Лука 10 - Гирами Китаб

Исайи чан улихьди шагьрар-гъулариз ургцӀурна кьюр ученик гьаъру

¹ Мидхъан Исайи ургцӀурна кьюр жара ученикарра ктагъну ва кью-кьюрди, Чан улихьди, Учв гъягъюз ккайи гьарсаб шагьриз вая гъулаз гьаъру.

² Дурариз гьамци кӀуру: – Иган гизаф а, хъа убгрудар цӀиб; гьаддиз игнин Агъайиз, Чан игниз убгрудар гьаъ кӀури, ккарагай.

³ Гъарахай! Узу учву жанавраригъна агълижарси гьаъразачву.

⁴ Жвувахьди я пул, я тавра, я шаламар магъадагъанай ва саризра рякъюъ салам мутуванай.

⁵ Фуну хулаъ учӀвишра, сифте: «Му хулаз мясляаьт ибшри!» йипай.

⁶ Ва эгер гьадму хулаъ мясляаьтчи кас аш, дугъаз учвухъди мясляаьт хьибди, хъа нагагь адарш, мясляаьт учвухьна кьяляхъ гъибди.

⁷ Дергу хулаъ гъузай, дурариз айибдикан ипӀинай-убхъай, фицики лихруриз чан гьякъи лайикь ву. Хулʼан хулаз удучӀвури махьанай.

⁸ Фунуб вушра шагьриз гъафиш ва учву кьабул гъапӀиш, учвуз гьивуб ипӀинай.

⁹ Душваъ айи аьзарлуйир сагъ апӀинай ва дурариз: «Учвухьна Аллагьдин Паччагьлугъ багахь дубхьна», йипай.

¹⁰ Эгерки саб шагьриз дуфну, учву кьабул дарапӀиш, кючейиз удучӀвну йипай:

¹¹ «Ичв шагьриъ учук кабсу биширугра ичв ликариина ктӀубччвурача, хъа аьгъю йибхьайки, учвухьна Аллагьдин Паччагьлугъ багахь дубхьна».

¹² Узу учвуз кӀуразаки, гъиямат йигъан Содомдиз гьадму шагьризтӀан ужу хьибди.

Тахсрар гардандиъ дидрисру Галилей уьлкейин шагьрарин гьял пис хьибди

¹³ Гьял пис хьибдияв, Хоразин! Гьял пис хьибдияв, Вифсайда! Учвуз Узу улупу гьяйбатар Тириз ва Сайдайиз гъяркънийиш, дурарин агьалйири ухдитӀан, чпихъ яснан палтар ва кӀулʼин рюкъ алди деъну, тахсрар чпин гардандиъ дисидийи.

¹⁴ Гьаци вушра, суд апӀруган, учвузтӀан Тиризна Сайдайиз рягьятди хьибди.

¹⁵ Хъа увура, Кафернагьум, аьршаризкьан за хьибдиза кӀурайна? Ваъ, гурбагуриъ абхъдиву!

¹⁶ Учвухъ хъпехъурайир Узухъ хъпехъура, ва учвхьан маш гьадабгъурайири Узхьан маш гьадабгъура. Хъа Узхьан маш гьадабгъурайири Узу му дюнʼяйиз Гьаурихьан маш гьадабгъура.

УргцӀурна кьюр шадди хъадакну гъафи

¹⁷ Исайи гьаънайи ургцӀурна кьюр ученикди, шадди кьяляхъ хъадакну, кӀуру: – Агъа! Яв ччвурнахъди учуз жинарра кимиди мютӀюгъ шуйи.

¹⁸ Исайи дурариз гъапи: – Узуз завʼан кьюркьлин цӀаси абхъу иблис гъябкъюнзуз.

¹⁹ БитӀариин, аькьрабариин ва вари душманвалин кьувватариин алархьуз Узу гьюкум тувразачвуз ва учвуз фтикӀа зарар тувидар.

²⁰ Аммаки жинар учвуз мютӀюгъ шула кӀури, мидʼин шад махьанай; хъа гьаддиин шад йихьайки, ичв ччвурар сарун аьршарик дидикӀна.

Исайин шадвал

²¹ Гьадму сяаьтна Иса Аллагьдин Рюгьналан шадвали ацӀру ва кӀуру: – Адаш, заваринна жиларин Агъа! Аьяндрарихьанна аькьюллударихьан гьитӀибкӀнайиб бицӀи касариз ачухъ апӀбаз Увуз чухсагъул! Ав, Адаш, Увуз думу Яв ужувлан ният гьаци дубхьну ккундувуз.

