Коринф-1 15 - Гирами Китаб

Иса Месигь чӀиви хьуб

¹ Гъардшар, узу учвуз дебкку, учву кьабул гъапӀу ва мюгькам хьуз гъиту Ужувлан хабар ичв кӀваина хуз ккундузуз.

² Гьадму Хабарну уьрхидичву, эгер узу учвуз гъапибдихъан ижмиди хъчӀихиш, даршиш – учву гьавайиди хъугърачва.

³ ВаритӀан важиблуб, узухьна тувуб, тувунзачвухьна: Гирами китабариъ улихьмиди дупнайиси, Месигь ихь гунгьарихъанди гъакӀну.

⁴ Гирами китабариъ улихьмиди дупнайиси, Думу, накьвдик кивну, шубудпи йигъан чӀиви гъахьну.

⁵ Думу, Петриз ачмиш гъахьну, хъа – йицӀикьюриз,

⁶ хъасин хьудварждилан зиина гъардшариз сабси ачмиш гъахьну. Дурарикан сакьюдар гъийихну, гизафдар гьамусра чӀивиди ими.

⁷ Хъасин Якьубдиз ачмиш гъахьну, хъасинси – Месигьдин вари вакилариз.

⁸ Дурарикан варитӀан кьяляхъна узуз, лайикь даруриз, ачмиш гъахьунзуз.

⁹ Фицики узу вакиларик варитӀан цӀибди вуйир вуза, узу вакилвалин ччвурназ лайикькьан дарза, гьаз гъапиш Аллагьдихъ хъугъру гирами халкьдихъ хъергри гъахьунза.

¹⁰ Амма, Аллагьдин ужувлиинди, узу йиз вуйир вуза, ва Дугъан узухьна вуйи ужʼвал давди гъюдубчӀвундар: узу варидитӀан гизаф ляхин гъапӀунза, яни, гъилихур узу ваъ, хъа узухъди хъайи Аллагьдин ужʼвал ву.

¹¹ Узу вая жарари – учу гьациб Хабар дебккну, учву хъугъунчва.

ГъачӀидар чӀиви апӀуб

¹² Йипай гьеле, эгер Месигь, хабар дебккрайиси, чӀиви гъахьнуш, учвкан сакьюдари, гъийихдар чӀиви шлуб дар, фици кӀура?

¹³ Эгер гъийихдар чӀиви шлуб дарш, Месигьра чӀиви хьидайи.

¹⁴ Хъа эгер Месигь чӀиви гъахьундайиш, учу дебккрайи Хабар, дидихъди ичв хъугъвалра, дав хьибдайи.

¹⁵ Дидланра гъайри учкан, эгер гъийихдар чӀиви шлуб дар кӀурубдиз лигуруш, Аллагьдиз къаршу кӀучӀлин шагьидар шула, фицики учу, чӀиви дархьи Месигь Аллагьди чӀиви гъапӀну, кӀурача.

¹⁶ Эгер гъийихдар чӀиви шлуб дарш, Месигьра чӀиви гъахьундар.

¹⁷ Месигь чӀиви гъахьундарш, ичв хъугъувалра дав ву, ичв гунгьарра учвук ками.

¹⁸ Дици вуш, Месигьдихъ хъугъну гъийихдар, гьаммишандиз гъачӀну.

¹⁹ Эгер Месигьдиин али ихь умуд гьаму уьмризтӀан кайиб дарш, имбу вари адмийирик варитӀан пис гьялнаъ ухьу ахьа.

²⁰ Месигь, дугъриданра, чӀиви гъахьну! Думу гъачӀидаригъян сарпирди чӀиви гъахьну!

²¹ Сар адмийилан гьаму дюнʼяйиъ аьжал абхъганси, чӀиви хьувалра сар Адмийиланмина гъафну.

²² Адамдилантина вари фици йихуруш, Месигьдилантина вари гьаци чӀиви хьиди.

²³ Амма гьарсар чан къайдайиинди: сифте, сабпи бегьер, Месигь, хъасин, Думу кьяляхъ гъафиган, Месигьдиндар вари, ухьу, чӀиви хьиди.

²⁴ Дугъу, гьарсаб гьякимвал, гьарсаб гьюкум ва кьувват терг дапӀну, Адаш Аллагьдихьна Паччагьлугъвал тувди, хъа гьадмуган аьхир гъибди!

²⁵ Дугъу паччагьвал, Аллагьди вари душмнар Дугъан ликарикк духну дахьайизкьан, апӀиди.

²⁶ Терг апӀуз ккайи аьхиримжи душман аьжал ву.

²⁷ Фицики, Аллагьди «Гьадгъан ликарикк вари ккирчну». «Вари ккирчну» кӀуруган, Ккирчурнур ктар.

²⁸ Дугъу Гьадгъан хилиъ вари ивган, вари ва варибдиъ Аллагь хьпан бадали, Учв, Байра, Чан хилиз вари Тувурин хиликкна гъягъиди.

²⁹ Эгер думу дици дайиш, адмийир, гъийихдарихъандира штуан гьаз шула? Эгер гъийихдар чӀиви апӀуз шулдарш, гьаз дурарихъанди штуан хьидихъа?

³⁰ Гьар сяаьтнак ухьура гьаз хатӀйирикк ккахъхьа?

