Коринф-1 14 - Гирами Китаб

Рюгьнан багъишар хъугърударин хайирназ ишлетмиш апӀинай

¹ Масанвалихъ хъачӀарккай. Рюгьнан багъишарин гъайгъушнаъ йихьай, гизафна гизафси – пайгъамбарвалин багъишнан.

² Таниш дару чӀалниинди гафар апӀурайир адмийирихъди ваъ, хъа Аллагьдихъди улхура. Фицики дугъан фужкӀа гъавриъ ахъдар, амма Рюгьниинди дугъу сирарикан кӀура.

³ Хъа пайгъамбарвалин гафар кӀурайири адмийириз насигьят вуди, юкӀв капӀри ва ккарцури кӀура.

⁴ Таниш дару чӀалариинди улхурайир, чаз насигьят вуди улхура, хъа пайгъамбарвалин гафар кӀурайири, хъугънайидариз насигьят вуди кӀура.

⁵ Узуз учвкан гьарсар чӀалариинди улхури ккундийзуз, аммаки пайгъамбарвал апӀуб ужу ву. Пайгъамбарвал апӀурайир, чӀалариинди улхруртӀан зиина ву. Аммаки чӀалариинди улхрури, хъугънайидариз насигьят вуди, гьадму чӀаларин гъавриъ ауйиш, думу зина вуйи.

⁶ Гъардшар, узу учвухьна дуфну, таниш дару чӀалариинди, фукӀа ачмиш дарапӀди, аьгъювалар тутрувди, пайгъамбарвалин гафар дарпиди, насигьят тутрувди улхуйиш, узкан учвуз фу хайир хьибдийи?

⁷ Ил алдру мукьмарин алатар гъадагъай, мисалназ, швутӀрам вая кьумуз. Эгер сесер жара апӀуз шулдарш, дурарин мукьмар фици аьгъю апӀидичва?

⁸ Эгер зурнайи гъавриъ адрахъру дих деебтиш, дявдиз фуж гъедергидийи?

⁹ Гьаци учвура шулачва. Эгер гъавриъ адрахъру гафар кӀураш, учву кӀурайибдин адмийир фици гъавриъ хьиди? Учву гьавайи гафар деетурачва.

¹⁰ Дюнʼяйиъ фукьан гизаф чӀалар а, амма чӀалар аьгъюдари дурарин мяна бисура.

¹¹ Эгер узуз кӀурубдин узу гъавриъ ахъдарш, кӀурайириз узу жара уьлкейин адми ву, ва думура узуз жара уьлкейин адми шула.

¹² Гьаци учвура шулачва. Учвуз Рюгьнан багъишар ккунди анчвуз? Ккуниган, хъугънайидарин хайирназ бегьемди ккун апӀинай.

¹³ Гьаддиз, аьгъдру чӀал апӀрури, дидин гъавриъ ауз шлу багъишра туври кӀури, ккарагри.

¹⁴ Аьгъдру чӀалниинди узу ккарагруган, йиз рюгь ккарагура, хъа йиз фикир иштирак шуладар.

¹⁵ ГьапӀза? Узу рюгьниинди ккарагидиза, йиз фикрииндира ккарагидиза. Рюгьниинди Аллагьдиз мяълийир апӀидиза, йиз фикрииндира мяълийир апӀидиза.

¹⁶ Эгер уву рюгьниинди Аллагьдиз баркаллагь кӀураш, гъаври адру адмийи фици «амин» пиди? Дугъаз уву фу кӀураш аьгъдар!

¹⁷ Увхьан Аллагьдиз ужуйи баркаллагь пуз шулвухьан, хъа тинди хъайир диди мюгькам апӀидар.

¹⁸ Учвуз варидаризтӀан чӀалариинди улхуз узуз ужуйи аьгъязуз, гьаддиз Аллагьдиз чухсагъул вуйиз,

¹⁹ амма хъугънайидарин арайиъ, жарадариз насигьят вуди, йиз фикриинди гъавриъ ахъру хьуб гаф кӀарза, агъзрариинди аьгъдру чӀалнан гафар кӀайиз!

