Галат 4 - Гирами Китаб

Павелиз Галатдин хъугърудар ккунивал

¹ Учвуз сабсана мисал хибдиза: ирс рубкьуз ккайир, васиятниинди вари ирснан аьхюр учв вушра, бицӀиди имиди, лукӀрахьан сабдинра артухъ дар.

² Думу чан адашдин васиятнаъ улупнайи вахт гъяйизкьан, чан хулаз лигурайидарин ва чан гъайгъу зигрударин хиликк ккади шулу.

³ Ари гьаци ухьура ахьа: ухьу бицӀиди айиган, гьаму дюнʼяйин кьудратарин хиликк ккайхьа.

⁴ Аммаки Аллагьди, вахт гъабхьиган, Къанундиккди яшамиш шулайи дишагьлийи гъахи Чан Бай гьаъру.

⁵ Думу му дюнʼяйиз, Къанундин гьюкмиккди яшамиш шулайидар азад апӀбан бадали ва Аллагьди ухькан Чаз веледар ктаъбан бадали, гъафну.

⁶ Учву Чан веледар вуйиган, Аллагьди ичв кӀваъ, «Авва! Адаш!», кӀури, дих апӀру Чан Балин Рюгь аъну.

⁷ Гьаддиз, сарун уву лукӀди имдарва, хъа Дугъан бай духьнава. Хъа эгер уву Дугъан бай вуш, Дугъу увкан ирс рубкьурайир ктаъну.

⁸ Мугагьназ, учвуз Аллагь аьгъдру вахтари, учву аллагьар дару кучӀлин аллагьарин лукӀар вуйчва.

⁹ Гьамус, учвуз Аллагь аьгъю гъахьиган, яна дюзди гъапиш – Аллагьдиз учву аьгъю гъахьиган, гьаз учву хъана гьадму зяиф ва касиб дюнʼяйин кьудратарихьна хътакурачва? Гьадрарин лукӀвалиъ учӀвуз ккунди анчвуз?

¹⁰ Учву, саспи йигъар, вазар, йисан паяр ва йисар къайд апӀурачва.

¹¹ Амма учвуз ужувлаз вуйи йиз ляхнар, учвухь дав шул, кӀури, гучӀ казуз.

¹² Гъардшар, учвуз миннат вуйиз, узу фицир вуш, учвура гьацдар йихьай! Фицики узура учвусир даринхъа? Учву узуз гьич зат фукӀара чӀуруб гъапӀундарчва.

¹³ Учвуз аьгъячвуз: узу учвухьна сифте ражари гъафиган, иццурашра, учвуз Ужувлан хабарнакан ктибтуз гъабхьунзухьан.

¹⁴ Йиз уьзри учву узхьан ярхла гъапӀундайи. Узу даккун дапӀну, учву узхьан гьидицундайчва, хъа Аллагьдин малайикси, Месигь Иса Учвси, узу кьабул гъапӀнийчва.

¹⁵ Гьамус ичв думугандин гьевес-шадвал набши? Думуган, саб шак адарди кӀураза, лазим гъабхьнийиш, ичв ул узуз тувуз гьяйиф хьибдайчвуз!

¹⁶ Гьамус фу дубхьна? Учвуз гьякьнакан гъапну кӀури, узкан ичв душман духьнайин?

¹⁷ Пис хиялар ади ичв кӀулʼин аьхювал апӀуз ккуни адмийириз учву учхьан гьадатӀуз, хъасин учву, чипкан каркар ктатури дерккуз ккунди а.

¹⁸ Жвуван тереф бисуз гъитбаъ фукӀара чӀуруб адар, эгер ниятар ужудар вуш. Гьаци узу учвухъди гъузу йигъазтӀан дархьиди дарибшригьа.

¹⁹ Йиз ккуни веледар! Узу хъана уьзур-аьзиятниинди, учву тазатӀан бабкан шулайиси, Месигьдиз ухшар айидар шайизкьан, цӀийи алаидизачву!

²⁰ Гьаму ражари, узу учвухъди хъади, жараси улхуз ккунди айзуз! Узу учвʼин мюгьтал духьназа!

²¹ Учвуз Къанундиз мютӀюгъ хьуз ккунди анчвуз? Дици вуйиган, узуз йипай: Къанундиъ фу кӀураш, гъавриъ анчва?

²² Душваъ, Ибрагьимдихъ кьюр бай хъайи, кӀури, дупнаки, сар – гъараваш дишагьлийикан, тмунур

²³ – Аллагьди гаф тувнайиган – азад дишагьлийикан.

²⁴ Му ихтилатнаъ саб жини мяна а: кьюр дишагьли кьюб йикьрар вуди гьисаб апӀура. Дурарикан сар – Агар, Синай дагъдиин гъийитӀу йикьрар ву. Ари гьадму Агар лукӀ вуйи ва дугъан веледарра лукӀарди бабкан шули гъахьну.

²⁵ Агар Аравияйи айи Синай дагъ гьисаб ву, ва гьацира гьадму вахтари чан веледарра хъади лукӀвалиъ абхънайи Ерусалим.

²⁶ Хъа аьршарин Ерусалим – азадуб ву, ва гьадму – ихь дада вуйихь!

²⁷ Гирами китабариъ дибикӀна: «Шад йихь, бицӀидар даршлур ва бицӀидар дархир! ЧӀигъар апӀин ва гьарай ип, бицӀир апӀруган шлу аьзиятарикан хабар адрур! Фицики, ялгъуз дишагьлийин бицӀидар жилирихь хьайиринтӀан гизаф ву!»

²⁸ Учвура, гъардшар, гаф тувну бабкан духьнайи веледарси, Исакьдиз ухшар вучва.

²⁹ Аммаки, аьдати жюрейиинди бабкан духьнайир Гирами Рюгьниинди бабкан гъахьирихъ хъерграйиси, гьаму вахтарира гьаци шула.

³⁰ Гирами китабариъ фу кӀура? – «Азад дишагьлийин балихъди ирснан пай ккудрубкьбан бадали, лукӀ дишагьли, чан байра хъади, утӀукк».

³¹ Гьаддиз, гъардшар, ухьу лукӀран веледар дархьа, хъа – азад дишагьлийиндар!