³¹ Узу гьар йигъан аьжаликк ккахъраза. Узу ихь Агъа Иса Месигьдин улихь учвʼинди фици фурс апӀураш, гьациб кьувватнаъди му кӀурайибра кучӀал дариз, гъардшар.

³² Эгер адмийин улариан лигураш, узу фу бадали Эфесдиъ айи вягьшйирихъди дяви гъабхидийи? Узуз дидкан фу файда ка хъа? Гъийихдар чӀиви шлуб дайиш: «Гъачай ипӀухьа, убхъухьа, гьапӀнура закур йикӀурайидар дарин хъа».

³³ Учву учвуз кӀучӀлар апӀруси дарибшри гьа: «ЧӀуру шадлугъариъ гъяни хасиятар чӀур апӀуру».

³⁴ Учвуз лайикь вуйиси, фикриз гъачай, гунгьар апӀуб гъитай, фицики ичв арайиъ гьамусра Аллагь аьгъдрудар имийичв – мици учвуз нач хьуз кӀураза.

Ихь беден фициб хьибди?

³⁵ Сари гьерхуб мумкин ву: «Дийихнайидар фици чӀиви хьиди хъа? Думуган дурарин беден фициб хьибди?»

³⁶ Фикирсузар! Уву гъубзу тум ктубчӀвбан бадали, сифте думу пуч дубхьну ккунду!

³⁷ Уву тум убзруган, вари укӀ-мукӀди убзурадарваки, хъа дидгъян – удрар, дяхнин удрар, ясана жараб гьациб.

³⁸ Хъа Аллагьди Чаз ккуниси думу тумраз – гьардиз хас вуйи жан тувра.

³⁹ Вари жанар сабстар дар, мисалназ адмийирин жараб, гьяйванатарин жараб, жакьварин жараб, балугъарин жараб ву.

⁴⁰ Мидлан гъайри, жанар а аьршариндар ва жилиндар. Аьршарин жанариз чпиз хас вуйи успагьивал а, хъа жилиндариз – чпин.

⁴¹ Ригъдиз чан акувал а, вазлиз – чан, хядариз – жараб. Чпин нубатнаъ хядарра, крачӀрувализ дилигну, чиб-чпихьан жара шула.

⁴² ЧӀиви шлуганра, гьаци хьибди. Ухьухъ хъайи беден тумси убтӀруб ву, хъа чӀиви шлуган, ухьухъ хъибшру беден убтӀруб хьибдар.

⁴³ Накьвдик кивру беден асккануб шулу, хъа чӀиви шлуб – успагьиб! Кивра зяифуб – чӀиви шула кьудратлуди,

⁴⁴ кивра рябкъру мутмусиб – чӀиви шула рюгьнанубси. Рябкъру беден айиган, рюгьнан беденра айиб ву.

⁴⁵ Гирами китабариъ, сарпи адмийиз, Адамдиз, чӀиви рябкъру беден гъабхьну, хъа Исайиз, аьхиримжи Адамдиз, уьмрин булагъ Вуйириз, рюгьнан беден гъабхьну, дупна.

⁴⁶ Сифте гъюруб, рюгьнануб ваъ, хъа рябкъюри шлуб гъафну, ва хъасин – рюгьнануб.

⁴⁷ Сарпи адми жилин рюкъдикан гъахьну, хъа кьюрпи Адми – аьршариан гъафи Адми.

⁴⁸ Сарпи жилин адми фицир гъахьнуш, жилин адмийирра гьацдар гъахьну, хъа аьршариан гъафи Адми фицир вуш, аьршариз гъягърударра гьацдар хьиди.

⁴⁹ Ухьу гьаму ражари фици жилин адмийиз ухшар вуш, гьаци аьршарин Адмийиз ухшар хьидихьа.

⁵⁰ Учвуз кӀураза, гъардшар, ифина йикк Аллагьдин Паччагьлугъдин ирсчйир шлуб дар, ва убтӀруб дурубтӀрубдин ирсчи хьибдар.

^51-52 Хъебехъай, узу учвуз гьамус сир ачмиш апӀидиза: зурнайин аьхиримжи дих утӀубччву сяаьт ухьу вари йихидар, хъа хабарсузди, улар уьлчӀюкьну арццайиз, вари дигиш хьиди. Зурнайин дихнахъди дийихнайидар дурутӀру жанар хъади чӀиви хьиди, хъа ухьу дигиш хьиди.

⁵³ Вари убтӀруб дурубтӀрубдиз илтӀибкӀиди, йибкӀруб – дилибкӀрубдиз.

⁵⁴ Вари убтӀруб дурубтӀрубдиз ва йибкӀруб дилибкӀрубдиз илтӀибкӀган, гьаму гафар тамам хьиди: «Аьжал гъалибвали хътӀюбкью!»

⁵⁵ «Эй аьжал, набшдияв гъалибвал? Эй аьжал, набшдияв, галам?»

⁵⁶ Аьжалин галам – гунагь ву, гунгьин кьувват – Къанун.

⁵⁷ Аллагьдиз чухсагъул! Дугъу ихь Агъа Иса Месигьдиланмина ухьуз гъалибвал туврахьуз.

⁵⁸ Гьаддиз, йиз ккуни гъардшар, ижмиди гъузай. Минди-тинди хъахърудар махьанай. Агъа бадали вуйи ляхниз фукӀара гьяйиф мапӀанай ва аьгъю йибхьай: Агъайиз вуйи ичв ляхин давди гъюдубчӀвидар.