Лука 12 - Гирами Китаб

Кьюб маш гъяйи фарисйирикан

¹ Му арайиъ, агъзрариинди халкь уч духьну, сари-сар хъуржуз хъюгъиган, Исайи сифте Чан ученикариз кӀуру: – Ихтият йихьай фарисйирин дунихьан. Думу кьюб маш гъяйивал ву.

² Учв ачухъ даршлу гьич саб гьитӀибкӀуб адар ва ашкар даршлу гьич саб жиниб адар.

³ Гьаддиз учву мучӀушнаъ гъапиб аквнахь ебхьиди ва хулан айитӀ ибахъна гъапиб гъваълан атӀабгну пиди.

⁴ Учвуз, Йиз дустариз, кӀураза: беден йибкӀрударихьан гучӀ мапӀанай, фицики дурарихьан сарун артухъ фукӀа апӀуз шулдар.

⁵ Хъа шлихьан гучӀ дапӀну ккундуш, кӀурзачвуз: гъачӀиган, жегьеннемдиъ Итрурихьан гучӀ апӀинай. Ав, кӀуразачвузки, Гьадгъухьан гучӀ апӀури йихьай.

⁶ Кьюб кепкихъ хьуб гъуланжакьв масу тувдаринхъа? Гьадрарикан сабкьан Аллагьди кӀваълан гьаънадар.

⁷ Ичв кӀулʼин али чӀарарра кмиди Дугъу гьисаб дапӀна. Гьаци вуйиган, гучӀ мапӀанай: гизаф гъуланжакьвартӀан учву заан вучва.

Исайи аьгъювалар улупура

⁸ КӀуразачвузки, адмйирин улихь Узу кьабул гъапӀу гьарсар кас Инсаниятдин Бали Аллагьдин малайикарин улихь кьабул апӀиди.

⁹ Хъа шли адмйирин улихь Узу кьабул дарапӀиш, думу Аллагьдин малайикарин улихь кьабул апӀидарза.

¹⁰ Инсаниятдин Бализ къаршу гаф гъапиш, дугълан хил алдабгъиди, хъа шли Аллагьдин Рюгьнакан чӀуру гаф гъапиш, дугълан хил алдабгъидар.

¹¹ Хъа учву мистариз гьякимаринна гьюкумдрарин улихьна хъади гъахи вахтна, фици ва фициб жаваб тувруш, вая фу кӀуруш, дидин гъайгъушнаъ махьанай.

¹² Аллагьдин Рюгьну, учву фу дупну ккундуш, учвуз гьадму гьялатнаъ аьгъю апӀиди.

Тямягькрар махьанай

¹³ Халкьдин кьялгъян сари Дугъаз гъапи: – Я Мялим! Йиз чвуччвуз, адашдилан учуз гъурубкьу ирс узухъди пай апӀин, йипа.

¹⁴ Исайи гьадму касдиз гъапи: – Ичв диван апӀуз вая пай апӀуз Узу шли дерккну?

¹⁵ Мидихъди сабси Дугъу дурариз гъапи: – Лигай гьа, тямягькрар махьанай, фицики инсандин уьмур дугъан девлетналан асиллу дар.

Нефс кур девлетлуйикан тахалус

¹⁶ Хъа Исайи дурариз тахалус ктибтуру: – Сар девлетлу касдин хутӀлиъ ужуб бегьер битмиш дубхьнади шулу.

¹⁷ Дугъу чав-чакди гьамци фикир апӀуру: «Узу гьапӀру? Узуз йиз ризкьар ахьрушв адарзуз, аьхир.

¹⁸ Гьамци апӀидиза: йиз амбарханйир дарагъну, аьхюдар дивдиза ва гьадина вари йиз рузи ва вари йиз девлет уч апӀидиза.

¹⁹ Хъа йиз кӀваз пидиза: эй йиз юкӀв, увуз гизаф йисариз аьхючӀвеъ девлет уч дапӀназа: архаин йибхь, ипӀин, убхъ, шад йибхь».

