Лука 11 - Гирами Китаб

Исайи ученикариз ккарагуз улупуб

¹ Сабан Иса саб йишваъ ккарагурайи. Ккарагбахъан, Дугъан ученикарикан сари Дугъаз гъапну: – Агъа! Ягьʼяйи чан ученикариз ккарагуз фици улупнуш, учузра ккарагуз улупа.

² Дугъу дурариз гъапи: – Ккарагруган, йипай: Я ич Адаш! Яв ччвур гирами ибшри; Яв Паччагьлугъ улубкьри;

³ Гьарсаб йигъаз учуз лазим вуйи уьл ча;

⁴ Ич гунгьариланра хил алдабгъ, учура гьарсар учуз буржлурилан хил алдабгъури шулча; хъа учу тямягьариъ мааан.

Ча кӀуруриз тувди, абгруриз бихъиди, раккник кучруриз абццди

⁵ Хъана Исайи дурариз кӀуру: – Пухьаки, учвкан сари, чаз дуст ади, гьацӀишваринган дугъахьна дуфну, дугъаз кӀуру: «Я дуст! Узуз шубуб уьл буржназ ча,

⁶ рякъюъ айи йиз сар дуст хулаз дуфнайиз, ва узуз дугъаз гьивуз ужуб фукӀа адарзуз».

⁷ Хъа дугъу хулан айтӀан увуз жаваб тувди: «Узу бизар мапӀан, раккнар сарун хъяркьназа ва йиз баярра узухъди ахникк дахьна; узхьан гъудужвну, увуз уьлер тувуз шулдарзухьан».

⁸ Хъана кӀарзачвуз, дугъу увуз ичв дуствалин гьюрматнаан уьл тутрувишра, хъа эгер чахъан уву тувайизкьан хътадакруб аьгъю гъабхьиш, гъудужвну, ккун гъапӀу кьадар уьлер тувдивуз.

⁹ Узу кӀуразачвуз: ча йипай – тувдичвуз; абгай – бихъидичвуз; раккник кучай – абццдичвуз.

¹⁰ Гьарсар ча кӀурайириз тувди; абгурайириз бихъиди; кучрайириз абццди.

¹¹ Уву фицир адаш вува, бали балугъ ча гъапиган, дугъаз балугъин ерина битӀ туврур?

¹² Ясана, мурта ча гъапиган, дугъаз аькьраб туврур?

¹³ Гьаци вуйиган, учву пис адмийир вушра, ичв веледариз ужуб тувуз удукьруган, аьршариин али Адашдихьан, хъанара ужуди, Чахьан ча кӀурудариз Аллагьдин Рюгь тувуз хьибди.

Иса ва Велзевул

¹⁴ Саб ражари Исайи чӀал дибиснайирикан жин ктапӀу ва думу улхуз хъюгъю, халкьра мидʼин мюгьтал гъахьи.

¹⁵ Дурарикан бязидари кӀури гъахьну: – Дугъу жинар жинарин аьхюр Велзевулин кьувватниинди ктаура.

¹⁶ Хъа тмундари, Иса ахтармиш апӀури, Дугъкан аьршариан саб аьламатнан лишан ккун апӀури гъахьну.

¹⁷ Хъа Дугъу, дурарин ниятар аьгъяди, кӀуру: – Чан айитӀ душманвал ади, пай гъабши гьарсаб паччагьлугъ ичӀи шул ва душманвал ади жара гъабши хизанра ккадабхъур.

¹⁸ Эгерки иблисра чан айитӀ чахъди дявдиъ гъабшиш, дидин паччагьлугъ фици сагъди гъубздихъа? Хъа учву, Узу Велзевулин кьувватну жинар ктаура, кӀурачва.

¹⁹ Эгер Узу Велзевулин кьувватну жинар ктаураш, хъа ичв терефкрари дурар шлин кьувватну ктаура? Гьаддиз дурар учвуз диванчйир ишри.

