Коринф-1 6 - Гирами Китаб

Хъугърударин арайиъ айи гъярхьбарикан

¹ Хъана, учвхьан, ичв гьюжатар, Аллагьдин гирами халкьди гьял апӀуз гъидритди, хътругъру адмийирин судди гьял апӀри кӀури, гъитуз фици шулчвухьан?

² Аллагьдин гирами халкьди дюнʼяйин суд апӀруб аьгъданчвуз дарш? Учвʼин вари дюнʼяйин суд апӀувал алабхъруган, гьаму бицӀи гъярхьбар гьял апӀуз шуладанчвухьан дарш?

³ Малайикаринна кмиди ухьу суд апӀурахьа гьа. Дуланажагъдин аьдати ляхнаринкьан ухьхьан суд апӀуз шуладарин?

⁴ Гьамциб дюшюшназ ичв арайиан важиблу дару касар ичв судйирди ктагъурачва.

⁵ Нач дубхьну ккунду! Ичв арайиъ хъугърударин месэлйир гьял апӀуз шлу саркьан аькьюллу адми адарин?

⁶ Хъа учву гъардши гъардшилан суддиз аьрза туврачва, ва хътругърудари ичв суд апӀура!

⁷ Учву беябур хьуз, чиб-чпилан суддиз аьрза тувувал чӀяаьн ву! Гьаци апӀайиз, жвув гьякь вушра, асккан духьну гъузуб ужу даршулин? Жвувануб тувну гъузуб ужу даршулин?

⁸ Хъа учву ичв гъардшар асккан апӀурачва ва дураринуб бисурачва.

⁹ Учвуз чӀур гъахьи касариз Аллагьдин Паччагьлугъ ирсди дурубкьруваликан аьгъдарди анчвуз дарш? Лигай гьа, учву ичв учвуз кучӀлар апӀрубси дарибшри! Кьяппйириз, идолариз икрам апӀрудариз, дугъри дару жиларизна хпариз, жилир жилирихъди гъярудариз,

¹⁰ тӀафлариз, тямягькрариз, пиянисккйириз, футна дабгърудариз, кучӀляхяриз Аллагьдин Паччагьлугъ ирсди рубкьидар.

¹¹ Учвкан саб кьадар ари гьацдар вуйчва, аммаки ихь Аллагьдин Рюгьну ва Агъа Иса Месигьди ухьуз гъапӀубди учву марцц, гирами ва гьякь гъапӀунчву.

Гъит ичв жанар Агъайин гъуллугънаъ ишри

¹² Учву кӀурачва: «Узуз вари апӀуз ихтияр азуз!» Аммаки вариб хайирназ дар! «Узуз вари апӀуз ихтияр азуз», хъа гьич сабдира йиз зиин агъавал апӀуз гъитну ккундар!

¹³ Учву гьацира, «ипӀруб – фуниз, фун – ипӀрубдиз», кӀурачва! Ав, дюз кӀурачва, хъа мура, тмура Аллагьди терг апӀрубра дюз ву. Аммаки беден кьяппавализ вуйиб дар, хъа – Агъайиз. Агъара – бедендиз.

¹⁴ Аллагьди Агъа Чан кьувватниинди чӀиви гъапӀну ва ухьура чӀиви апӀиди.

¹⁵ Учвуз, ичв жанар Месигьдин жандин паяр вуйиб, аьгъданчвуз? Гьаци вуйиган, узхьан Месигьдин пай гъадабгъну, кьяппавализ фици тувуз шулу? Аллагьди уьрхри!

¹⁶ Учвуз, кьяппайик ктикьур, гьадгъахъди саб беден шлубдикан аьгъданчвуз дарш? Фицики дибикӀна: «кьюрикан саб беден хьибди».

¹⁷ Хъа фуж Агъайик ктикьиш, думу Гьадгъахъди рюгьниинди сатӀи шула.

¹⁸ Кьяппавалихьан гьергай! Адмийи, кьяппавал ктарди, фу гунагь гъапӀишра, думу гунгьин дугъан бедендихъди фукӀара дар, хъа кьяппавал апӀурайири, чан бедендиз къаршуди гунагь апӀура!

¹⁹ Учвуз ичв беден Аллагьдихьан учвуъна дуфнайи Гирами Рюгь яшамиш шулайи хал вуйибдикан хабар адарди анчвуз дарш? Сарун учву ичвдар дарчва,

²⁰ гьаз гъапиш учву зурба кьиматнахъ гъадагънайидар вучва. Гьаддиз, ичв жанариинди Аллагь за апӀинай!