Коринф-1 1 - Гирами Китаб

Саламар

¹ Иса Месигьдин вакил хьуз Аллагьди дих дапӀнайи Павелихьан ва Сосфен гъардшихьан

² Коринфдиъ Аллагьдихъ вари хъугърудариз, Иса Месигьдихъди саб вуйи гирами духьнайидариз, Дугъаз кӀури гирами халкь хьуз дих дапӀнайидариз, ихь Агъа ва дурарин Агъа вуйи Иса Месигьдиз ккарагурайидариз саламар.

³ Аллагьдихьан, Аьршарин ихь Адашдихьан ва Агъа Иса Месигьдихьан ужʼвал ва мясляаьт ибшричвуз!

Павели Агъайин тяриф апӀура

⁴ Учвхъан узу йиз Аллагьдиз гьаммишан чухсагъул кӀураза, гьаз гъапиш Гьадгъу учвуз Иса Месигьдиланмина ужувлан багъишар тувначвуз.

⁵ Гьадгъулантина учву варибдихъди – гаф-чӀалнан ва аьгъюваларин вари хазнайихьди ацӀунчву,

⁶ фицики Месигьдикан вуйи ич шагьидвал учвуъ мюгькам гъабхьну.

⁷ Сарун, ихь Агъа Иса Месигь гъяйиз ккилигури гъузбаъ, рюгьнан багъишариъ учвуз гьудрубкӀруб фукӀа адарчвуз.

⁸ Учву аьхиризкьан, ихь Агъа Иса Месигьдин Йигъан учву сабкьан тахсир ктарди хьпан бадали, Гьадгъу мюгькам апӀидичву.

⁹ Чан Бай вуйи ихь Агъа Иса Месигьдихъди саб хьуз ухьуз дих дапӀнайи Аллагь хъугъвал Алир ву.

Хъугърударин жара хьувалар

¹⁰ Ихь Агъа Иса Месигьдин ччвурнахъан, гъардшар, учвуз миннат апӀураза, чиб-чпихъди вари рази духьну гъузай. Гъит учву чиб-чпихьан жара даришри, фагьмар ва фикрариъ саб ишричву!

¹¹ Йиз гъардшар, ичв гьюжатарикан Хлоийин хуландарикан деебхьназуз.

¹² Узу мушваъ фтикан улхура? ГьацӀари кӀурачва: «Узу Павелин тереф дибиснайир вуза», тмундари – «Узу – Аполлосдин», шубурпидари – «Узу – Кифдин», юкьурпидари – «Хъа узу – Месигьдин».

¹³ Месигь пай духьнайин дарш?! Вая учвхъанди хачрак карсур Павел гъахьнийин?! Ясана учву Павелин ччвурнахъ штуан гъахьунчвахъа?! Ваъ!

¹⁴ Криспна Гай ктарди, узу йиз хилариинди учвкан фужкӀа штуан дарапӀбаз Аллагьдиз чухсагъул кӀураза.

¹⁵ Гьаддиз учвхьан сарихьанра, йиз ччвурнахъан штуан гъахьунча, пуз хьибдарчвухьан!

¹⁶ Ав, йиз хилариинди штуан дапӀну цӀийи алаъдар Стефанна дугъан хуландар вуйиз, хъа сарун узу фужарсана цӀийи алаънуш, кӀваин илмидариз

¹⁷ Месигьди узу, учву штуан апӀуз кӀури ваъ, хъа Ужувлан хабар дебккуз гьаънайир вуза. Думу Хабар узу аьмалдар гафариинди дебккну ккундар, вуйиш, Месигьдин, ккадауз кӀури, хачрак гъабхьи аьжалнан метлеб дубгдийи.

Аллагьдин заанвал, аьяндарвал ва кьувват – Месигь ву

¹⁸ Пуч хьуз ккайидари, Месигьдин, ккадауз кӀури, хачрак гъабхьи аьжаликан гаф ахмакьвал ву кӀура, хъа ухьуз, Аллагьди уьрхрудариз, думу Аллагьдин кьувват ву.

¹⁹ Гирами китабариъ дибикӀнаки: «Узу, аьяндрар вуча кӀурайидарин аьяндарвал фукӀа дарувал апӀидиза ва фикирлуйир вуча кӀурайидарин фикирлувал тина гьадапӀидиза».

²⁰ Наши аьяндар? Наши Кьанундин аьлим? Наши гьаму аьсрарин дирбаш гьюжаткар? Аллагьди гьаму дюнʼяйин вари аьяндарвал, дугъридан ахмакьвал ву, кӀури, улупнадарин дарш?

²¹ Аллагьдин зурба фагьми дебккганси, гьаму дюнʼяйин фагьмихьан Аллагь аьгъю апӀуз дархьиган, Хабарну дебккрайи «ахмакьвалихъ» хъугъдар уьрхюз Аллагьдиз ккун гъабхьну.

²² Жугьдари аьламатар ккун апӀура, Аллагьдикан аьгъдрудари фагьум абгура,

²³ хъа учу, хачрак карсу Месигьдикан хабар рабгъурача. Жугьдариз му хъарсну алдакру гъван ву, хъа имбу халкьариз – фагьумсузвал ву.

²⁴ Хъа, Аллагьди дих дапӀнайидариз, жугьдаризра, грекаризра, Месигь – Аллагьдин фагьум ва кьувват ву!

²⁵ Фицики, Аллагьдин «ахмакьвал» инсандин фагьумтӀан зиина ву ва Аллагьдин «зяифвал» инсандин кьувваттӀан кьудратлу ву!

²⁶ Гъардшар, Аллагьди учвуз дих апӀайиз учву фицдар вуйиш, учвуз лигай. Эгер адмийи гьисаб апӀурайиси гъадабгъиш, учвкан гизафдар фагьумлуйир, кьувватлуйир, бина машгьур касар вуйинхъа?

²⁷ Хъа Аллагьди, фагьумлуйиз нач хьузди, гьаму дюнʼяйи ахмакьди гьисаб апӀруб ктабгъну, ва кьувватлуб начан шлуси, гьаму дюнʼяйи зяифди гьисаб апӀруб ктабгъну.

²⁸ Дугъу, гьаму дюнʼяйи зина вуди гьисаб дапӀнайиб батӀил апӀбан бадали, саб кьимат адруб, асккан дапӀнайиб ва улʼан идипнайиб ктабгъну.

²⁹ Гьаддиз сарун сарихьанра Дугъан улихь чан тяриф апӀуз хьибдар.

³⁰ Гьадгъан кюмекниинди учву Иса Месигьдик кидикьначва. Гьадму Иса ухьуз Аллагьдин фагьум, ихь гьякьвал, ихь гирамивал ва ккадаувал вухьуз!

³¹ Гьаци вуйиган, Гирами китабариъ кӀурайиси: «Тяриф апӀуз ккунири Агъайин тяриф апӀри!»