Коринф-1 8 - Гирами Китаб

Идолариз гъурбан гъапӀу хурагнакан

¹ Гьамус ичв суалназ Аллагьсузарин идолариз гъурбан дапӀнайи йиккʼкан пидиза. ИкибаштӀан, «ухьуз варидариз аьгъювалар айибдикан» хабар ахьуз, аммаки аьгъювалари фурс капӀру, хъа масанвали мюгькамвал хуру.

² Эгер шли аьгъювалар азуз кӀураш, дугъаз дугъридан чаз аьгъю дубхьну ккундайиб аьгъю дубхьнадар.

³ Хъа Аллагьдиз Учв ккунидар аьгъя.

⁴ Гьаци вуйиган, аллагьсузарин идолариз гъурбан гъапӀу хурагнакан пидихьа. Ухьуз варидариз, дюнʼяйи икрам апӀурайи идолар фукӀа даруб ва Сарилан гъайри гьич саб жюрейинра аллагь адруб, аьгъяхьуз.

⁵ Эгер гьацдар «аллагьар» ву кӀурайидар завариин, ясана жилариин алийишра (хъа дюнʼяйиъ «аллагьар» ва «агъйир» кӀурудар, дугъридан гизаф а),

⁶ аммаки ухьуз айир сар АллагьтӀан дархьуз – Адаш Аллагь. Ари Гьадгъу дюнʼяйиъ вариб ккебгъну, ва, Гьадгъаз кӀури, ухьу яшамишра шулахьа. Агъара сартӀан дар – Иса Месигь. Ари Гьадгъуинди дюнʼяйиъ вариб арайиз удубчӀвну, ва Гьадгъулантина ухьуз уьмурра гъабхьунхьуз.

⁷ Хъа мидкан варидариз хабар адар. Саспидар идоларихьна гьаци вердиш духьнаки, гъира кмиди дурари, гьациб хураг ипӀруган, идолариз икрам вуди дубхнайиб ву кӀура ва чпин зяиф намусну дурар чиркинди улупура.

⁸ Хурагнахьан ухьу Аллагьдихьна багахь апӀуз хьибдар. Ухьу дирипӀди гъузну пну, кам шулайиб адарихь, ипӀуру пну, фукӀа гъазанмишра апӀурадархьа.

⁹ Амма лигайки, ичв азадвал зяифдариз ликриккан ккибиргъру гъван дарибшри.

¹⁰ Фицики зяифуриз идоларин хулаъ уву, аьгъювалар айир, ипӀури гъяркъиш, дугъура идолиз гъурбан дапӀнайи хураг ипӀиди.

¹¹ Магьа гьаддиз, яв аьгъювалари зяиф гъардаш – дугъхъандира Месигьди жан тувну аьхир – пуч апӀиди.

¹² Гьамци гъардшариз къаршуди гунагь апӀури ва дурарин зяиф намусназ зиян туври, учву Месигьдиз къаршуди гунагь апӀурачва.

¹³ Гьаддиз, узу ипӀурайи хурагналантина йиз гъардаш алдакураш, думу гунгьихъна дархбан бадали, йикк дирипӀди гъузарза.