Галат 2 - Гирами Китаб

Имбу вакилари Павелра вакил вуйиб гьисаб апӀура

¹ Хъасин, йицӀиюкьуд йислан, узухъди Варнавна Тит гъадагъну, хъана Ерусалимдиз гъафунза.

² Хъа узу дина, Аллагьди амур гъапӀиган, гъушур вуйза. Хъугънайидарин кӀулиъ айидарихъди, жаради гюрюшмиш гъахьиган, узу дурариз, йиз гъубшу ва гьамусдин жафа давди гъюдудубчӀвбан бадали, узу жугьуд дарудариз ктибтурайи Хабарнан мяна-метлебнакан гъапунза.

³ Дурари узухъди хъайи грекжви Титдиин, аьдатниинди суннат апӀин кӀури, гуж илипундайи.

⁴ Сакьюдар кӀучӀлин гъардшариз дугъахьди гьаци апӀуз ккун гъабхьну. Дурари ич арайиъ, хъана лукӀʼвалиъ ахъру аьдатарихьна учу кьяляхъ апӀуз ккунди, Месигь Исайиланмина айи ич азадвал шпионариси абгури гъахьну.

⁵ Хъа учу, Ужувлан хабарнан гьякь мяна-метлеб учвуз уьбхбан бадали, саб гагьдизкьан, дурари зигрушвахъинди хъипундарча.

⁶ Хъа хъугънайидарин кӀулиъ айидар, фужар вуш ва фужар вуди гъахьнуш, саб вузуз – Аллагьдин улихь вари адмийир саб ву. Дурари узкан йиз Хабарналан артухъ вуйиб фукӀара тӀалаб гъапӀундайи.

⁷ Дурариз, Ужувлан хабарнакан жугьдариз ктибтуб Петриин илипнайиганси, жугьуд дарудариз ктибтуб узʼин илипнайиб, гъябкънийи.

⁸ Фицики, Петри вакилвалин гъуллугънаъ жугьдарин арайиъ Дерккури, узура, Аллагь аьгъдрударин арайиъ гъуллугънаъ дерккунзу.

⁹ Узуз вакилвалин багъиш тувнайиб дурариз аьгъю гъабхьиган, хъугърударин гъваикк ккудукьнайи мурхьлар вуйи Якьубдина, Петрина, Югьанди, узузна Варнавдиз чпин хилар гьачӀарккунчуз. Му дурарин чпихъди учура саб ляхин апӀурайивалин лишан вуйи. Учу – Аллагь аьгъдрудариз, хъа чпи – жугьдариз Ужувлан хабарнакан ктибтуз гъягъюз дурар рази гъаши.

¹⁰ Дурари учкан саб тӀалаб гъапӀнийи: Ерусалимдиъ хъугърударин касибар кӀваин апӀуб. Йизра гьадрариз кюмек апӀуз лап яманди тямягь хъайиз.

Павели Петр дюз дарувал улупура

¹¹ Хъа Петр Антиохияйиз гъафиган, узу ачухъди дугъаз къаршуди удучӀвунза. Думу дюз дайи.

¹² Якьубди дина адмийир гьаайиз улихьна думу, жугьуд дарударихъди деъну, ипӀури вердиш вуйи. Хъа Якьубдихьан вуйидар Антиохияйиз гъафиган, Петр жугьуд дарударихьан гьудучӀвнийи. Дугъу дици, аьдатариинди суннат дапӀну ккунду, кӀурударихьан гучӀ кайивалиан гъапӀнийи.

¹³ Гьадгъуси, имбу жугьдарира кью-кьюб маш гъиву. Гьеле Варнавдира, гьаци, кьюб маш гъивнийи.

¹⁴ Узуз дурар Ужувлан хабарнан гьякь мяна-метлебнахьан гьудучӀвури гъяркъган, вари хьайишвахь Петриз гъапунза: «Эгер, уву, жугьуд, жугьуд дарурси яшамиш шулаш, уву гьаз жугьуд дарудариз, жугьдарси яшамиш йихь, кӀурава?»

¹⁵ Ухьуз, жугьдарди бабкан гъахьидариз, «жара гунагькар халкьаризси»

¹⁶ дарди, агъяхьуз, гьич сар адмийихьанра, Къанундиъ улупнайи аьдатар хъаъну кӀури, гьякь хьуз шлуб дар, хъа анжагъ Иса Месигьдихъ хъугъигантӀан. Гьаддиз, ухьура Месигь Исайихъ хъугънахьа, Месигьдихъ хъугънайивалиинди ухьу гьякь апӀруси, хъа Къанундин аьдатариинди гьякь хьуз шулдар, фицики, Къанундин аьдатариинди «яшамиш шулайидарикан гьич фужкӀара гьякь хьидар».

¹⁷ Эгер, Месигьдик кидикьну, гьякь духьнайиганра ухьу имбударси гунагькрар вуш, Месигь, гунгьар апӀинай, кӀури, дуфнайир вуйинхъа? ИкибаштӀан ваъ!

¹⁸ Эгер узу, мугагьназ гатӀахьу аьдатар, хъана хъаай кӀури хъюгъиш, узу Къанун чӀюбгъюрайи гьисаб ву.

¹⁹ Къанунди узу йивну гъакӀну, ва узу, Аллагьдиз яшамиш хьузди, Къанундиз дукӀнайир вуза. Месигьдихъди узура хачрак карсназу,

²⁰ сарун яшамиш шулайир узу дарза, хъа узуъ яшамиш шулайир Месигь ву. Ва, узу жилиин илмикьан гагьди, Аллагьдин Балихъ хъугъну яшамиш шулайир вуза. Гьаци узу яшамиш хьузди Дугъу, узу ккун дапӀну, Чан жан узхъанди тувну.

²¹ Дугъу узуз гьамци дапӀнайиган, фици узу Аллагьдин му багъиш гатӀабхьуза?! Эгер Къанундихьан адми гьякь апӀуз шуйиш, Месигь давди гъакӀнуки?!