Фессалоник-1 1 - Гирами Китаб

¹ Павелихьан, Силвандихьан ва Тимофейихьан – Фессалоникдиъ айи Адаш Аллагьдин ва Агъа Иса Месигьдин хъугърудариз. Ужʼвал учвуз ва мясляаьт!

Фессалоникдиъ гъабхьи хъугъувализ чухсагъул

² Учу ич ккарагбариъ, учву кӀваин апӀури, учвуз гъапӀубдиз Аллагьдиз гьаммишан чухсагъул кӀурача.

³ Учу ихь Адаш Аллагьдин улихь ичв ляхнариинди вуйи хъугъвал, юкӀв абцӀну зигру масанвалин жафа, ихь Агъа Иса Месигьдихъ хъугъувалиин ичв мюгькамди дийигънайивал гьаммишан кӀваинди гъибтрача.

⁴ Учуз аьгъячуз, гъардшар, учву Аллагьдиз ккунду, Гьадгъу учву ктагъну,

⁵ гьаз гъапиш, учу учвуз гъабхи Ужувлан хабар неинки гафариинди, хъа гьацира аьхю кьувват, Гирами Рюгь хъади вуйи ва думу гьякь вуйивал улупру лап дерин хъугъувал вуйи. Учвуз аьгъячвуз, учу учвухъди хьайиган фициб саягъниинди учу яшамиш гъахьнуш. Гьаци хьувал учвуз ужувлаз вуйи,

⁶ ва учву учуна Агъайи апӀруб апӀури гъахьнийчва. Учву Ужувлан хабар, зурба аьзаб-аьзиятназ дилигди, Гирами Рюгьну туву шадвалиинди кьабул гъапӀнийчва.

⁷ Гьаддиз учву Македонияйиъна Ахаяйиъ айи вари хъугърудариз мисал вуди гъахьунчва.

⁸ Гьамус учвлантина Агъайин гаф неинки Македонияйиъна Ахаяйиъ рабгъура, хъа гьацира – Аллагьдихъ учву хъугъра, кӀуру хабар варишвариз дубшна. Ва сарун дидкан фукӀара пуб учуз алабхъурадар.

⁹ Учу наанди гъушишра, варишвариъ, учву учу фици кьабул гъапӀнуш, гьаддикан ктибтури шулчуз. Дурари хъана, чӀиви ва гьякь вуйи Аллагьдин гъуллугънаъ хьпан бадали, учву фици идоларихьан Гьадму Аллагьдихъна гъафнуш, ктибтури шулчуз.

¹⁰ Дурари гьацира Аллагьди чӀиви гъапӀу Чан Бализ – гьамус гъюз ккайи Суддин хъялнаккан ккадаъру Исайиз, аьршариан Думу гъяйиз, учву ккилигури гъузну ккуниваликан ктибтури шулчуз.