Колосс 2 - Гирами Китаб

Месигьдихъди яшамиш йихьай

¹ Узу учвхъанди, Лаодикияйин хъугърударихъанди ва узу чпин улариз рякъюзкьан дяряркъдарихъанди фициб ижми дяви гъабхураш, учвуз аьгъяди ккундузуз.

² Йиз метлеб ичв юкӀвариъ масанвалин сатӀивал ва кӀубанвал тӀапӀуб вуйиз. Масанвалин сатӀивал ва кӀубанвал аш, учвуз Аллагьдин сир, яна Месигьдикан вуйи аьгъюваларин гьубкӀу девлет хьибдичвуз.

³ Хъа вари аькьюллувалин ва фагьмин девлетар Месигьдиъ а.

⁴ Узу учвуз му, гьич сарира уччву гафариинди учву ичв рякълан алдауз гъидритуз, кӀурайиб вуйиз.

⁵ Бедендиинди учвухъди хътаршра, рюгьниинди учвухъди хъаза ва, Месигьдихъди ичв албагувал ва хъугъувал узуз рябкъруган, шад шулуза.

⁶ Гьаци вуйиган, эгер учву Месигь Иса ичв Агъади кьабул гъапӀнуш, Гьадгъахъди сатӀиди яшамиш йихьай.

⁷ Гьадгъаъ ччивар деетай, жвуван уьмур Гьадгъахъди хъапӀай, учву айи хъугъвалиъ мюгькам йихьай ва учвуз гъапӀу ужувлан гъадри кади гъузай.

⁸ Лигайгьа, гьич сарира, Месигьдихьан ваъ, хъа адмийирин аьдатарихьан ва гьаму дюнʼяйин кьудратарихьан гъюру ичӀи ва кучӀлин фикрари учву чпин чулиинди дисуз мигъитанай.

⁹ Гьаз гъапиш вари Аллагьдин тамамвал Гьадгъаъ рябкъюри а.

¹⁰ Учвузра тамамвал гьякимарин ва гьюкмарин КӀул вуйи Гьадгъаъди дурубкьначвуз.

¹¹ Гунагьнан хасият учвлан, палатси, уьлчӀюбгъю Месигьди ичв суннат Чаъ гъапӀну. Думу адмийин хилари апӀурайибсиб суннат дар.

¹² Учву штуан хьувал учву Гьадгъахъди накьвдиъ иву мисал ву. Думу чӀиви гъапӀу Аллагьдин кьувватнахъ хъугъували Дугъахъди учвура чӀиви гъапӀунчву.

Адмийири дерккнайи къайдйирихъди мягъянай

¹³ Ухди учву, ичв гунгьариз ва суннат дапӀну адрувализ дилигну, дийихнайидар, Аллагьдин халкьдик кахьри адайчва. Хъа гьамус Аллагьди учву Гьадгъахъди уьмрихьна кьяляхъ хътаъну. Дугъу ихь вари тахсрарилан хил алдабгъну.

¹⁴ Дугъу ухьуз къаршу вуйи къайдйир кайи китаб, хачрак кьумарихьди кабсну, жвартӀ гъапӀну.

¹⁵ Гьамци Думу, гьякимарихьан гьюкум, яракь тадабгъну, варидарин улихь беябур дапӀну, дурариин Чан хачрахьди гъалиб гъахьну.

¹⁶ Гьаци вуйиган, гъит, гьич сарира учву ипӀрубдиз ва убхърубдиз тягьнийир дириври ва учвхьан, машкврар, ваз цӀийи алаувалар ва султ йигъар къайд апӀури гъахьунчва, кӀури, гьедрерхри.

¹⁷ Фицики му вари гъюз ккимбубдин гъарантутӀан дар, хъа улариз рябкъювал Месигь ву!

¹⁸ МютӀюгълуди хьуз ккунидари, малайикариз икрам апӀрудари учвук тахсир кипруси мапӀанай. Дурар чпин гьугъужвувалариъ ахьна. Давди, чпин фагьмиин элеъну, фурс апӀура – думу гьаму дюнʼяйинуб ву!

¹⁹ Аллагьдин ниятниинди вари беден аьхю хьпан бадали, табар-дюгьберихьди думу либхуз ва сатӀи апӀуз гъитрайиб – КӀул ву. Сарун дицдар адмийирин КӀулихъди аьлакьа имдар.

²⁰ Учву, Месигьдихъди дукӀнайидар, му дюнʼяйин кьудратарихьан азад вуйиган, дюнʼяйиндариси, гьамци кӀури, къайдйир гьаз уьрхюрачва:

²¹ «Мидик мукуркьан!», «Мунуб мипӀан!», «Гьамунубдик мукучан!»

²² Гьаму вари гъадагъа дапӀнайиб ишлетмиш апӀруган, жвартӀ шлу мутмйирикан къайдйирна аьдатар арайиз дуфнадарин?

²³ Диндин аьдатариз мютӀюгъваликан, жвув гьадатӀуваликан, бедендиз ккуниб дарапӀуваликан кӀуру гьамцдар къайдйир, зиълан гъилигган, фагьумлударси рякъюру. Амма дурари бедендин тямягьариз къаршу дийигъуз кюмек апӀдар!