Коринф-1 4 - Гирами Китаб

Месигьдин вакилар

¹ Гьаци вуйиган, Аллагьдин сир учʼина ихтибарлу дапӀнайи Месигьдин гъуллугъчйирси учу гьисаб апӀинай.

² Гьамциб хъугъвал илипнайидар аьгьтлу духьну ккунду.

³ Учву вая сар жарари узкан фици кӀураш, саб жюрейинна вижна ктарзуз. Узхьан узканкьан фукӀа гьациб пуз шулдарзухьан.

⁴ Йиз намус марцциди вуйиз, вушра, му, узук тахсир ктар, кӀуру гаф дар. Йиз судья – Агъа вуйиз.

⁵ Гьаддиз, Агъа хъадакну гъюру вахт шайизра, улихьмиди тахсрар агури мюхъюгъянай. Дугъу вари жиниб ачухъ апӀиди, инсанарин юкӀвариъ гьитӀибкӀнайиб арайиз адабгъиди ва гьадмуган Дугъу гьардин тяриф апӀиди.

⁶ Узу мици, гъардшар, узканна Аполлосдикан учвуз ужʼвал бадали кӀураза. Учу мисал духьну, учхъан, артухъуб жвувкан ктадабгъди, дибикӀнайиб дубгъай, имбунуртӀан артухъ за апӀури, сар шлиинди-вуш фурс мапӀанай.

⁷ ИмбудартӀан артухъ за шли апӀураву? Аллагьдихьан даруб фу авуз? Увуз вари пешкеш дапӀнайиган, увуз тутрувганси яв тярифар гьаз апӀурава?

⁸ Сарун учуз вари ачуз, девлетлу вуча, учу хътарди паччгьар гъахьунча кӀури, фикир апӀурайчва! Ай аман, узуз ккундайинхъа учву аьхювал апӀури, учура учвухъди аьхювал апӀурахьидийча!

⁹ Хъа йиз фикриан, Аллагьди учу, Месигьдин вакилар, аьжал тувуз жаза гьадабтӀнайи адмийирси, варидарин кьяляхъ дерккна. Вари дюнʼяйиз, малайикариз ва адмийириз учкан тамашачйир духьна.

¹⁰ Месигь бадали абдлар духьначу, хъа Месигьдихъ хъугърударин арайиъ учву – фагьумлуйир! Учу – зяиф, хъа учву – кьувватлу! Учву – адлу апӀура, хъа учу – беябур!

¹¹ Гъийин йигъазкьан учу гашлу ва мукърам вуча, гъяргъяртӀан алдарди лицурача, учу урччвури шулу, ич хал-йишв адарич,

¹² учу ич хилариинди, унтӀаз амкӀ идипури, учуз уьлин кьацӀ гъазанмиш апӀурача. Учʼин агь уьлюбхюру, хъа учу ужʼвал ибшричвуз кӀурача, хъергру – аьгь апӀурача.

¹³ Учкан варитӀан писубтӀан кӀури шулдар, хъа учу гъянивалиинди жаваб туври шулча. Гъийин йигъазкьан, му дюнʼяйиз чӀюрхярди, гьарсаб хъархъвасси, имичу.

¹⁴ Му узу учвуз нач хьуз кӀури бикӀурайиб дариз, ваъ, хъа, йиз ккуни веледарси, учву гъавриъ ауз ккундузуз.

¹⁵ Учвуз агъзраркьан Месигьдин рякъюъди гъягъру мялимар ашра, хъа адшар сакьюдартӀан адарчвуз. Иса Месигьдикан вуйи Ужувлан хабарнахъ учву хъугъган, узкан рюгьниинди вуйи ичв адаш гъахьну.

¹⁶ Учвкан миннат вуйиз: узхъан мисал гъадабгъай!

¹⁷ Гьаддиз багьа ва гъапиб кӀулиз адабгъру, Агъайихъ ихь сатӀлан вуйи хъугъувалиъ айи йиз бай Тимофей гьаъразачвухьна. Узу хъугърударин арайиъ варишвариъ улупурайиси, узу йиз уьмриъ фици Месигь Исайин рякъди гъягъюри шулуш, дугъу кӀваин апӀидичвуз.

¹⁸ Сарун узу учвухьна гъидар кӀури, ичв арайиъ сакьюдари хъюхъ гъазабгну.

¹⁹ Хъа узу, эгер Агъайин амур гъабшиш, гъидиза, ва гьадмуган думу кӀулʼан удучӀвнайидарин гафарин ваъ, хъа дурарин кьувватнан кьимат фициб вуш, аьгъю хьибдизуз.

²⁰ Гьаз гъапиш Аллагьдин Паччагьлугъ, гафнаъ ваъ, хъа кьувватнаъ ачмиш шулайиб ву.

²¹ Учву кадабгъай: маргъ хьади гъюза, даршишсана – масанвална умунвал?