Коринф-1 16 - Гирами Китаб

Жара хъугърудариз кюмекар

¹ Гьамус Ерусалимдиъ айи Аллагьдин гирами халкьдиз кюмек вуди пул уч апӀбакан. Узу Галатдиъ айи хъугърудариз апӀин гъапиб учвура апӀинай.

² Гъит учвкан гьарсари, гьяфтайин садпи йигъан, шлихьан фукьан удукьуруш, ичв гъюру хайирназ дилигну, узу гъафиган уч апӀури, давди вахт гьадрапӀбан бадали, кюмекназ пул гьязур апӀинай.

³ Хъа узу гъафиган, учву уч гъапӀу кюмек Ерусалимдиз гъабхбан бадали, учву ктагъу адмийир, насигьятнан кагъзарра тувну, гьаъдиза.

⁴ Эгер узузра дина гъягъюб алабхъуруш, дурарра узухъди гъиди.

⁵ Хъа узу учвухьна Македонияйиъ хьпан кьяляхъ гъидиза. Гъюрур гьадлин мина гъидиза.

⁶ Учвухъди саб вахтназ гъузуз ният айиз, мумкин ву учвухь узу кьюрдра адапӀуз, хъасин, эгер узу дилинтина гъягъруси гъабшиш, рякъʼин апӀуз узуз кюмек апӀидичва.

⁷ Узу гьаму ражари учвʼин улукьидарза, улукьнийишра, думу сацӀиб вахтназтӀан хьибдайи. Эгер Аллагьди гъитиш, учвухь гизаф вахт адапӀуз юкӀв хъайиз.

⁸ Эфесдиъ узу ХьуцӀударин машквар хьайизкьан гъуздиза,

⁹ Фицики мушваъ, хъуркьувалиинди гъуллугънаъ хьуз шлуси, йиз улихь яркьуди урчӀар арццна. Душмнарра цӀиб дар.

¹⁰ Эгер Тимофей гъафиш, лигай, дугъаз учвухь хатӀасузди ибшри, фицики дугъура, узуси, Агъайин ляхин кӀули гъабхура.

¹¹ Думу гьяспикк ккадарди гьич фужкӀара даришри. Хъасин думу, узухьна кьяляхъ гъюз шлуси, мясляаьтниинди рякъюъ аай. Узу дугъазна гъардшариз ккилигураза.

¹² Аполлос гъардшикан. Узу дугъкан, гъардшарра хъади, учвухьна гъюб тӀалаб гъапӀнийза, амма гьаму ражари дугъан гъюз тямягь хътар. Думу, мумкинвал гъабхьиган, гъиди.

¹³ Мугъаятди гъузай! Хъугъвалиъ ижмиди гъузай, кӀубанди ва кьувватлуди йихьай!

¹⁴ Ичв апӀурайиб вари, масанвал ади, апӀинай!

¹⁵ Сабсанубдикан учвкан тӀалаб апӀуз ккунди азуз, гъардшар: Стефанусдин хуландар аьгъячвуз, Ахаяйиъ дурари сарпидарди Месигь кьабул гъапӀну ва, Аллагьдин гирами халкьдин гъайгъушнаъ хьуз, чпин уьмрар бахш апӀура –

¹⁶ гьацдар адмийирин, гъуллугънаъ айи вардарин ва дурариз кюмек апӀрударин гъайгъушнаъ йихьай.

¹⁷ Узу Стефанусна, Фортунатна, Ахаик мина гъюбʼин гизаф рази гъахьунза. Дурар дуфнайиган, учву йиз гъвалахъ хъайиси шулазуз.

¹⁸ Дурари узукра ва учвукра юкӀв капӀра. Гьацдар адмийирин гьюрмат уьбхяй.

¹⁹ Азияйиъ хъугърудари учвуз саламар хътаура. Агъайихъ хъугънайивалиъ гъардашна чи вуйи Акилайина Прискилайи ва дурарин хулаъ уч шулайи хъугъру варидари мани саламар хътаурачвуз.

²⁰ Мушваъ вари гъардшари саламар хътаура. Чиб-чпиз гирами макниинди салам туври апӀинай.

²¹ Гьамус узу, Павели, йиз хили бикӀураза:

²² Шлиз Агъа ккундарш, гъит бала гъядябхъричаз. Эй, Агъа, гъач!

²³ Агъа Исайин ужʼвал учвухъди гъит ибшри!

²⁴ Йиз масанвал – вари учвуз, Иса Месигьдиндариз. Амин.