Галат 5 - Гирами Китаб

Ичв азадвал уьбхяй

¹ Месигьди ухьу, азад хьуз кӀури, ккадаъну. Гьаддиз ижмиди дийигъай, хъана лукӀʼвалин юрккгъиъ ичв кӀул мииванай!

² Узу, Павели, учвуз кӀуразачвуз: эгер аьдатариз дилигну, суннатар апӀури, Къанундиъ кӀурайибдихьна учву кьяляхъ хътакуруш, учвуз Месигьдикан вуйи гьич саб хайирра адарчвуз.

³ Узу учвуз хъана текрар апӀураза: аьдат бадали шли чан суннат апӀуз гъитиш, гьадгъу Къанундиъ улупнайи вари къайдйирна аьдатар тамам дапӀну ккунду.

⁴ Эгер Къанундиинди гьякь хьуз ичв умуд каш, гьамусдихъантина Месигьдихъди вуйиб гьич фукӀара адаричв ва Аллагьдин ужувлихьан жара гъахьунчва.

⁵ Хъа ухьу гьякь хьуз ихь умуд хъугъувалик кайихь ва Рюгьну ккилигуз кюмек апӀурахьуз.

⁶ Эгер Месигь Исайихъди ухьу саб вуш, адмийин суннат дапӀну а – адар, дурар сар сарихьан жара дар. Мушваъ айи метлеб – масанвалиланмина арайиз удубчӀвурайи хъугъвал ву.

⁷ Учву жаргъуб ужуди ккебгънийчва. Думуган учвуз шли машат гъапӀунчвуз ва гьякьнахъ хъпебехърудар шли ктаунчвукан?

⁸ Мидхъан шли хътаунчву? Учвуз дих ГъапӀури дици дарапӀур!

⁹ «Вари хямир утуз сацӀиб дун чӀяаьн ву»

¹⁰ Узу, Агъайихъди сабси, учву жара фикрариъ адрахърубдихъ, хъугъурза. Хъа ичв ара бикьурайидариз, чпи фужар вушра, жаза гьадабтӀиди.

¹¹ Гъардшар, эгер узу гьамусра суннатнакан ктибтуйиш, гьаз узухъ хъергуйихъа? Эгер узу гьамусра гьаци ктибтури имийиш, хачракан вуйи йиз аьгъювалари къаршувалар арайиз хидайи.

¹² Хъа ичв арайиъ гъипрайи футнакрари, неинки суннат, хъа чпин вари ккадатӀузра ккадатӀри!

¹³ Учвуз Аллагьди азадди яшамиш хьуз дих дапӀна, гъардшар. Аммаки, лигайгьа, ичв азадвал, ичв жандиз ккуниб апӀури хъаъру гунгьариз ишлетмиш апӀуз мигъитанай! Хъа учву чиб-чпин гъайгъушнаъ, масанди йихьай.

¹⁴ Гьаз гъапиш, мушваъ вари Къанун гьаму саб гафнаъ а: «Яв багахь хьайир, увуз увуси, ккун апӀин».

¹⁵ Хъа эгер учву, чиб-чпи кчӀвукьури ва чиб-чпин йикк ипӀури гъашиш, лигайгьа, учву чиб-чпи тӀанкь апӀуз мумкин ву!

Рюгь ва беден

¹⁶ Узу учвуз кӀураза: Рюгьну кӀурайиси яшамиш йихьай, ва гьадмуган, ичв жандин тямягьяриъ кӀулихъди ахъидарчва.

¹⁷ Ихь гунагькар бедендиз ккуниб – Рюгьназ ккуниб дар, хъа Рюгьназ ккуниб – ихь гунагькар бедендиз ккуниб дар. Дурар чиб-чпиз къаршу ву. Учвхьан учвуз ккуниб гьаддиз апӀуз шулдарчвухьан.

¹⁸ Эгер учву Рюгьну хъаъраш, ичв зиин Къанундин гьюкум гъубзрадар.

¹⁹ Гунагькар бедендин ляхнар варидариз рякъюрайидар ву. Дурарик кьяппавал, чиркинвал, хилʼан адахънайивал,

²⁰ идолариз икрам апӀувал, фал китувал, душманвал, гьюжатар, жарадариин хъугъвал алдрувал, хъял, учвтӀан даккнивал, гъярхьувалар, къаршувалар,

²¹ бахилвал, пиянвал, шадлугъар-кьяппавалар ва гьацдар жарадар кахьра. Узу учвуз улихьнасира гъапунза ва гьамусра кӀуразачвуз: гьаци апӀрударикан гьич саризра Аллагьдин Паччагьлугъдиъ ирс ккубкьидар.

²² Хъа Рюгьнан ляхнарик – масанвал, шадвал, мясляаьт, сабур, ужʼвал, хил ачухъвал, хъугъвал алди хьуб,

²³ гъянивал, жвув хилиъ дисувал кахьра. Гьамцдар ляхнариз закон лазим дар.

²⁴ Месигь Исайиндари, чпин гунагькар бедендин вари дерккуз даршлу ва чиркин тямягьяр хачрак карсна.

²⁵ Ухьу гьамус Рюгьнахъ хъайиган, гъачай, Рюгьну кӀурайиси, апӀурхьа!

²⁶ Гьаддиз, фурс кубчӀвуз гъузидархьа, чиб-чпик хъял капӀидархьа, чиб-чпʼин бахил шули хьидархьа!