Колосс 3 - Гирами Китаб

Ичв цӀийи уьмур Месигьдихъди ву

¹ Аллагьди учву Месигьдихъди чӀиви дапӀнайиган, Аллагьдин арччул хилихъинди деънайи Месигьдихьинди, заваринубдихьна, ял апӀинай.

² Заваринубдикан фикрар апӀинай, хъа му дюнʼяйинубдикан – ваъ.

³ Фицики учву дийихначва, хъа ичв уьмур, Месигьдихъди сабси, Аллагьдиъ жиниди а.

⁴ Ичв уьмур – Гьадму Иса ву. Думу гъафиган, учвура Дугъахъди адлуди гъидичва.

⁵ Гьаддиз, учву гьаму дюнʼяйихьан дибиснайи учвуъ айиб вари: кьяппавал, чиркинвал, ктирсуз даршлу тямягьяр, асккан тямягьяр, кьискьисвал – гатӀахьай. Мицдар тӀулар идолариз икрам апӀувал ву.

⁶ Вари гьамцдар тӀулари чпиина Аллагьдин хъял зигура.

⁷ Улихьди, гьаци яшамиш шлуган, учвура гьацдар вуйчва.

⁸ Хъа гьамус думу вари: хъял, гъизгъинвал, даккнивал, люкьнар, лайикьсуз гафар – гатӀахьай!

⁹ Чиб-чпиз кучӀлар мапӀанай, фицики учвʼлан ичв йирсивал илдипунчва.

¹⁰ Учву ГъапӀуриз ухшар айи, Аллагьдин гьякьвал аьгъяди, цӀийитӀан цӀийи алапӀурайи адмивалин цӀийи халиъ учӀвначва.

¹¹ Гьаци гъахьиган, грекна жугьуд миллетдин, суннат дапӀнайиринна адрурин, варваринна скифдин, лукӀранна азад вуйирин арайиъ фаркьвал адар. Месигь вариб ву, ва варибдиъ айир Гьадму ву!

Аллагьдихъ хъугърударин хизан

¹² Гьаддиз, Аллагьдин кадагънайи гирами ва масан вуйидариз лайикь вуйиси, учвура рягьимлувалин, язухъ зигувалин, юкӀв айивалин, гъянивалин ва сабурлувалин палтар алахьай.

¹³ Эгер учвуз сар-сарикан гиран каш, сабурлуди аьгь апӀури гъузай ва Агъайи учвлан хил алдабгъиганси, учвура хил алдабгъури йихьай!

¹⁴ Хъа гьацдар палтарин зиълан масанвалиндар алахьай. Фицики масанвали варибдикан тамам вуйи сатӀивал апӀуру.

¹⁵ Гъит, Месигьдин мясляаьтну ичв юкӀвариз рякъ улупри, фицики Аллагьди учвуз дих гъапӀунчвуз ва саб Бедендик, мясляаьт бадали, ктикьунчву. Гьаци апӀузди баркаллагь кӀури йихьай!

¹⁶ Гъит, учвуъ Месигьдин гаф булди яшамиш ибшри. Хъа гьадмуган учвхьан вари фагьум хъади чиб-чпиз аьгъювалар улупуз ва насигьятар тувуз хьибдичвухьан ва, рюгь баркаллагьну абцӀну, Аллагьдиз юкӀв абцӀнайивалин Аллагьдиз мяълийир, тярифнан ва рюгьнан мяълийир апӀуз хьибдичвухьан.

¹⁷ Вари ичв улхбарра, ичв ляхнарра Гьадгъулантина, Адаш Аллагьдиз чухсагъул кӀури, Агъа Иса бадали апӀинай.

Жарадарихъди цӀийиди яшамиш йихьай

¹⁸ Хпар, ичв жилариз мютӀюгъ йихьай, му Агъайин улихь ичв буржи ву.

¹⁹ Жилар, ичв хпар ккун апӀинай ва дурариз писдар махьанай.

²⁰ БицӀидар, варибдиъ ичв абйир-бабарихъ хъпехъури гъузай, фицики учву гьаци апӀувал Агъайиз ккуниб ву.

²¹ Адашар, ичв бицӀидарик хъял капӀри махьанай, даршиш дурар аьжуз юкӀвар айидар хьиди.

²² ЛукӀар, ичв жилин агъйирихъ варибдиъ, кьюб маш гъяйидарси имбударин улхьан ваъ, хъа марцци кӀваан ва Агъайин улихь гучӀ кайивалиан хъпехъури апӀинай.

²³ Учву фу апӀури гъахьишра, вари ичв марцци кӀваан, адмийиризси ваъ, хъа Агъайиз апӀурайиси, апӀинай.

²⁴ Фицики, Агъайи пешкешди ирс тувруб учвуз аьгъячвуз. Учву Агъа Месигьдин гъуллугънаъ ачва.

²⁵ Хъа шли чӀурувал апӀуруш, дугъаз, гъапӀу чӀурувализ дилигну, тувди. Аллагьдин улихь вари саб ву.