²² Йиз Адашди вари тувунзуз. Бай фуж вуш, АдашдизтӀан гъайри саризра аьгъдар, Адаш фуж вуш, БализтӀан гъайри саризра аьгъдар. Ва Бали Адаш шлиз ачмиш гъапӀиш, гьадгъаз аьгъю хьибди.

²³ Анжагъ ученикариз вуди, Исайи дурарихьинди илдицну кӀуру: – Учвуз рябкъюрайиб рябкъюрайи улар хушбахтаврар ву!

²⁴ Фицики кӀуразачвуз: гизаф пайгъамбраризна паччгьариз учвуз рябкъюрайиб рябкъюз ккундийи, хъа гъябкъюндар, учвуз ебхьурайиб ебхьуз ккундийи, хъа гъеебхьундар.

Багахь хьайир фуж ву

²⁵ Магьа сар къанунчийи гъудужвну, Иса ахтармиш апӀури, гьерхру: – Мялим! КкудудубкӀру уьмур рубкьуз узу гьапӀну ккунду?

²⁶ Исайи дугъхьан гьерхру: – Къанундиъ фу дибикӀна? Дидиъ фу урхури шулва?

²⁷ Дугъу гъапи: – Яв Агъа Аллагь, вари юкӀв хъипну, вари рюгьнаан, вари кьувватнаан, вари фагьмиан ккун апӀин ва яв багахь хьайир жвуваз жвувси ккун апӀин.

²⁸ Исайи дугъаз кӀуру: – Дюзди жаваб тувунва; гьаци апӀин ва яшамиш хьидива.

²⁹ Хъа дугъу, учв дюз алауз ккунди, Исайиз кӀуру: – Хъа йиз багахь хьайир фуж ву?

³⁰ Мидиз Исайи гъапи: – Сар кас Ерусалимдиан Ерихондиз гъягъюри гъахьну ва, гъачгъарин хилиъ ахъру, дурар, дугъан палтар илдитну, думу дурччвну, йикӀру гьялнаъ итну, гьудучӀвну гъягъюру.

³¹ Чан ляхин ади, гьадму рякъюъди сар малла гъягъюри гъахьну ва, гьадму кас гъяркънушра, гьудучӀвну гъушну.

³² Гьаци Левитра, гьадушвхьантина, дидригъди, гьудучӀвну гъягъюру.

³³ Самария уьлкейиан вуйи сар кас, гьадлинтина даждиинди гъягъюрайир, дугъʼин алахъуру ва, дугъаз думу дяркъну, дугъан язухъ шулу.

³⁴ Хъасин багахьна дуфну, ччимна чяхир улубзури, дугъан зийнар илитӀну, чан даждиин илитну, хялар дергрушваз духну, дугъан гъайгъу гъизигну.

³⁵ Хъайигъан гъягъюрайири, хялар дергрушван эйсийихьна кьюб динар пул тувну, дугъаз кӀуру: «Мугъан гъайгъу зиг, хъа пул артухъди харж гъабхьиш, хъадакну гъюрури туварзаяв».

³⁶ Гьаму шубур касдикан гъачгъарин хилиъ ахъуриз вартӀан багахь гъашир фуж ву кӀури, фикир апӀурава?

³⁷ Къанунчийи: – Гьелбетда, дугъаз ужʼвал гъапӀур, – гъапи. Исайи: – Гъарах ва увура гьаци апӀури йихь, – кӀуру.

Марфайин хулаъ

³⁸ Сабан Чан ученикарихъди рякъюъ айи Иса саб гъулаз гъюру; мушваъ сар Марфа кӀуру дишагьлийи Думу чан хулаъ кьабул апӀуру.

³⁹ Дугъаз Марʼям кӀуру чи айи; думу, Исайин ликарихъ деъну, Дугъан гафарихъ хъпехъури гъахьну.

⁴⁰ Марфайи, ужуб хураг апӀбан гъайгъушнаъ ади, Исайин багахьна дуфну гъапи: – Я Агъа! Йиз чуччу узу сарди гъитну Увуз вижна ктарнуз? Узуз кюмек апӀин йипа дугъаз.

⁴¹ Исайи дугъаз жаваб вуди гъапи: – Гьей Марфа, Марфа! Уву гизаф ляхнарин гъайгъушнаъ ади гъяжяргъюрава.

⁴² Хъа лазим вуйиб анжагъ саб ву. Хъа Марʼямди сарихьанра тадабгъуз даршлу ужувлан пай кадабгъна.