²⁰ Хъа Аллагьди дугъаз кӀуру: «Эй ахмакь! Ахъли яв юкӀв увхьан гъадабгъиди: уву гьязур гъапӀуб шлиз ккабхъдийкӀан?»

²¹ Шли чаз девлетар уч апӀураш, гьадгъаз гьаци хьибди. Думу Аллагьдин улихь девлетлу шулдар.

Гъян хурагтӀан, жан палаттӀан заан ву

²² Чан ученикариз Исайи гъапи: – Гьаддиз учвуз кӀуразаки, ичв гъян бадали фу ипӀуруш ва ичв жан бадали фу алабхьуруш, гьаддин гъайгъушнаъ махьанай.

²³ Фицики гъян хурагтӀан, хъа жан палаттӀан заан ву.

Фана дюнʼяйин гъайгъушнар ва фтин гъаннаъ духьну ккундуш

²⁴ Къяркърариз лигай: дурари я убзури, я ккадабцӀури шулдар, дурариз я хулар, я амбарханйир адар. Аллагьди дурариз ипӀруб тувра. Хъа учву ничхрартӀан хайлин артухъ дарнучвахъа?

²⁵ Учвкан сарихьанра, жвуван гъайгъу зигури, гьич саб хъуршлииндикьана жан ягъал апӀуз шулин?

²⁶ Гьаци вуйиган, эгер учвхьан лап цӀиб вуйибра апӀуз удукьурдаш, имбунубдин гьякьнаан фу гъайгъу зигидичвахъа?

²⁷ Лизи кюкйир фици аьхю шулаш, лигай: дурари я зегьмет зигурадар, я парча убхурадар. Хъа, кӀуразачвуз, Сулейман паччагьди чан лап ад айи вахтнара дурарихъ гьарсабдихъ хъайисдар палтар алахьури гъахьундар.

²⁸ Эгер гъи чюлиъ ади, закур цӀигъ убгурайи укӀ Аллагьди гьаци уччвуди балгурайиган, Дугъу учвʼин дицитӀан уччвуди палат алабхьидаринхъа, цӀибтӀан хътругърудар!

²⁹ Гьаци вуйиган, учву ипӀрубдихъна убхърубдихъ милицанай ва инжик махьанай.

³⁰ Гьаз гъапиш вари гьамрар му дюнʼяйин аллагьсузари агури шулу; хъа ичв Адашдиз учвузра дурар лазим вуйиб аьгъя.

³¹ Аллагьдин Паччагьлугъ абгури йихьай. Гьаци гъапӀиш, имбуб вари Дугъу тувдичвуз.

³² ГучӀ мапӀанай, бицӀи лиж! Фицики ичв Адашди учвуз Чан Паччагьлугъ тувуз ужуб кьаст дапӀна.

³³ Ичв мулкар масу туври, садакьади пай апӀинай. Жвуваз аьршариъ угъри удручӀвру, йирси даршлу ужагъ, камк ктрабхьру ва хътӀатӀабццру хазна гьязур апӀинай.

³⁴ Фицики, ичв девлет наан аш, ичв юкӀвра гьадушваъ хьибди.

Гъуллугъчийин уягъвал

³⁵ Гьарсабдиз гьязур вуди йихьай: юкьʼан чӀулар идитӀну ишри ва чирагъар кархьну ишри.

³⁶ Агъа сумчриан дуфну, хъумп гъапӀубси, дугъаз раккнар арццуз ккилигурайи гъуллугъчйириз ухшар хьидичва.

³⁷ Агъайиз, хулаз хътакиган, даахнадарди гъяркъю лукӀар хушбахтаврар ву; гьякьди кӀуразачвузки, дугъу, чан юкьʼан идибтӀну, дурар дитди ва, гьарурихьна гъюри, чавра дурариз гъуллугъ апӀиди.

³⁸ Ва думу гьацӀишваринган гъафишра, гьириккна гъафишра, гьязур гьялнаъ гъидихъу лукӀар хушбахтаврар ву.

³⁹ Учвуз аьгъю йибхьайки, хулан эйсийиз угъри гъюру вахт аьгъяш, думу чан хулаъ учӀвуз гъитдар.

