Коринф-1 9 - Гирами Китаб

Павелра имбуну вакиларсир ву

¹ Узу азад адми дарин дарш? Узу Месигьдин вакил дарин дарш? Ихь Агъа Иса узуз гъяркъюндарин дарш? Учву Агъайихъди саб хьувал – йиз гъуллугънан ляхин дарин дарш?

² Жарадариз узу вакил гьисаб даршра, учвуз узу – Месигьдин вакил вуза! Месигьдихъди учву саб хьували узу вакилвалин гъуллугънаъ айиб тасдикь апӀура.

³ Узук тахсир кипрудариз йиз жаваб магьа гьамциб хьибди.

⁴ ИпӀрубна ухрубдиз учуз ихтияр адарин дарш?

⁵ Хъугъру дишагьли учуз швушвди хуз ихтияр адарин дарш? Ва думу хпир, Месигьдин имбуну вакилариси, Агъайин чвйириси вая Кифайиси, жвувахъди гъярушваз гъадагъуз шулдарин дарш?

⁶ Ясана учуз ипӀуз уьл гъазанмиш апӀуб узузна ВарнавдизтӀан адабгънадарин?

⁷ Фунур эскри чан гъуллугънан харжар чан жибдиан ккеркру? Фунури, тӀумтӀин багъ ибтну, тӀумтӀар диритӀди гъитру? Фунур габни чан лижан хюнйириккан никк дурубхъур?

⁸ Му вари узу адмийин улариантӀан дилигди кӀурайинхъа? Къанундин китабдиъра гьаддикан кӀурадаринхъа?

⁹ Фицики, ухьуз Мусайиланмина тувнайи Къанундира кӀура: «Гад апӀурайи йицран ушв мяхъябкьян». Аллагь йицарин гъайгъушнаъ а кӀури, хиял вуничвхъа?

¹⁰ ИкибаштӀан, Дугъу мици ухьуз кӀура! Ухьуз дибикӀна: «ХутӀил хътабкрури хутӀил хътабкуру, ва гад апӀрури гад апӀуру, чпизра чпи апӀурайи ляхникан пай бадали».

¹¹ Учу ичв арайиъ рюгьнан тум дубзну, дидлан ккадабцӀру мутмуйиинди вуйи бегьерназ ккилигураш, учуз гизафуб ккун апӀурайин?

¹² Жарадариз учвхьан кюмек рубкьуз ихтияр айиган, учуз хъа аьхю ихтияр ачуз! Аммаки, учу сабанкьан учуз айи гьадму ихтияр ишлетмиш гъапӀундарча, хъа, Месигьдикан Ужувлан хабар рабгъуз машат дарибшри кӀури, учу вариб аьгь апӀурача.

¹³ Учвуз, Аллагьдин хулан гъуллугънаъ айидари уьл Аллагьдин хулкан ипӀурайибдин ва гъурбнар апӀрушвахь гъуллугънаъ айидариз гъурбан гъапӀубдикан саб пайназ ихтияр айибдин, хабар адарин дарш?

¹⁴ Гьаци Агъайира, Ужувлан хабар рабгъруриз ипӀруб гьаддилан дубхьну ккунду кӀури, амур гъапӀну.

¹⁵ Гьаму узуз айи ихтиярар гьич сабкьан узу ишлетмиш гъапӀундарза. Я гьамус, гьациб кюмек ккун апӀури, бикӀурайиб дариз. Йиз тяриф дубгайиз, узу йикӀуз гьязур вуза.

¹⁶ Узу Ужувлан хабар рабгъура кӀури, гьаз узу йиз тяриф апӀуза? Думу йиз буржи вуйиз. Эгер узу думу тамам дарапӀди гъибтиш, йиз язухъ ву!

¹⁷ Узу Ужувлан хабар йиз хушниинди рабгъураза. Йиз хушниинди дайиш, узу думу ляхин, йиз буржи вуди хьпаз дилигну, тамам апӀидийза. Хъа узу думу йиз хушниинди рабгъурайиган, пешкешра хьибдизуз.

¹⁸ Йиз пешкеш фтилан арайиз гъюра? Хъа гьамдилан: Ужувлан хабар узу кьимат дарди рабгъураза ва узуз улупнайи ихтиярар ишлетмиш апӀурадарза.

¹⁹ Гьеле узу азад адми вушра, узу йиз хушниинди, Аллагьдихьна шлубкьан гизаф адмийир хпан бадали, варидариз лукӀвал апӀури гъахьунза.

²⁰ Жугьдарихъди узу, дурар Агъайин терефназ хузди, жугьудси гъахьунза. Къанун тамам апӀурайи адмийирихъди, гьеле узу Къанундин хиликк ккайир даршра, дурар Агъайин терефназ хузди, узура Къанун тамам апӀурайирси гъахьунза.

²¹ Къанун адру адмийирихъди, гьеле узу Аллагьдин Къанундиккан азад даршра, гьаз гъапиш Месигьдин Къанундикк кказа, дурар Агъайин терефназ хузди, узура Къанун адрурси гъахьунза.

²² Зяифдариз узу, дурарра хузди, зяифурси гъахьунза. Варидиз узу, аьхирки гьадрарикан сакьюдаркьан уьрхбан бадали, варибди гъахьунза.

²³ Му вари узу, Ужувлан хабар бадали ва гьаддин ужувлакан узузра кубкӀузди, апӀураза.

²⁴ Жаргъбан талитнаъ гизафдар иштирак шулу, хъа гъалиб сартӀан даршлуб учвуз аьгъячвуз. Гьаддиз пешкеш рубкьруси жаргъай.

²⁵ Иштракчйири, вари чпин тямягьяр дирчну, чӀур дубхьну гъябгъру кунцӀ бадали, гьар йигъан гьязурлугъар гъахуру, хъа ухьу – чӀур даршлу кунцӀ бадали гьязур духьну ккундарин!

²⁶ Гьаддиз, саб метлеб адарди жаргъурайир дарза ва гьавайиз гъурдар йивурайир дарза!

²⁷ Ваъ, жарадариз Ужувлан хабарнакан ктибтруган, жвув тина дарапӀузди, узура йиз беден вердиш апӀураза, думу узуз мютӀюгъ апӀураза.