Коринф-2 2 - Гирами Китаб

Павелин насигьятар

¹ Гьаддиз, учву пашман апӀуз кӀури, сарун учвухьна дарфуз, кьаст гъапӀунза.

² Эгер узу учву пашман гъапӀиш, узлан пашман гъахьири узу шад дарапӀди, сарун шли апӀиди?

³ Узу гьатмунуб кагъаз, учвухьна гъафиган узу рази ктауз ккайидарилантина пашман дархьуз, гъибикӀнийза. Йиз шадвал – ихь вардин шадвал вуйивалик саб шак кадариз.

⁴ Учвуз думу кагъаз нивгъар рузури, юкӀв гъагъиди, кӀваъ дерд ади гъибикӀнийза. Йиз метлеб учву пашман апӀуб дайиз, хъа узуз учву фукьан масанди вуш, учвуз аьгъю хьпан бадали, гъибикӀнийза.

⁵ Узу пашман гъапӀури, неинки узу, хъа, сацӀиб вушра (му йиз заанвал дариз), учву вари пашман гъапӀну.

⁶ Сарун дугъаз гизафдарихьан гъурубкьу жаза чӀяаьн ву.

⁷ Хъа гьамус, хил алдабгъну, думу ккарцай, дердну ккагъуз мигъитанай.

⁸ Миннат вуйиз, дугъаз ичв масанвал улупай.

⁹ Гьацира узу думу учвуз, варибдиъ учву хъпехъури шулуш, ахтармиш апӀури, гъибикӀуб вуйиз.

¹⁰ Учву хил алдабгъурилан узура алдабгъидиза. Хъа узу хил алдабгъурилан, эгер думу касдиз хил алдабгъуз ужуб фукӀа аш, Месигьдин улихь учву бадали алдабгъуб вуйиз,

¹¹ иблисди ухьу алдатмиш апӀуз гъидритузди, хъа дидин ниятар ухьуз ужуйи аьгъяхьуз.

¹² Узу Троадайиз Месигьдикан Ужувлан хабар рабгъури гъафиган, Агъайи душваъ ляхин апӀуз раккнар арццунзуз.

¹³ Аммаки узхьан архаинди гъузуз гъабхьундарзухьан, фицики душваъ хъугъвалиъ йиз гъардаш вуйи Тит адарди гъахьну. Магьа гьаддиз Троадайиъ хъугърудариз баркаллагь дупну, Македонияйиз гъушунза.

¹⁴ Учу, Месигьдиъ саб духьнайидар, хъуркьувалиинди гьаммишан улихь гъахурайи ва варишвариъ учлантина ширин ниар адаурайи аьгъювалар Дугъкан рагъурайи Аллагьдиз чухсагъул.

¹⁵ Гьаз гъапиш, уьрхювалин ва аьжалин рякъюъди гъярайидарин арайиъ, Месигьди Аллагьдиз ургурайи гьадму ширин ниар, ари учу вуча.

¹⁶ ГьацӀариз учу – аьжал хурайи, хъа гьацӀариз – чӀививал хурайи ширин ниар вуча. Гьаци ляхин шлихьан апӀуз шул?!

¹⁷ Учу, гизафдарси, хайир бадали, Аллагьдин Гафнак камк кипрадарча. Месигьдихъди саб гъахьихъанмина, учу, Аллагьди гьаънайидари, Аллагьдин улихь марцци кӀваан, ктибтурача.