²⁰ Гъардшар, фикир ади, бицӀидарси махьанай. Писвализ тахсир ктру бицӀидарси йихьай, хъа фикриинди – гьуркӀу адмийир!

²¹ Къанундиъ дибикӀна: «Жара чӀалариинди ва жара мелзариинди Узу гьаму халкьдиз пидиза, я гьадмуганкьан дурар Узухъ хъпехъидар, – кӀура Агъайи».

²² Гьаци вуйиган, жара чӀалар хъугърудариз вуйи лишан дар, хъа хътругърудариз. Пайгъамбарвалин гафар – хътругърудариз дар, хъа – хъугърудариз.

²³ Хъугънайидар вари уч духьну, чӀалариинди улхуради, дурарихьна аьгъдрудар ваяки хътругърудар гъафиш, дурари учвук жинар кучӀвна даркӀурин?

²⁴ Хъа варидари пайгъамбарвалин гафар кӀуради, душвазди хътругърур, ясана жарар учӀвиш, улхурайи гьарсарикан дугъаз учв гунагькар ва тахсиркар вуйиб рябкъиди.

²⁵ Дугъан кӀван жини ниятар ачухъ хьиди, ва гьадмуган, кьамкьарихъди ис алахъну, Аллагьдиз дугъу икрам апӀиди ва пиди: «Дугъриданна, Аллагь учухъди хъа!»

Хъугърудар мюгькам апӀури йихьай

²⁶ Фу вухъа, гъардшар? Учву уч шлуган, гьарсарин фу-вуш кӀуруб шуличв: Аллагьдиз мяъли, насигьятнан гаф, Аллагьди ачмиш гъапӀуб, чӀалариинди улхуб, ясана думу чӀаларин гъавриъ ауб – гъит варидиз му вари мюгькамвализ ибшри.

²⁷ Эгер чӀалариинди улхрудар аш, гъит кьюри йипри, заан кӀул – шубури, нубатнахъди, хъа сар касди дурари кӀурайиб кидибтри.

²⁸ Хъа чӀаларин мяна ктибтуз шлур адарш, чӀалариинди улхрур хъугънайидарин арайиъ ккебехъну гъузри – чазна АллагьдизтӀан дарипри.

²⁹ Пайгъамбрариканра кьюри вая шубури йипри, хъа имбудари гъапибдикан фикир апӀри.

³⁰ Эгер дуфнайидарикан сариз Аллагьдихьан фукӀа ачмиш гъабхьиш, улхурайир ккебехъну, мунури йипри.

³¹ Учвхьан вардарихьан, вардариз насигьят тувбан ва вардарик юкӀв капӀбан бадали, нубатнахъди пайгъамбарвал апӀуз шулучвхьан.

³² Пайгъамбрари чпин рюгьнан эйсивал дапӀну ккунду,

³³ гьаз гъапиш, Аллагь – къайда хътру Аллагь дар, хъа мясляаьтнан Аллагь ву. Аллагьдин гирами халкь уч шлу варишвариъси,

³⁴ душвариъ дишагьлийир ккебехъну ккунду. Дурариз гафар апӀуз ихтияр туврадар. Къанунди тӀалаб апӀурайиси, дурарин пише мютӀюгъди гъузуб ву.

³⁵ Эгер дурариз фукӀа аьгъю апӀуз ккунди аш, гъит дурари хулаъ чпин жиларихьан гьерхри, фицики дишагьлийиз уч духьнайишваъ улхуб аьйиб ву.

³⁶ Аллагьдин гаф сифте учвхьан удубчӀвуб, ясана учвухьнатӀан дурубкьну адруб ву кӀури, гьисаб апӀуранчва?

³⁷ Учв пайгъамбарди вая рюгьнан адмиди гьисаб апӀурайири узу бикӀурайиб, Чав Агъайин дебккнайиб вуди, кьабул апӀри.

³⁸ Хъа кьабул дарапӀрур, учвура кьабул мапӀанай.

³⁹ Гьаци вуйиган, гъардшар, пайгъамбарвалихъ хъачӀаккай, чӀалариинди улхузра машат мапӀанай.

⁴⁰ Аммаки вари лайикьлуди ва къайдалуди дубхьну ккунду.