Коринф-1 10 - Гирами Китаб

Жугьдарси махьанай

¹ Гъардшар, ихь вари абйир дифран хиликкди хьубкан ва, гьюл жара дубхьну, вари гьадушвʼантина удучӀвбакан, учвуз аьгъюди ккундузуз.

² Дурар вари Мусайин ччвурнахъ дифраъ ва гьюлиъ гъахьну.

³ Дурари вариди рюгьнан саб хураг ипӀури

⁴ ва рюгьнан саб убхъруб убхъури гъахьну. Дурари чпихъди шлу рюгьнан гъарзʼан убхъури гъахьну, хъа думу гъарз – Месигь вуйи.

⁵ Дурар гьаци гъахьнушра, Аллагьдин улихь дурари ужʼвал гъазанмиш гъапӀундар ва къураматдиъ пуч гъахьнийи.

⁶ Му вари ухьуз, гьадрариси ухьура писвал ккун дарапӀбаз, улупурайиб ву.

⁷ Гьадрарикан гьацӀарси, учвура идолариз икрам апӀрудар махьанай. Фицики Гирами китабариъ дибикӀна: «Халкьди, деъну, ипӀуз ва убгъуз хъюгъру, хъасин идолин гьюрматназ ялхъвнар апӀуру».

⁸ Гьадрарикан гьацӀарси ухьура, кьяппйир хьидархьа. Дурари кьяппа тӀулар апӀури ккебгънийи, ва сад йигъан къанна шубуд агъзур гъийихнийи.

⁹ Ухьура, гьадрарикан гьацӀариси, Месигь ахтармиш апӀури хъюгъидархьа. Хъасин дурар, битӀари кьацӀар дапӀну, гъийихнийи.

¹⁰ Учвура, гьадрарикан гьацӀарси, бурбрар апӀури махьанай, гьаддилан дурар пуч апӀру малайикди тӀанкь гъапӀнийи.

¹¹ Гьамрар вари, гъюз ккимбуб улупури, гьадмуган дурарихъди гъахьнийи, хъа му ухьуз, дарс вуди, дибикӀна.

¹² Гьаци вуйиган гъит, гьар шли учв ижмиди ликриин дийигъназа кӀури, фикир апӀураш, алдакуз гъидритри!

¹³ Гьамусдиз учвʼин алахьу читинвалар адмийириин улукьру аьдати читинвалартӀан дар. Аллагь Чав туву гаф тамам апӀрур ву. Дугъу учвʼин аьгь апӀуз даршлу читинвалар алахьуз гъитдар. Читинвалар алахьруган, Дугъу учвуз дурариан удучӀвуз шлу рякъра улупидичвуз. Гьаци дурариан учвхьан кӀул адабгъуз хьибдичвухьан.

¹⁴ Магьа гьаддиз, йиз ккунидар, идолариз икрам апӀбахьан гьергай!

¹⁵ Узу, учву фикирлу адмийир ву дупну, улхураза. Учву фикир апӀинай.

¹⁶ Аллагьдиз чухсагъул дупну, убхъурайи баркаллагьнан Захру ухьу Месигьдин ифдик ктикьурадарин? ГьудубтӀну, пай дапӀнайи уьли ухьу Месигьдин бедендик ктикьурадарин?

¹⁷ Уьл саб ву, ухьура, фукьан гизаф вушра, саб беден вухьа, гьаз гъапиш, ипӀурайи гьадму саб уьлʼинди ухьу вари сатӀи шулахьа.

¹⁸ Израил халкьдиз лигай, гъурбан апӀрушвахьна гъурбан гъапӀу мутму дубхну ипӀрудар, гъурбан гъапӀушвахъди саб шуладарин?

¹⁹ ИкибаштӀан, узу, идолиъ вая дидиз гъурбан дапӀнайибдиъ фу-вуш саб мяна а, кӀурадарза.

²⁰ Ваъ, аммаки Аллагьсузари чпин гъурбнар, Аллагьдиз ваъ, хъа шейтӀнар-жинариз хура. Узуз учву жинарихъди саб духьну ккундарзуз.

²¹ Учвхьан Агъайин Захʼанра ва жинарин захʼанра сабси убхъуз хьибдарчвухьан! Учвхьан Агъайин Суфрайихъра ва жинарин суфрайихъра сабси деуз хьибдарчвухьан!

²² Агъайик хъял капӀуз шулухьхьан кӀури, ухьу фикир апӀурайин? Ухьу ДумутӀан кьувватлуйир вуйин дарш?

Жвуван азадвал Аллагьдин адназ ишлетмиш апӀинай

²³ Учву: «Вари апӀуз ихтияр ачуз!» кӀурачва, аммаки вари, хайирназ дар. «Вариб апӀуз ихтияр а!» Аммаки варибди мюгькамвал хурдар.

²⁴ Гъит варидари, жвуваз ваъ, имбудариз ужʼвал апӀри.

²⁵ Базариъ масу тувруб вари, юкӀв архаинди, ахтармиш дарапӀди, ипӀинай,

²⁶ фицики, «жил ва дидʼин алиб вари Агъайинуб ву».

²⁷ Эгер хътругъру адмийи учвуз теклиф гъапӀиш, гьивуб вари юкӀв архаинди, ахтармиш дарапӀди, ипӀинай.

²⁸ Хъа эгер учвуз гьадмуган: «му гъурбан дапӀнайи йикк ву» гъапиш, гъапир бадали ва намус бадали, мипӀанай –

²⁹ узу мушваъ, ичв ваъ, хъа жара касдин намус бадали, кӀураза. Жарарин намусну йиз азадвалик тягьна гьаз кипди?

³⁰ Аллагьдиз чухсагъул дупну, узу думу хураг баркаллагьниинди ипӀураш, узук тягьна гьаз кипди?

³¹ Гьаддиз, учву ипӀурашра, убхъурашра, фу апӀури гъашишра, вари – Аллагьдин ад бадали апӀинай.

³² Я жугьдар, я грекар, я Аллагьдихъ хъугънайидар гунгьихъна дархрубси уьмур хъапӀри апӀинай.

³³ Узуси, варибдиъ варидиз ужу шлуси апӀинай. Узу, узуз ваъ, хъа, жарадар гизаф дюрхну хьпан бадали, гьадрариз ужʼвал абгурайир вуза.