Лука 15 - Гирами Китаб

Дудубгну гъибихъу агълижикан тахалус

¹ Исайихьна, Дугъахъ хъпехъбан бадали, вари налук гъюдюбхрудар ва гунагькрар гъюри гъахьну.

² Фарисйирина аьлимари, Дугъу гунагькрар кьабул апӀура ва дурарихъди уьл ипӀури шула кӀури, наразивал улупури гъахьну.

³ Гьадмуган Исайи дурариз гьамциб тахалус ктибтуру:

⁴ – Учвкан, чаз варж марчч ади, дурарикан саб гъудубгиган, урчӀвцӀурна урчӀвуб чюлиъ гъитну, гъудубгуб бихъайизкьан дарабгрур фуж шул?

⁵ Хъа дибихъну, думу гъюнариина шадди за апӀидарин?

⁶ Ва хулаз дуфну, дустарна гъуншйир уч дапӀну, дурариз «Узухъди шадвал апӀинай, гъудубгу чарва гъибихъунзуз», – пидарин?

⁷ КӀуразачвузки, гьамци аьршариъра чан тахсрар гардандиъ гъидису гунагькрикан, урчӀвцӀурна урчӀвур гунгьар ктарзук кӀурайи марцци касарикантӀан, артухъ шад хьиди.

Гъудубгу арсран кепкикан тахалус

⁸ Ясана фуну дишагьлийи, чаз йицӀуб арсран кепек ади, дурарикан саб гъудубгиган, чирагъ кабхьну, хал ичӀибкури, думу бихъайизкьан дарабгди гъибтур?

⁹ Хъа му гъибихъган, чан дуст хпар ва гъуншйир уч дапӀну, дугъу: «Узухъди шад йихьай, узуз гъудубгу арсран кепек гъибихъунзуз» дарпиди гъитрин?

¹⁰ Гьамци Аллагьдин малайикарра чан тахсрар гардандиъ гъидису сар гунагькриканра шад хьиди.

ЧӀуру рякъюъ ади дудургну, хъасин швумал духьну гъафи балкан

¹¹ Исайи хъана кӀуру: – Сар касдиз кьюр бай ади гъахьну.

¹² Дурарикан бицӀинури адашдиз гъапну: «Я адаш! Ихь девлетнан узуз рубкьру пай ча». Адашдира баяриз девлет пай апӀуру.

¹³ Сакьюдар йигъарилан бицӀину чве, чаз ккубкьуб вари уч дапӀну, ярхла юрдариз гъягъюру ва, душвариъ кефниинди яшамиш шули, чаз айи девлет вари хътипӀуру.

¹⁴ Хъа вари хътипӀган, гьадму юрдариъ зурбади гаш абхъру, ва думу дарвалиъ ахъру.

¹⁵ Думу гьадму юрднан сар агьалийихь яшамиш хьпакк ккуркьру. Эйсийира думу чан силар уьрхюз чюллериз гьаъру.

¹⁶ Думу силари ипӀурайи бужвам дипӀнура чан фун абцӀуз рази вуди шуйи, амма гьадмура дугъаз туври шулдайи.

¹⁷ Чан фагьмихъна гъафиган, дугъу гьамци гъапну: «Йиз адашдин хулʼин лихурайидариз фукьан булди уьл ади шуйи, хъа узу мушваъ гашу йикӀури азу!

¹⁸ Душну йиз адашдиз пидиза: „Я адаш, узу, аьршариз ва увуз къаршу духьну, гунагьвалар гъапӀунза.

¹⁹ Ва сарун яв бай ву пуз лайикьлур дарза. Узу увухъ лихурайидарин жергейиз кьабул апӀин“».

²⁰ Гьамци дупну, думу чан адашдихьна хътакуру. Думу ярхлаъ имиди дяркъну, адашдиз дугъан язухъ шулу ва, жаргъну душну, дугъан гардандиъ архьру ва макар апӀуру.

²¹ Бали дугъаз кӀуруки: «Я адаш! Узу, аьршариз ва увуз къаршу духьну, гунагьвалар гъапӀунза ва сарун яв бай ву пуз лайикьлу дарза».

²² Хъа адашди чан лукӀариз кӀуру: «Ужубсиб палат дубхну дугъахъ хъабхьай, хилихъ тӀубланра хъапӀай ва ликариинра алахьай.

²³ Хъасин гваназ дюбхнайи кӀари дубхну, убккай. ИпӀури ва убхъури шадвал апӀидихьа.

²⁴ Фицики му йиз бай дукӀну айи ва чӀиви гъахьну, дудургну айи ва гъидихъну». Гьамци вари шадвал апӀуз хъюгъну.

²⁵ Аьхюну бай думуган хутӀлиъ ади гъахьну. ХутӀлиан гъюрайириз, хуларихьна багахь гъашиган, ялхъвнин мукьмар ерхьуру.

²⁶ Дугъу гъаравшарикан сарихьан гьерхру: «Му фу хабар ву?»

²⁷ Дугъура мугъаз: «Яв чве дуфна; яв адашди, думу сагъ-саламатди хътакбан сагълугънаан ганаз дюбхнайи кӀари дубккна» кӀуру.

²⁸ Аьхюну чве, хъял дуфну, хулаъ учӀвуз даккунди гъахьну. Адашди, удучӀвну, дугъаз хулаз дих апӀуру.

²⁹ Хъа дугъу адашдиз жаваб вуди кӀуру: «Магьа швнуд йисан увуз гъуллугъ апӀури аза ва сабанра яв гаф ликрикк ккивундарза. Хъа уву узуз йиз дустарихъди шадвал апӀуз мегьел саб мудуркьан тувундарва.

³⁰ Хъа чан пай улдугнайидарихъди дипӀну, яв гьамуну бай гъафиган, уву дугъаз дюбхнайи кӀари гъубккунва».

³¹ Адашди дугъаз кӀуру: «Я жан бай! Уву гьарган узухъди хъава ва вари йизуб явуб ву,

³² хъа яв му чве дукӀну айи ва чӀиви гъахьну, дудургну айи, гъидихъну, ва гьаддиин шад хьуб ва гешт хъапӀуб лазим вуйи».