Колосс 4 - Гирами Китаб

Насигьятар

¹ Учвура, агъйир, лукӀарихъди дугъриди ва намуслуди гъузай. КӀваинди гъибтай, ичв Агъара завариин ал.

² Гьаммишан ккарагури йихьай, ккарагруган, кӀубанди йихьай ва чухсагъул кӀури йихьай!

³ Гьацира, Аллагьди учуз Месигьдин сирнакан гаф рабгъбан урчӀар арццбан бадали, учхъанди ккарагай. Гьадму сир ктибтруган, узу зунжрариъ аза.

⁴ Узуз дидкан аьгъювалар, узхьан удубкьрубкьан ужуди, ачухъди ва тамамди улупбан бадали, узхъанди ккарагай.

⁵ Жарадарихъди фагьумлуди гъузай, гьубкьу жюрейин мумкинвал ишлетмиш апӀинай.

⁶ Гъит, ичв сюгьбатар гьаммишан кабалгрудар ва фагьумлудар ишри ва, гъит, гьардиз лазим вуйи жаваб бихъри.

⁷ Узкан вари хабрар Тихикди пидичвуз. Думу ихтибар али гъуллугъчи, узухъди Агъа бадали лихурайи йиз ккуни гъардаш вуйиз.

⁸ Узу думу учвухьна, ич ляхнарин хабрар кидитну, ичв юкӀвар шад апӀуз, гьаъраза.

⁹ Узу дугъахъди дугъри ва ккуни вуйи гъардаш Онесимра гьаъраза – думу ичвдарикан сар ву. Дурари учвуз, гьамшваъ шулайи варибдикан ктибтидичвуз.

¹⁰ Учвуз узухъди дустагъдиъ айи йиз юлдаш Аристархди, Варнавайин халуйин бай Маркди саламар хътаура. Дугъкан учвухьна тӀалаб дурубкьначвухьна: эгер думу учвухьна гъафиш, думу кьабул апӀуб ккун апӀурача.

¹¹ Учвуз гьацира саламар хътаура Юстус кӀуру лакӀам хъайи Исайи. Аллагьдин Паччагьлугъ бадали жафа зигурайи жугьдарикан гьадрартӀан хътарзухъ. Дурар узуз аьхю кюмек вузуз.

¹² Ичвдарикан саламар Месигь Исайин гъуллугънаъ айи Эпафрасди хътаура. Думу гьарган учвхъанди, учву тамамвалинна дугъривалин мюгькамвалиинди Аллагьдин ниятнахъ хъпехъури гъузри кӀури, ижмиди ккарагура.

¹³ Думу учвхъанди ва Иерапольна Лаодикия шагьрарин хъугърударихъанди, гьяйиф дарди, аьхю жафайиинди лихбан узу шагьид вуза.

¹⁴ Учвуз ихь ккуни духтир Лукайи ва Демасди саламар хътаура.

¹⁵ Лаодикияйиъ айи гъардшариз, гьацира Нимфандиз ва дугъан хулаъ уч шлу хъугърудариз саламар йипай.

¹⁶ Му кагъаз учвухь гъурхиган, Лаодикияйин хъугърударизра урхуз шлуганси апӀинай. Хъа учву Лаодикияйиан вуйи кагъаз урхай.

¹⁷ Ва Архипдиз йипай: «Лиг, увуз Агъайихьан гъабхьи гъуллугъ тамам апӀури гъуз!»

¹⁸ Йиз хусуси хилʼинди бикӀураза: Павелихьан саламар. Йиз зунжрарикан кӀваинди гъибтай. Гъит учвухъди Аллагьдин ужʼвал ибшри!