⁴⁰ Учвура гьязурди гъузай, фицики учву ккилигури адру сяаьтна Инсаниятдин Бай гъиди.

⁴¹ Гьадмуган Петри Дугъхьан гьерху: – Я Агъа! Му тахалус учуз кӀурана, даршиш вардариз?

⁴² Агъайи кӀуруки: – Вафалу ва аькьюллу гъуллугъчи фуж ву? Агъайи чан лукӀариз вахтниинди хураг пай апӀбан бадали аьхюрди дерккур.

⁴³ Хулаз гъафи агъайиз ляхин апӀури гъяркъю гъуллугъчи бахтавар ву.

⁴⁴ Гьякь кӀуразачвузки, агъайи думу чан вари хал-йишван аьхюрди дерккди.

⁴⁵ Эгерки гъуллугъчийи чан кӀваан: «Йиз агъа багаригьди гъидар» пну, гъаравшариз йивуз, ипӀуз-убхъуз ва пиянвалар апӀуз хъюгъиш,

⁴⁶ агъа, думу ккилигури адру йигъан ва мялум дару сяаьтна хъуркьди ва думу гъуллугъчи кьюб швур апӀиди: дугъкан чаз мютӀюгъсузариз апӀруб апӀиди.

Чаз гизаф тувнайи гьарсарикан ккунра гизаф апӀиди

⁴⁷ Чаз агъайин кьаст аьгъяди, дугъу гъаписи дарапӀу лукӀ гизаф урччвиди.

⁴⁸ Хъа чаз аьгъдарди жазайиз лайикьлу ляхин гъапӀур цӀибди урччвиди. Гизаф тувнайи гьарсарикан ккунра гизаф апӀиди, ва шлин ихтиярнаъ гизаф ивнаш, гьадгъахьди йишвʼинара гизаф хуз гъитди.

«Узу инсанар жара апӀуз Гъафир вуза»

⁴⁹ Узу жилʼина цӀа кчӀибгуз Гъафир вуза ва гьаци ккунди азузки, думу сарун гьамустӀанра кабхъну!

⁵⁰ Узу аьзабарикк ккуркьну ккунду ва гьаму кӀулиз удубчӀвайиз инжик вуза!

⁵¹ Узу жилиина мясляаьт тувуз дуфна кӀури, фикир апӀуранчва? Ваъ, кӀуразачвуз. Узу сар-сарихьан жара апӀуз дуфнайир вуза.

⁵² Фицики гьамусдихъантина саб хулаъ айи хьур кас жара хьуз хъюгъди, шубур кьюриз къаршу ва кьюр шубуриз къаршу вуди;

⁵³ адаш бализ, бай адашдиз къаршу хьиди, дада шураз, риш дадайиз къаршу хьиди; сижарбаб швушваз, швушв сижарбабаз къаршу хьиди.

Деврин буйругъар

⁵⁴ Халкьдизра Исайи гъапи: – Ригъалабхъру терефнахъан гъюрайи диф гъябкъиган, дишлади: «мархь убгъиди» кӀурчва, ва гьаци шулу.

⁵⁵ Кьиблайин микӀ хъивиган, «гизаф мани хьибди» кӀурчва, ва гьацира шулу.

⁵⁶ Эй кьюб маш гъяйидар! Учву, жилин ва завун лишнари фу улупураш, гъудубгъунчва, хъа му вахтарин лишнарин мяна гьаз аьгъю шуладарчвуз?

⁵⁷ Гьаз учвхьан жвуван фикриинди, фу дапӀну ккундуш, аьгъю апӀуз шуладарчвухьан?

⁵⁸ Уву яв гьюжаткрихъди аьхюрихьна гъягъяйиз, рякъюъ имиди дугъахъди мясляаьт апӀуз чалишмиш йихь. Гьаци даршиш, дугъу уву суддиз гъахиди, судди уву жаллатӀрихьна тувди, хъа жаллатӀри уву дустагъдиъ итди.

⁵⁹ Хъа кӀуразавуз: аьхиримжи кепкиина гъяйиз, яв вари бурж ктипайизкьан, душвʼан удучӀвидарва.