Филипп 4 - Гирами Китаб

Аллагь ву умуднан, шадвалин ва мясляаьтнан булагъ

¹ Магьа гьаддиз, йиз ккуни ва дярякъди ктирсуз даршлу гъардшар, ккунидар, йиз шадвал ва гъалибвалин таж, Агъайихъди сатӀиди, ижмиди дийигъну гъузай!

² Узу Эводияйиканна Синтихияйикан ккун апӀураза: Агъайин ччвур бадали албагну яшамиш йихьай!

³ Узу увканра, йиз дугъри вуйи Сизиг, ккун апӀураза: миннат вуйиз, кюмек апӀин гьадрариз, фицики дурар кьюридра Ужувлан хабар бадали, узухъди, Клементдихъди ва имбу йиз юлдшарихъди (дурарин ччвурар Уьмрин китабдик ка), гъилихну.

⁴ Агъайихъди саб духьну, гьаммишан шадвал хъапӀай! Хъана кӀураза: шадвал хъапӀай.

⁵ Гъит варидариз ичв фурс ктрувал рябкъри. Агъа магьа багахь хьа!

⁶ Гьич сабдинна гъайгъушнаъ махьанай. Аммаки фицдар гьялариъ ашра, ккарагай, ккуниб ккун апӀури, илтӀикӀай, ясана, чухсагъул кӀури, илтӀикӀай, гъит ичв тӀалабар Аллагьдиз аьгъю ишри.

⁷ Хъа Аллагьдихьан гъюрайи, гъавриъ ахъуз даршлу, заан вуйи мясляаьтну, ичв юкӀвар ва фикрар Месигь Исайиъ уьрхиди.

⁸ Аьхирки, гъардшар, гьарган гьякь вуйибдикан, лайикь вуйибдикан, дюзваликан, марццибдикан, бегелмишубна гьяйранубдикан, намуслуваликан ва тярифариз лайикьубдикан фикир апӀинай.

⁹ Узхъан гъудубгъуб, узхьан гъурубкьуб, узкан гъеебхьуб, узуъ гъябкъюб – вари тамам апӀинай, ва гьадмуган мясляаьтнан булагъ вуйи Аллагь учвухъди хьиди.

¹⁰ Учву хъана йиз гъайгъушнаъ учӀвну, узухъди илтӀикӀиган, узу йиз вари юкӀв хъипну Агъайихъди сабси шадвали гъадагъунза. ИкибаштӀан, учву гьаммишан йиз гъайгъушнаъ ачва, хъа гьамусдизкьан учвуз ичв гъайгъу узуз улупуз мумкинвал адайчвуз.

¹¹ Узу мици, учвкан фу-вуш ккунди айивалиан кӀурайиб дариз, фицики, узу фициб гьялнаъ ахънашра, узуз айибдиин разиди гъузуз гъудубгъунза.

¹² Узуз, касибди вушра ва ацӀну ашра, яшамиш хьуз аьгъязуз. Узʼин вариб улубкьунзуин ва варибдихьна гьязурра вуза: тухъвалихьна ва гашʼвалихьна, девлетлуварихьна ва касибвалихьна.

¹³ Узуз кьувват Туврайирин кюмекниинди вари шулзухьан.

¹⁴ Хъа вушра, узухъди йиз дердер учвура пай апӀуб ужу гъапӀунчва.

¹⁵ Учвуз аьгъячвуз, Филиппдин агьлар, узу Македонияйиан удучӀвну, Ужувлан хабар рабгъуз хъюгъхъанмина, учвлан гъайри, Аллагьдихъ хъугърударин гьич саб жямяаьтди кюмек гъапӀундарзуз.

¹⁶ Учву Фессалоникдиз кмидира швнубсабан йиз яшайишдиз кюмек хътапӀури гъахьунчва.

¹⁷ Мици узу, учвхьан хъана гизаф пешкешар гъадагъурза, кӀури, ваъ, хъа учвуз ичв пулилантина хъана гизаф хайир хьпан бадали апӀурайиб вуйиз.

¹⁸ Хъа узуз вари гьубкӀну азуз, гьамус узуз ккунибтӀан гизафра кади азуз. Учву хътапӀуб вари Эпофрадитди тувунзухьна, гьамус варибдихъди ацӀназа. Ичв багъишар Аллагьдин хулаз гъабхи «ицци ниъ хъади убгрубси», «кьабул шлу гъурбан, Аллагьдиз хуш вуйи гъурбанси» гьисаб апӀуз шулу.

¹⁹ Ва йиз Аллагьдира Чан зурба вуйи девлетниинди, Месигь Исайилантина вари учвуз ккунди имбубдихьди артухъра кади ацӀдичва.

²⁰ Аьсрариан аьсрариз ихь Адашдин, Аллагьдин ад ибшри. Амин.

²¹ Месигьдианмина Аллагьдин гирами халкьдик кидикьнайи варидариз саламар йипай. Узухъди хъайи вари гъардшарира учвуз саламар хътаура.

²² Аллагьдин вари халкьди, иллагьки Римдин паччагьдин хулариъ гъуллугънаъ айидари, учвуз саламар хътаура.

²³ Агъа Иса Месигьдин ужʼвал, гъит, гьарган ичв рюгьнахъди ибшри!