Колосс 1 - Гирами Китаб

Месигьдиз лигурайиган, Аллагь рякъюрухьуз

¹ Аллагьдин амриинди Месигь Исайин вакил Павелихьан ва Тимофей гъардшихьан

² Колосс шагьриъ айи Месигьдихъди гьякь гъардшар вуйи Аллагьдин гирами халкьдиз – саламар. Адаш Аллагьдихьан учвуз ужʼвал ва мясляаьт ибшри!

³ Учу гьаммишан учвхъан Аллагьдиз ккарагурайиган, ихь Агъа Иса Месигьдин Адашдиз баркалла кӀурача.

⁴ Учуз Месигь Исайихъ ичв хъугъуваликан ва Аллагьдин вари гирами халкьдихьна вуйи ичв ккуниваликан деебхьначуз.

⁵ Учвуз аьршариъ ккилибгурайи умудну хъугъувал ва ккунивал арайиз хуру. Улихьди учвуз дидкан гьякьвалин гаф – Ужувлан хабар гъеебхьунчвуз.

⁶ Ужувлан хабар учвухьна гъафну. Учву, гьякьвали абцӀнайи Аллагьдин ужʼвал деебхьну, гъавриъ ахъунчву. Думу йигъхъанмина Ужувлан хабар, ичв арайиъси, вари дюнʼяйиъ рабгъура ва диди чан бегьер хура.

⁷ Учвуз дидкан Эпафрасди гъапунчвуз. Эпафрас, ич масан гъуллугъчи, юкӀв хъипну, учву бадали Месигьдин гъуллугънаъ айир ву.

⁸ Дугъу учвуз Рюгьну багъиш дапӀнайи ичв масанваликан ктибтунчуз.

⁹ Магьа гьаддиз, учуз учвкан гъеебхьу йигъхъанмина, учвхъанди гьаммишан ккарагурача. Ккарагруган, Аллагьдин ният учвуз гьубкӀну аьгъю хьуб ва Гирами Рюгьну туврайи гьарсаб фагьумлувалин учву гъаври ахъуб, ккун апӀури шулча.

¹⁰ Учу гьацира, учву Агъайиз лайикьлуди яшамиш хьпан бадали, вари Гьадгъаз хуш вуйиси апӀбан бадали, учву апӀурайи гьарсаб ужувлан ляхниъ ужуб бегьер хьпан бадали ва учвуз Аллагьдикан аьгъюб артухътӀан артухъ ибшри кӀури, ккарагури шулча:

¹¹ гъит, учву гьаци хьпан бадали, Чан зурбавалина кьудратну учвуз сабурна ижмивал туври ва вари терефарихъанди учву мюгькам апӀри;

¹² гъит Адашдиз, Дугъу учвузра Чан гирами халкьдихъди сабси аквнан Паччагьлугъдиъ йишв улупбаз, шадди чухсагъул йипри.

¹³ Дугъу ухьу мучӀушнан гьюкмиккан ккадаъну, Чан масан Балин Паччагьлугъдиз гьаъну.

¹⁴ Гьадгъу ухьуз, гунгьарилан хил алдабгъну, азадвал тувунхьуз.

¹⁵ Гьадгъу дярякърайи Аллагь рякъюри ачмиш гъапӀунхьуз. Думу Сарпир ву. Думу арайиз гъабхи варибдин Зииналир ву.

¹⁶ Фицики завариъ ва жилариин алиб, рябкъюрайиб ва дярябкърайиб: Паччгьарин тахтар, агъаваликк ккайидар, гьякимар ва гьюкмар – вари Гьадгъу халкь гъапӀну, арайиз гъабхиб вари Гьадгъулантина гъабхьну ва Гьадгъаз кӀури айиб ву.

¹⁷ Думу фукӀа-мукӀа хьайиз Айир ву. Гьадгъаъ варибдин сабвал ва къайда гъабхьну.

¹⁸ Гьадму ву Бедендин кӀул, яна Аллагьдихъ хъугърударин Аьхюр. Варибдин эвел – Гьадму ву. Варибдиъ сарпирди хьпан бадали, гъачӀидарикан чӀиви гъахьи Сарпир Гьадму ву,

¹⁹ фицики Аллагьдиз, вари тамамвал Гьадгъаъ ади хьуб ккун гъабхьну.

²⁰ Дугъу, хачриин Чан аьжалилантина вари жилинубдихъди ва аьршаринубдихъди мясляаьт йибтӀну, Чалантина Аллагьдихъди аьлакьайиъ тӀаъну.

²¹ Ичв чӀуру ляхнариланмина ухди гъярхьрайидар ва улʼан идитнайидар,

²² гьамус Дугъу учву, жилиин гъабхьи Чан бедендилантина, Чан аьжалилантина учву Аллагьдин улихь гирамиди, тахсир ктарди, марцциди дерккбан бадали, Аллагьдихъди албагунчву.

²³ Учву мици, хъугъувалин ижми ва мюгькам бинайиин дугъужвну ва Ужувлан хабарну учвуз бахш дапӀнайи умуднахъ хъади гъузиш, хьидичва. Думу Ужувлан хабарнакан учвуз гъеебхьунчвуз – аьршарин кӀанакк вари халкь дапӀнайибдиз дидкан хабар дебккна, ва узу, Павел, гьаддин гъайгъушнаъ айир вуза.

Павелин ляхнар – хъугърударин ужувлаз

²⁴ Гьамус узу учву бадали аьзабарикк ккуркьбиин шад вуза. Узу Месигьдин Беден бадали кьадар адру аьзабар аьгь апӀурайир вуза. Дугъан думу Беден – Чахъ хъугърудар ву.

²⁵ Аллагьдин ният тамам апӀбан бадали, узу думу хъугърударин гъуллугънаъ гъахьунза. Узуз Аллагьдин гафнакан гьубкӀну учвуз хабар дебккуз амур дапӀназуз.

²⁶ Думу Гаф агъзрар йисариъ вари насларихьан жиниди дюбхнайиб вуйи. Хъа гьамус думу Дугъан гирами халкьдиз ачмиш дапӀна.

²⁷ Аллагьди думу сирнан вари хазна ва ад Аллагь аьгъдру халкьариз улупуз кӀури ачмиш гъапӀну. Дидин сир Месигь ухьуъ яшамиш хьувалиъ а. Месигь ихь гъюз ккайи адлувалин умуд ву.

²⁸ Ари Гьадгъукан учвуз, Аллагьдин улихь Месигьдихъди гьуркӀну дугъужвуз шлуси, учхьан удубкьру фагьумлувалиинди, насигьят туври, аьгъювалар улупури, хабар дебккрача.

²⁹ Гьациб метлеб бадали узу, узуъ бегьемди артмиш шулайи Месигьди тувнайи кьувватниинди дяви гъабхури, жафа зигураза.