Фессалоник-2 2 - Гирами Китаб

Агъа гъяйиз гизаф писвал хьибди

^1-2 Хъа гьамус ихь Агъа Иса Месигь кьяляхъ гъюбкан ва Дугъу ухьу фици сатӀи апӀуруш гьаддикан. Учу учвкан, гъардшар, ичв кӀулар дудругуб, ва, я пайгъамбарваларихьан, я ачмиш апӀуваларихьан, я кагъзарихьан, гъеле думу кагъзар учхьан вуйидар ву кӀури, эгер дурариъ Агъайин Йигъ сарун гъабхьну кӀури дибикӀну ади гъабшишра, улдудугувалиъ адрахъуб ккун апӀурача.

³ Гьич сарихьдира учву алдатмиш апӀуз мигъитанай – гьич саб жюрейииндира. Гьаз гъапиш, сифте, Аллагьдиз къаршуди, зурба вуйи гъедергувалар арайиз дуфну ккунду, писвал арайиз адмийиинди удубчӀвиди (думу адми, аьжализ кадатӀнайир ву),

⁴ къаршур, аллагьдинубдик вая гирами вуйибдик гъилигган, учв варитӀан зина вуза, кӀури, гьисаб апӀури хьиди, гьаци, гьеле думу Аллагьдин хулаъра кмиди деъди ва дугъу Аллагь учв вуза пиди.

⁵ Ичв кӀваин илмидарничв? Узу мидкан учвуз, учвухь хьайиган, гъапнийза аьхир.

⁶ Гьамус учвуз аьгъячвуз, гьаз думу къаршу вуйир чан вахт гъяйиз дерккнаш.

⁷ Фицики писвалин жини кьувватари чпин ляхин гьамустӀанра гъабхура, хъа сабан думу къаршу вуйириз рякъ гьадабтӀнайир дугъан рякъʼан удучӀвну ккунду.

⁸ Хъа гьадмуган думу душман ачухъ хьиди, хъа Агъа Исайи Учв гъафи гьадму Йигъан, гьеле Чан ил хътабгъбан адлувалин нурниинди думу тӀанкь апӀиди.

⁹ Писур гъювал ШейтӀнин хиларин ляхин ву. Думу писвал гьубкьу жюрейин аьламатар ва гъавриъ ахъуз даршлу кучӀлин лишнар улупбариинди

¹⁰ ва гьацира гьар жюрейин пис аьмалдарвалариинди арайиз удубчӀвиди. Дугъахъди аьжализ гъягърудар хьиди, гьаз гъапиш дурари гьякьвалихьна вуйи масанвал тина гъапӀнийи, хъа гьаддиинди дурарихьан чпи уьрхюз шуйи, аьхир.

^11-12 Ва гьаддиз Аллагьди дурар, гьякьвалихъ хътругъди, писвал ктабгъдар, кучӀларихъ хъугъбан бадали ва гьациб жюрейиинди жаза адабтӀну гъитуз, кучӀлин гьюкмиъ итра.

Учву уьрхбан бадали кадагънайидар ву

¹³ Учвхъан, гъардшар, гьаммишан учу Аллагьдиз баркаллагь пуб рубкьура, Агъайин ккунидар! Фицики, учву марцц апӀурайи ва ичв хъугъувал гьякьвализ илтӀикӀурайи Гирами Рюгьнан кюмекниинди Аллагьди, учвуз сифте уьрхювал хьпан бадали, Дугъу учву ктагъну.

¹⁴ Гьаддиз Дугъу учвуз, ихь Агъа Иса Месигьдин адлувал пай апӀбан бадали, учу гъабхи Ужувлан хабарниинди дих гъапӀну!

¹⁵ Гьаци мюгькамди дийигъну гъузай, гъардшар! Учу учвуз ушвналан ва кагъзариинди улупу аьгъюваларихъан ижмиди хъичӀихну гъузай,

¹⁶ ва гъит ухьу ккун гъапӀу, ва Чан ужувлиинди ухьуз зат ккудудубкӀру ккарцувал ва ужувлан умуд багъиш гъапӀу Чав, Агъа Иса Месигьди, ва Аллагьди, ихь Адашди,

¹⁷ ичв юкӀвариъ ккарцувал тӀапӀри ва гьарсаб ужувлан ляхниз ва гафназ мюгькам апӀри.