Коринф-1 13 - Гирами Китаб

Масанвал

¹ Эгер узуз вари адмийирин ва малайикарин чӀалар аьгъяди, хъа масанвал адарш – узу гаргврин бябрягъяр ва далдабуйин дабдаба вуза.

² Узуз пайгъабарвалин багъиш ади, дюнʼяйин вари сир аьгъяди, узуз вари аьгъювалар тувнади, узуъ дагъларра кмиди чпин алишвлан улдучӀвуз гъитру хъугъувал ади, хъа масанвал адарди вуш, узу фукӀа дару ичӀичӀай вуза.

³ Узуъ масанвал адарди касибариз узуз айи вари девлет пай гъапӀишра, гьадрарихъанди убгуз йиз жан тувишра – мурарихьан сабдихьанра узуз кюмек апӀуз хьибдар.

⁴ Масанвали сабур хуру, гъянивал хуру, бахилвал хурдар, жвуван тяриф апӀдар, фурс кипдар,

⁵ чӀуруди хътӀурччвуз гъитдар, чан хайирназ фукӀа апӀдар, хъял хурдар, писвал кӀваъ гъибтдар.

⁶ Масанвал кучӀлиин ваъ, хъа гьякьвалиин шад шулу.

⁷ Диди варибдилан хил алдабгъуру, варибдихъ хъугъру, умуд зат ктабтӀруб дар, вариб аьгь апӀуру.

⁸ Масанвал гьич зат хъатӀабццну хьибдар. Пайгъамбарвал дугъубжвиди, чӀалар ккебехъиди, аьгъювалар лазимди гъузидар.

⁹ Фицики ихь аьгъювалар гьуркӀнайидар дар, ихь пайгъамбарвалин гафарра гьуркӀнайидар дар,

¹⁰ ва тамамвал гъафиган, вари гьудрубкӀувал жвартӀ хьибди.

¹¹ Узу бицӀир вуйиган, бицӀириси кӀуйза, бицӀириси фикир апӀуйза, ляхнарикан бицӀириси хиял апӀуйза. Аьхю гъахьунза – бицӀивал вари гьудубчӀвну.

¹² Гьаму ражари ухьуз, кьалу гюзгдиан рябкъюрайиси, ачухъди рябкъюрадархьуз, хъа гьадмуган машна-машди рябкъюри хьибдихьуз. Сабан сацӀибтӀан аьгъдарзуз, хъа думуган, Аллагьдиз узу фици аьгъяш, гьаци тамамди аьгъю хьибдизуз.

¹³ Хъа сабан магьа гьаму шубуб а: хъугъвал, умуд ва масанвал, дурарикан заануб масанвал ву.