Филипп 1 - Гирами Китаб

¹ Месигь Исайин гъуллугъчйир вуйи Павелихьанна Тимофейихьан – Филиппдиъ айи Месигь Исайихъди саб вуйи Аллагьдин хъугърудариз, гьадму хъугърударин аьхюдариз ва дурарин кюмекчйириз.

² Ужʼвал ва мясляаьт учвуз, ихь Адаш Аллагьдихьан ва Агъа Иса Месигьдихьан!

Павелин миннат

³ Гьар ражари учву кӀваин апӀури, узу йиз Аллагьдиз баркаллагь кӀураза.

⁴ Гьар ражари учвхъан ккарагруган, узу шадвалиинди ккарагури шулза,

⁵ гьаз гъапиш учву Ужувлан хабар рабгъбаъ сифте йигъариланмина гьамусдизкьан иштирак шулачва.

⁶ Учвуъ гьадму ужуб ляхин Ккебгъури Месигь Исайин Йигъазкьан гьадму ляхин гъабхиди ва гьадмуган ккудубкӀиди.

⁷ Дугъридан, учвухьна вуйи йиз гьиссар ари гьацдар духьну ккунду! Узу дустагъдиъ айиганси, адруганра – узу Ужувлан хабар, дидʼин алжагърударихьан уьбхюрайиган ва думу дугъри вуйиб тасдикь апӀруган, узуси учвура гьадму ужувлан гъуллугънаъ гъахьунчва.

⁸ Месигь Исайин Чан юкӀвси йиз юкӀв фициб убцру масанвалиинди учвухьна вуйиш, магьа Аллагь шагьид ву!

⁹ Узу, ичв масанвал хъана артухъ аьхю хьпан бадали ва гьякь аьгъюваларина сагъу фагьумлували учву ацӀбан бадали, ккарагураза.

¹⁰ Гьаддиз учвхьан учвуз ужубсиб гъядябгъюз хьибдичвухьан; учву Месигь хъадакну гъюру Йигъан марцциди ва саб тахсир ктарди гъуздичва;

¹¹ учвхьан Аллагьдин ад ва тяриф апӀуз шлуси, Иса Месигьдин кюмекниинди гьякьʼвалин бегьер хуз хьибдичвухьан.

Павели аьгь апӀурайи дарвалари Аллагьдин ляхнариз кюмек апӀура

¹² Учвуз аьгъяди ккундузуз, гъардшар: узухъди гъахьи гьядисйир Ужувлан хабар рабгъуз кюмек гъахьну.

¹³ Римдин паччагьдин хулан гъулугънаъ айи эскраризра ва вари жарадаризра узу Месигьдин кӀуллан дустагъдиъ итнайиваликан аьгъя.

¹⁴ Узу дустагъдиъ итну кӀури, Агъайихъди саб вуйи гизаф гъардшар, саб юкӀв айиганси, уч гъахьну ва хъана ачухъди ва гучӀ ктарди Аллагьдин гафнакан ктибтури гъахьну.

¹⁵ Дюз гъапиш, дурарикан сакьюдари Месигьдикан хабар чпин арайиъ бахилвал, талит ади дебккра, хъа жарадари – ужудар ниятар ади.

¹⁶ Му адмийири мици узу ккунивалиан апӀура, дурариз, узу, Ужувлан хабар уьбхюз кӀури, Аллагьди дерккнайиваликан аьгъя.

¹⁷ Хъа гьацдарра аки, Месигьдикан хабар чпин хайирнахъди рабгърударра. Дицдари Хабар марцци кӀваан рабгъури шулдар, дурари дици, узу йитӀнайи зунжрар ижми ва гъагъи апӀуз ккунди айидариси апӀура.

¹⁸ Фу пухьахъа? Дурари чӀуру вая марцци ният ади кӀурашра, Месигьдикан кӀура – гьаддиз узу гьацибдизра рази вуза. Узу шадвали ацӀдиза,

¹⁹ фицики ичв ккарагбарина, Иса Месигьдин Рюгьнан кюмекнуна ва гьамци хьпу узу азад апӀруб, аьгъязуз.

²⁰ Му йиз ижми умударихъдина ккилигурайиваларихъди сабси гъюра. Ва, гьаци вуйиган, узу нач шлуси апӀидарза, хъа мугагьназси гьамусра гьаци кӀубанди хьидиза, ва, узу чӀивиди гъузишра, гъачӀишра, йиз бедендиъ Месигь за дапӀну хьиди.

²¹ Фицики йиз уьмур Месигь вуйиз, аьжал – узуз гъурубкьу мутму.

²² Хъа эгер узу йиз бедендиинди яшамиш шули гъузиш, узу бегьерлуди лихувал хьибди. Гьаци вуйиган, узу узуз фу ктабгъурушра, аьгъдарзуз.

²³ Йиз ниятназ дилигди, гьадму кьюб рякъкан узу саб рякъ ктабгъну ккунду. Узуз, му дюнʼяйиан душну, Месигьдихъди шлу рякъ ктабгъуз ккундузуз, мици гъабхьнийиш, икибаштӀан, лап гизаф ужу вуйи.

²⁴ Хъа узу му дюнʼяйиин гъузиш, ичв хайирназ хьибди, гьаддиз, мунуб рякъ хъа гизаф ужуб ву.

²⁵ Му гьаци вуйиган, узу гьамушвʼин гъузруб аьгъязуз. Узу, учву хъугъувалиъ улихь гъягъюз ва ичв хъугъували хурайи шадвал артухъ хьуз, учвухъди гъуздиза.

²⁶ Узу хъана учвухьна гъафиган, узлантина Месигь Исайиинди хъа артухъ фурс апӀуз хьибдичвухьан.

^27-28 Фицдар гьялариъ ахъишра, Месигьдин Ужувлан хабар ктибтуз лайикьлуди гъузай! Узу учвухьна гъафиган, рябкъруси, хъа гъюз дархьиш, узуз ебхьруси саб хилди, Ужувлан хабар бадали, жафа зигури ва гьич сарихьдира учвуз гучӀ ккапӀуз гъидритди яшамиш йихьай. Гьамциб ичв дирбашʼвал дурариз чпи тӀанкь шлувалин лишан хьибди, хъа учву дюрхну хьиди, мурар вари Аллагьдин ляхнар хьиди.

²⁹ Аллагьди учвуз Месигь бадали хъугъувал ва Месигь бадали аьзабар аьгь апӀуб тувна.

³⁰ Фицики узу, учвуз рябкъюри, ичв улихь гъубхубсиб дяви учвура гъабхурачва. Узу думу, учвуз аьгъюганси, гьамусра гъабхураза.