²⁰ Эгерки Узу жинар Аллагьдихьан гъюрайи кьувватну ктаураш, икибаштӀан, учвуз Аллагьдин Паччагьлугъ хъубкьна.

²¹ Кьувватлури, хилиъ яракь ади, чан хал уьбхюрайиган, дугъан мутмуйиз хатӀавал адар.

²² Хъа дугъʼина думутӀанра гужлир алархьиган ва дугъʼин гъалиб гъашиган, гьадмуган дугъан, учв уьрхюрза кӀури миж кайи вари яракьра чаз гъадабгъиди ва тадабгъубра пай апӀиди.

²³ Фуж Узухъди дарш, гьадму Узуз къаршу ву ва, шли Узухъди уч апӀурадарш, гьадгъу зяя апӀура.

Жин хъадабкну гъюваликан

²⁴ Чиркин рюгь, инсандиан удубчӀвиган, шид адрушвариъ либцури, чаз архайинвал абгури шулу, дибрихъиган, кӀуру: «Узу утӀубкку йиз хулаз хътабкидиза».

²⁵ Хътабкубдиз хал ичӀибкнади ва марцц дапӀнади рябкъюру.

²⁶ Гьадмуган диди, дубшну, хъана ургубсан жин хуру, дурар дугъаъ учӀвну яшамиш шулу, ва думу касдиз улихьдитӀан гьамус артухъ пис шулу.

Гьякьикьи бахтаварвал

²⁷ Исайи гьамци кӀурайиган, сар дишагьлийи халкьдигъян яманди Дугъаз кӀуру: – Уву дюнʼяйиз гъахи ва аьхю гъапӀу дишагьли хушбахтавар ву!

²⁸ Хъа Исайи дугъаз кӀуру: – Аллагьдин гаф ебхьурайидар ва тамам апӀрудар хъана артухъ хушбахтаврар ву!

Завариан вуйи аьламатарикан Исайи аьгъювалар улупура

²⁹ Хъа халкь гизаф уч гъашиган, Исайи пуз хъюгъру: – Му хътругъру насил ву; дурар заварин аьламатариз ккилигура, хъа Юнусдин аьламатналан гъайри дурариз жара аьламат рябкъидар.

³⁰ Юнус Ниневияйин агьалйириз фици аьламат вуди гъахьнуш, гьаци Инсаниятдин Байра му наслиз аьламат вуди хьиди.

³¹ Гъиямат йигъан суд апӀру вахтна кьиблайин паччагь-ханум гьамусдин адмийириз къаршу гъудужвну, дурар тахсиркар апӀиди, фицики думу дюнʼяйин тму кӀулиан Сулеймандин фагьумлувалихъ хъпехъуз гъафнийи; хъа магьа мушвахь СулеймантӀан зурба Вуйир хьа.

³² Гъиямат йигъан Ниневияйин агьалйир му наслин адмийирин дивандиз дуфну, дурарин тахсрар ачухъ апӀиди, фицики Юнусди улупу аьгъювалариинди дурари чпин гунгьар гардандиъ гъидисну. Хъа магьа мушвахь ЮнустӀан аьхюр Вуйир хьа!

Бедендин чирагъ

³³ Сарира, чирагъ кабхьну, жини йишвахь дивдар, я дидʼин гъаб иливдар, хъа, хулаъ учӀврайидариз акв шлуси, чан йишвʼин дивру.

³⁴ Бедендин чирагъ ул ву, гьаци вуйиган, эгер яв ул марцциди вуш, яв вари беденра акуди хьибди. Хъа эгер яв ул чӀуруб вуш, яв беденра мучӀуб хьибди.

³⁵ Гьаци вуйиган, лиг гьа: увуъ айи акв мучӀушин вуди дарибшри!

³⁶ Эгер яв беден вари акуб вуш ва дидик сабкьан мучӀу пай ктарш, вари гьаци аку хьибдики, хиял апӀин, чирагъди уву чан нурниинди аку дапӀна.

