Фессалоник-1 3 - Гирами Китаб

¹ Ва гьаддиз, сарун учхьан учву дарди гъузуз даршлуган, Афинайиъ учу ялгъузди гъузуз кьаст гъапӀунча.

^2-3 Хъа ихь гъардаш Месигьдикан Ужувлан хабар рабгъру Аллагьдин гъуллугъчи Тимофей учвухьна гьаъдича. Дугъу учвуз читин хьибган, кюмек апӀиди, ккарцциди ва ичв хъугъувал мюгькам апӀиди. Учвузра аьгъячвуз гьацдар аьзабар ухьʼин алахьруб.

⁴ Гьеле учу учвухъди хъайигантӀан ухьʼин аьзабар улукьрубдикан кӀури гъахьунча. Учвуз аьгъюганси, гьаци хьузра гъабхьну.

⁵ Ва гьаддиз узхьан сарун, ккилигури, аьгь апӀуз шули амдруган, ичв хъугъуваликан аьгъю апӀуз Тимофей гьаунза. Алдатмиш духьну, учву рякълан улдугнийкӀан кӀури, ва ич жафйир дав гъахьнукӀан кӀури, гучӀури гъабхьунзуз.

⁶ Амма учвхьан кьяляхъ гъафи Тимофейи ичв хъугъуваликан ва масанваликан, учву учу ич ужудар ляхнариинди кӀваин уьрхюрайиваликан ва ич учву рякъюз юкӀв хъайиси, ичв учу рякъюзра юкӀв хъимбуваликан ужудар хабрар гъахну.

⁷ Гьаддиз, гъардшар, вари гьаму бедбахтвалариъ ва гьергувалариъ айи учу ичв хъугъували ккарцури гъахьну.

⁸ Учву ижмиди Агъайихъди хъайивали учура уьмриъ шад апӀуру.

⁹ Ихь Аллагьдин улихь учву учуз туву му шадвалин гьякьнаан Аллагьдиз фициб чухсагъул кӀуру?!

¹⁰ Аллагьди учву рякъюз мумкинвал туври кӀури ва ичв хъугъувалиъ учвуз гьудрубкӀрубдин кюмек ибшри кӀури, эргвал аьгъдарди, учу йишв ва йигъ ккарагурача.

¹¹ Гъит Чав Аллагьди, ихь Адашди, ва ихь Агъа Исайи ич рякъ учвухьна гьапӀри,

¹² хъа ичв чиб-чпихьна ва жарадарихьна вуйи масанвал, ич учвухьна айи масанвалси, Агъайи гьубкӀну ва артухъра кади туври.

¹³ Ва гъит Гьадгъу учву, ихь Агъа Иса Чан вари гирами халкьра хъади гъюру Йигъ гъяйизкьан, ихь Аллагьдин ва Адашдин улихь марцциди гъузбан бадали, гирамивали ацӀнайи ичв юкӀвар мюгькам апӀри. Амин.