Галат 1 - Гирами Китаб

Гьякь – саб Ужувлан хабартӀан дар

¹ Адмийири гьял дапӀну ваъ, я адмийин кюмекниинди ваъ, хъа Иса Месигьдин ва Думу гъачӀидаригъян за гъапӀу Адаш Аллагьдин кюмекниинди вакил гъахьи Павелихьан ва

² гьамшваъ узухъди хъайи вари гъардшарихьан – Галатдиъ айи хъугърударин жямяаьтриз саламар.

³ Ужʼвал ва мясляаьт учвуз, ихь Адаш Аллагьдихьан ва Агъа Иса Месигьдихьан.

⁴ Дугъу, Адаш Аллагьдин ният тамам гъапӀну, писвали агъавал апӀурайи гьаму дюнʼяйин гьюкмиккан ухьу азад апӀбан бадали ихь гунгьарихъанди Чан жан тувну.

⁵ Гьадгъан ад – аьсрариан аьсрариз ибшри. Амин.

⁶ Учву гьамкьан ухди, Чан зурба вуйи ужувлиинди учвуз дих ДапӀнайирихьан гьидицну, саб жара ужувлан хабарнахъ хъергуз кьаст дапӀнайивалиин гъах духьназа.

⁷ Ужувлан хабар сарун жараб айиб дар! Ичв ара бикьурайи, Месигьдикан вуйи хабар айтӀлан апӀуз ккуни адмийир а.

⁸ Эгер шли ичв арайиъ, учвуз дебккнайи Ужувлан хабарналан гъайри, сарун жара гьациб хабар ипраш, гьациб хабар ипрайир, узу вушра, завариан малайикди гьаци апӀурашра – гъит гьаци апӀурайир, жегьеннемдин цӀигъ гъяхъри!

⁹ Улихьнаси узу гъапнийзаки ва гьамус хъана текрар апӀураза: гьарсар, учвуз тувнайи Ужувлан хабарналан гъайри фукӀа-мукӀа жараб кӀуру кас жегьеннемдин цӀигъ гъяхъри!

¹⁰ Узуз гьапӀуз ккунди а: адмийири йиз тереф бисуз гъитуз, даршиш – Аллагьди? Хъа узу, адмийириз ккуниб апӀуз хъюгънайир вуйинхъа? Эгер узу адмийириз ккуниб апӀурайир вуйиш, узу Месигьдин лукӀ хьидайза.

Павелиз кьувват Аллагьди тувну

¹¹ Гъардшар, узуз учвуз аьгъю дубхьну ккундузуз: узу учвуз ктибту Ужувлан хабар адмийирихьан гъафиб дар.

¹² Узуз думу адмийирихьан гъебхьуб дариз, я адмийири улупуб дариз, хъа Иса Месигьди узуз думу ачмиш гъапӀунзуз.

¹³ Учвуз, узу Къанун гьярф-гьярфди тамам апӀру жугьуд вуйиган, гьич саб инсаф адарди, Аллагьдихъ хъугърударихъ, терг апӀури, хъергрур вуди хьуваликан, гъеебхьунчвуз.

¹⁴ Йиз таярик узукьан жугьуд дин улихь гъабхру кас адайи, абйирин аьдатар алдарди тамам апӀуйза.

¹⁵ Хъа Аллагьди Чан ужувлиинди Чан гъуллугънаъ хьуз узу ктагъну. Дугъан гьациб ният узу бабкан хьайиз айи.

¹⁶ Дугъу Чан Бай узуз ачмиш апӀуру ва Гьадгъукан Аллагь аьгъдру халкьариз Хабар дебккуз гъитру. Думуган узу гьич сар касдихьнакьан, насигьят ккун апӀури, гъушундарза.

¹⁷ Узу Ерусалимдиз узутӀан ухди вакилар гъахьидарихьнакьан гъушундайза, хъа Аравияйиз гъушунза, хъасин Дамаскдиз кьяляхъ хътакунза.

¹⁸ Хъасин, шубуд йис гъубшиган, узу Ерусалимдиз Петр рякъюз гъафунза. Дугъахь йицӀихьуд йигъан гъузунза.

¹⁹ Хъа имбу вакиларикан узуз, Агъайин гъардаш Якьубдилан гъайри, фужкӀара гъяркъюндарзуз.

²⁰ Узу учвуз бикӀурайиб кучӀал дариз, Аллагь шагьид ишри!

²¹ Хъасин узу Сирияйизна Киликияйиз гъушунза.

²² Ягьудияйиъ айи Месигьдихъ хъугърудариз машна-машди узу таниш дар.

²³ Узкан дурариз аьгъюб: «учухъ мугагьназ хъергрури улихьди чав тӀанкь апӀурайи хъугъуваликан ктибтура» кӀурубтӀан дайи.

²⁴ Узу гьаци гъахьну, кӀури, дурари Аллагь адлу апӀуйи.