палтар алахьури, гьар йигъан гешт хъапӀри гъахьну.

²⁰ Хъа гьацира Лазар кӀуру, чан хамриин хац алабхьнайи, дугъан урнарихъ дахъри шлу касибра гъахьну.

²¹ Думу девлетлуйин суфрайихъан хътахьру кьацӀар вушра итӀуз рази вуйи, ва хуйири, дуфну, дугъан хацариз мелз йивури гъахьну.

²² Касиб гъачӀиган, малайикари думу Ибрагьимдин багахьна гъахуру. Девлетлура йикӀуру, ва думура кивру.

²³ Жегьеннемдиъ аьзабар зигури ади, дугъу улар за гъапӀиган, дугъаз ярхлаъ Ибрагьимна дугъан гъвалахъ деънайи Лазар рякъюру.

²⁴ Ва дугъʼан гьарай утӀубччвуру: «Я Ибрагьим аба! Йиз язухъ апӀин; Лазар узухьна гьаъ. Дугъу чан тӀубан кӀакӀ штук кубсну, йиз мелз кьяши апӀри, узу му жегьеннемдин цӀин аьзабнакк кказа».

²⁵ Хъа Ибрагьимди дугъаз кӀуру: «Йиз бай! КӀваин апӀинки, сарун увуз яв уьмриъ рубкьру ужʼвал гъурубкьунвуз, хъа Лазариз писвалтӀан фукӀа гъябкъюндар. Гьамус дугъаз мушваъ гешт ккабхъна, хъа уву аьзабнакк ккава.

²⁶ Хъа дитӀланра гъайри, явна ич арайиъ гьациб зурба деринар айихьки, милин увухьна гъюз ккунидарихьан ва дилин гьамина гъюз ккунидарихьан дилан улдучӀвуз хьибдар».

²⁷ Гьадмуган девлетлуйи гъапи: «Я аба! Увкан Лазар йиз адашдин хулаз гьауб ккун апӀурза.

²⁸ Узухъ хьур чве хъазухъ: гъит Лазари, гьадму йиз чвера гьаму аьзабнан йишваз дяргъруси, гьадрарихь чаз гъябкъюбдикан шагьидвал апӀри».

²⁹ Ибрагьимди дугъаз гъапи: «Дурариз Мусайин ва жара пайгъамбрарин китабар а; гъит гьадрарихъ хъебехъри».

³⁰ Хъа девлетлуйи кӀуру: «Ваъ, Ибрагьим аба! Белки, магьа гъачӀидарикан сар, дурарихьна дуфну, ктибтиш, дурари гунгьар гардандиъ дисиди ва тахсрар апӀидар».

³¹ Гьадмуган Ибрагьимди дугъаз кӀуру: «Эгер дурар Мусайихъ ва пайгъамбрарихъ хъпехъурадаш, дурар, фуж гъачӀидаригъян чӀиви гъахьишра, хътругъур».