Коринф-1 2 - Гирами Китаб

Хачрак карсу Месигьдикан

¹ Узу учвухьна, гъардшар, Аллагьдин сирнакан ктибтуз гъафиган, узу йиз уччвудар гафар, ясана йиз фагьумлувал улупуз гъафир дайза.

² Учвухъди хъайиган, узуз аьгъюр сар Иса Месигь вуйзуз, Думура – хачрак карсур. Дугълан гъайри, сарун фукӀа аьгъю дарапӀуз гьял гъапӀунза.

³ Узу учвухьна, гучӀ кади, гукӀунди ва аьжузди гъафнийза.

⁴ Узу туврайи хабарнаъ ва йиз улхбариъ инсандин фагьмин эсер апӀру гафар адайиз, хъа дидиъ Рюгьнан кьувват ачмиш хьувал рябкъюйи.

⁵ Мици узу, ичв хъугъувал, адмийин фикринуб ваъ, хъа Аллагьдин кьувватнануб хьпан бадали, улхури гъахьунза.

Аллагьдин фагьум

⁶ Фагьмикан учу гьуркӀу адмийириз ктибтурача. Учу, гьаму дюнʼяйин фагьум, ясана му дюнʼяйин гьюкумдрари туврайи ухди-кьанди фукӀа дарубдиз илтӀикӀру фагьум, туврадарча.

⁷ Ваъ, учу Аллагьди гьамусдиз жиниди уьбхюрайи сирнан фагьмикан кӀурача. Думу фагьум, ухьу адлу апӀуз кӀури, дюнʼя халкь апӀайиз айи Аллагьдин ният вуйи.

⁸ Думу фагьум гьаму дюнʼяйин гьюкум хилиъ айидарихьан аьгъю апӀуз гъабхьундар, гъабхьнийиш, дурари хачрак аднан Агъа карсидайи.

⁹ Аммаки Гирами китабариъ дупнайиси гъабхьну: «Аллагьди Чав ккунидариз гьязур дапӀнайиб я инсандин улариз гъябкъюндар, я ибариз гъеебхьундар, я фагьмиз гъафундар».

¹⁰ Хъа Аллагьди думу ухьуз Чан Рюгьнан кюмекниинди ачмиш гъапӀунхьуз, фицики Рюгьназ вариб аьгъя. Рюгьназ Аллагьдин вари фагьмин деринарра аьгъя.

¹¹ Шлихьан чаъ яшамиш шулайи чан хусуси рюгьналан гъайри чан кӀван ниятар аьгъю апӀуз шулу? Гьаци, Аллагьдин ниятарра Чан Рюгьналан гъайри гьич саризра аьгъдар.

¹² Ухьуз му дюнʼяйин рюгь дурубкьнадархьуз, хъа Аллагьди ухьуз багъиш дапӀнайи варибдин гъавриъ ахъуз, Чахьан Рюгь дурукьнахьуз.

¹³ Мидкан учу, инсандин фагьмиинди ваъ, хъа Рюгьну улупу гафариинди кӀурача. Рюгьниинди вуйи гьякьярин гъавриъ, учуз Рюгьну улупну, тӀаърача.

¹⁴ Аллагьдин Рюгьнахьан гъюрайиб рюгь аьгъдру адмийихьан кьабул апӀуз шулдар. Дугъу думу ахмакьʼвалси гьисаб апӀуру, ва дидин гъавриъ ахъуз шулдар, фицики му ляхнар рюгь кӀваъ ади апӀрудар ву.

¹⁵ Рюгь кӀваъ айи касдиз варибдиз кьимат тувуз аьгъя, хъа адруриз – рюгь айириз кьимат тувуз аьгъдар,

¹⁶ гьаз гъапиш: «Агъа Аллагьдиз насигьят тувуз Дугъан гъавриъ айир фуж ву?» Хъа ухьуз Месигьдин фагьум ахьуз.