Филимондиз 1 - Гирами Китаб

¹ Иса Месигьдихъ хъугъру кӀури дустагъ дапӀнайи Павелихьанна гъардаш Тимофейихьан – ухьухъди гъуллугънаъ айи, ккуни вуйи Филимондиз

² ва яв хулаъ уч шулайи вари хъугърудариз, ккуни чи Апфияйиз ва ухьухъди гъуллугънаъ айи Архипдиз.

³ Ихь Адаш Аллагьдихьан ва Агъа Иса Месигьдихьан ужʼвал ва мясляаьт ибшричвуз.

Павели саб ляхин тӀалаб апӀура

⁴ Йиз ккарагбариъ уву кӀваин апӀури, увхъан Аллагьдиз гьаммишан чухсагъул кӀураза,

⁵ гьаз гъапиш, узуз Агъа Исайихьна ва вари гирами халкьдихьна вуйи яв хъугъуваликан ва масанваликан ебхьури шулзуз.

⁶ Учухъди пай апӀурайи яв хъугъували, Месигьдихъди учуз айи вари ужубдин увура гъаври ахъбан бадали ккарагураза.

⁷ Яв масанвали узу гизаф шад гъапӀну ва ккаарцну, гьаз гъапиш, уву, гъардаш, Аллагьдин халкьдин юкӀвар архаин гъапӀунва.

⁸ Ва гьаддиз, узхьан, Месигьдин вакилихьан, увуз яв буржйир тамам апӀин кӀури, саб нач-гучӀ адарди пуз шулушра,

⁹ узу увухьна, тӀалаб апӀури илтӀикӀуб хъана ужу ву кӀури, гьисаб апӀураза, фицики узуз уву масанди вузуз. Узу, Павели, Месигь Исайи гьаънайири ва Гьадгъулантина дустагъ дапӀнайири,

¹⁰ узуз гьаму дустагъдиъ байси гъахьи йиз бай Онисимдихъан тӀалаб апӀуразавукан.

¹¹ Саб фила-вуш думу узуз гьич саб ляхнизра хай вуйир дайи, хъа гьамус думу гьам увузра, ва гьам узузра хайирлу кас ву.

¹² Думу узу увухьна кьяляхъ хътаураза, амма думу узкан ктабтӀу йиз пайси вузуз!

¹³ Думу гьамушваъ, дустагъдиъ узу Ужувлан хабарнан кӀуллан итнайишваъ, яв ерина узуз кюмек апӀбан бадали, узухъди гъитуз ккундийзуз.

¹⁴ Яв разивал дарди, дици апӀуз ккун гъабхьундарзуз. Гъит яв ужувлан ляхин яв хушниинди вуйиб ибшри, хъа гуж апӀбиинди ваъ.

¹⁵ Мумкин ву, саб вахтназ думу увухъди дархьуб, хъасин гьаргандиз увухъди хьиди,

¹⁶ амма лукӀси ваъ, хъа, лукӀтӀан гизаф заина вуйи ккуни гъардашси, иллагьки, узуз ккуни. Думу увузра гьам инсанси, гьамсана Агъайилантина вуйи гъардашси багьа шулу!

¹⁷ Гьаддиз, ухьу саб ляхин апӀурайиган, увухьна гъафи узу кьабул апӀруси, думура кьабул апӀин.

¹⁸ Хъа эгер, думу яв улихь тахсиркар вуш, ясана думу увуз фу-вуш буржлуди гъузнаш, думу бурж узук кайи гьисаб апӀин.

¹⁹ Магьа узу увуз йиз хилариинди бикӀураза: «Узу, Павели, яв зарар ккебкуб кӀулʼин гъадабгъураза». Гьеле узу, уву узуз буржлу вуйибдикан гафкьан кӀурира адарза. Уву яв увʼинди йиз улихь буржлу вува!

²⁰ Ав, гъардаш, Агъа бадали гьамус узуз увканра хайир дубхьну ккундузуз. Месигьдиланмина уву йиз гъардаш вуйивализ дилигну, йиз юкӀв сикин апӀин.

²¹ Уву узухъ хъпехъур кӀури, миж кади, увуз бикӀураза. Уву йиз тӀалаб узу ккун апӀурайибтӀан артухъра кади, тамам апӀруб аьгъязуз.

²² Мидихъди сабси, узуз хялижвувазси, саб халра гьязур апӀуб ккун апӀураза. Ичв ккарагбарин кюмекниинди Аллагьди узу гьаму багарихьди учвухьна гьаърубдик умуд кайиз.

²³ Увуз саламар хътаура узухъди дустагъдиъ айи йиз юлдаш Эпафрасди, думура Месигь Исайин кӀуллантина дустагъдиъ айир ву.

²⁴ Гьацира саламар хътаура узухъди гъуллугънаъ айи Маркди, Аристархди, Демасди ва Лукайи.

²⁵ Агъа Иса Месигьдин ужʼвал гьарган ичв рюгьнахъди ибшри!