Исайи фарисйирикна къанунчйирик тахсрар кирчра

³⁷ Исайи гьаци кӀурайиган, сар фарисейи Дугъаз чан хулаз лисундин хураг ипӀуз теклиф апӀуру. Иса, дугъахьна дуфну, гъюн йивну, дахъру.

³⁸ Фарисей, Исайи, уьл ипӀайиз, чан хилар дижрикӀиган, мюгьтал шулу.

³⁹ Агъайи дугъаз кӀуру: – Учву, фарисйири, ичв рюкьчарин чӀатан тереф марцц апӀури шулчва, хъа ичв айитӀишв угърашʼвалихьдина аьмалдарвалихьди абцӀну шуличв.

⁴⁰ Эй фагьумсузар! ЧӀатан тереф яратмиш ГъапӀури айитӀишвра яратмиш гъапӀундаринхъа?

⁴¹ Ужуб гьадму вуки, учвуз айибдикан садакьа тувай, гьадмуган ичв вари ляхнар марццидар хьиди.

⁴² Ичв пис гьял хьибди, фарисйир, фицики учву шюшеукӀарилан, кӀашнишарилан ва миди вуйи мейвйирилан йицӀубдик саб пай туврачва, хъа гьякьлувалин ва Аллагьдин масанвалин гъайгъушнаъ адарчва. Учву гьамунубси, тмунубра дапӀну ккунду.

⁴³ Ичв пис гьял хьибди, фарисйир, фицики учву жугьдарин мистариъ гьюрматлу йишвар дисуз ва мажлисариъ жвуван тярифар ерхьуз ккунидар вучва.

⁴⁴ Ичв пис гьял хьибди, фицики учву, чпин зиълан инсанар лицури ва мидкан чпиз хабар адру, жиликк ккайи накьварсдар вучва.

Къанунчйирихъди сюгьбат

⁴⁵ Мидиз жаваб вуди къанунчйирикан сари Дугъаз гъапи: – Мялим! Гьамци кӀури, уву учузра гиран ктапӀурава.

⁴⁶ Хъа Исайи кӀуру: – Учвухъра, къанунчйир, бала хъабхъди, фицики инсанариин гъахуз даршлу гъагъар илирчурачва, хъа дурар гъахбан бадали, учву ичв саб тӀубкьан кучрадарчва.

⁴⁷ Пис гьял хьибди ичв, фицики учву, ичв абйири гъийиху пайгъамбрариз гюмбтар диврачва.

⁴⁸ Гьамдиинди ичв абйири гъапӀу чӀуру ляхнарин гьякьнаан шагьидвал апӀурачва ва дурарихъди рази шулачва, фицики гьадрари пайгъамбрар гъийихну. Хъа учву дурариз гюмбтар диврачва.

⁴⁹ Гьаддиз Аллагьдин аьяндарвалиинди гьамци кӀура: «Дурарихьна пайгъамбрарна вакилар гьаъдиза, хъа дурарикан садар йивну йихиди, хъа тмундар утӀурккиди».

⁵⁰ Ва гьаму насликан дюнʼя яратмиш гъапӀхъамина гъийиху вари пайгъамбрарин удубзу ифи кадабгъри.

⁵¹ Авелин ифдилан гъадабгъну, Аллагьдин хулаъ айи гъурбан гъапӀдар урккру йишванна Гирами йишван арайиъ удубзу, Закарʼяйин ифдиина гъяйизкьан, кадабгъри. Ав, кӀуразачвуз, гьаму насликан ктабгъиди.

⁵² Пис гьял хьибди ичв, къанунчйир, фицики учву аьгъюваларин ачар бисуз дибисначва, амма я учву учӀвундарчва, ясана учӀврудар гъитрадарчва.

⁵³ Иса гьудучӀвурайиган, къанунчйирна фарисйир Исайиз, хъючӀюркьну, багахь шуз хъюгъру. Дугъкан чпин аьхючӀвеъ суалариз жаваб тувуб ккун апӀури,

⁵⁴ дурариз, Исайи туву жавабариъ Дугъак тахсир кипуз шлу гафар агуз ният ади гъабхьну.