Фессалоник-1 5 - Гирами Китаб

Агъа гъюрайивалихьна гьязурди гъузай.

¹ Фуну вахтари ва фуну йигъан Думу гъюруш, гъардшар, учвуз дидкан бикӀуб лазим дар.

² Учвуз лап ужуйи аьгъячвуз Агъайин Йигъ, йишвну тӀафалси, кӀваин алдруган, гъюру.

³ Адмийири: «Варишвариъ мясляаьт а ва гьич саб жюрейинра хатӀа имдар!» – пуз хъюгъиган, бицӀир кайи дишагьли сабпну бицӀир апӀуз иццрушну гъадагърубси, гьадмуган дурариина аьжал гъядябхъиди, ва дурарихьан гьергбиинди чпи уьрхюз хьибдар!

⁴ Хъа учву, гъардшар, мучӀушнаъ адарчва, ва гьадму Йигъандин аквну, тӀафлиси, мюгьтал апӀидарчву.

⁵ Фицики учву вари аквнан ва йигъандин веледар вучва. Ухьу мучӀушнакна йишвак кахьрадархьа.

⁶ Гьаддиз, имбударси, даахну гъуздархьа! Ачухъ фагьум ади ва кӀубанди гъуздихьа!

⁷ Йишвну нивкӀу улар удутӀнайидар ахури шулу, хъа пиянискийир ярхи йишвди убхъури шулу, аьхир.

⁸ Хъа ухьу, йигъан аквнак кахьрайидар, ачухъ фагьум ади хьидихьа ва хъугъвалинна масанвалин халариъ учӀвдихьа, кӀулʼин ухьу уьрхру пӀапӀах улубкӀидихьа!

⁹ Гьаз гъапиш Аллагьди ухьуз Чан хъял улупнадар, хъа, ихь Агъа Иса Месигьдиланмина вуйи ухьу уьрхювал улупна.

¹⁰ Гьаддиз ухьу дийихну ашра, адаршра, ухьу гьаммишан Гьадгъахъди хьуз кӀури, Думу ухьхъанди гъакӀну.

¹¹ Гьаци вуйиган, чиб-чпик юкӀв капӀри йихьай ва чиб-чпиз хил туври апӀинай – му учву апӀурачва.

¹² Учвкан ккун апӀурача, гъардшар, учву Агъайихъ хъаърайидариз ва, гьарсаб улупури, кӀваантӀан жафа зигурайидариз артухъ гьюрмат апӀури йихьай.

¹³ Дурари апӀурайи ляхниз дилигну, дурариз аьхю масанвалиинди гьюрмат апӀинай. Чиб-чпихъди мясляаьтниинди гъузай.

¹⁴ Гъардшар, учвкан ккун апӀурача: ляхин апӀуз даккнидарин кӀулиъ аькьюл апӀай, кагьлидариъ кӀубанвал тӀапӀай, зяифдариз гъюн ккивай, варидарихъди сабурлу йихьай.

¹⁵ Лигайгьа, ичв арайиъ гьич сарира чӀурувализ чӀуру жаваб тутруври. Гьаммишан, чиб-чпихьна шлуси, варидариз ужувлиинди йихьай.

¹⁶ Гьаммишан шадвалиъ гъузай,

¹⁷ зат сикин дарди ккарагури йихьай,

¹⁸ варибдиз чухсагъул йипай – магьа учвуз, Месигь Исайихъ хъугърудариз вуйи Аллагьдин ният.

¹⁹ Рюгь мукутӀуршванай,

²⁰ пайгъамбарвалин гафар тина магьадаанай,

²¹ хъа вари ахтармиш апӀури, ужувлан тереф дибисну, гъузай,

²² жюрбежюр писваларихьан ярхла йихьай!

²³ Гъит мясляаьтнан Аллагьди Чав учву гьуркӀну гирами апӀри. Ва гъит вари учвуъ: рюгьра, юкӀвра, жанра – ихь Агъа Иса Месигь гъюру гьадму Йигъаз саб зиян ктарди уьрхри.

²⁴ Учвуз дих АпӀурайир аьгьтлу ву, ва Гьадгъу му тамамра апӀиди!

²⁵ Гъардшар, учхъанра ккарагай!

²⁶ Вари гъардшариз гирамивалин мак апӀбиинди салам тувай.

²⁷ Агъайин ччвурнахъан миннат апӀураза, гьаму кагъаз вари гъардшариз урхай.

²⁸ Ихь Агъа Иса Месигьдин ужʼвал учвухъди ибшри!