Эвел 6 - Гирами Китаб

¹ Инсанар жилиин артухъ шулайи. Хъа бабкан шулайи шубар

² Заанурин баяриз успагьиди рякъюри гъахьну ва чпиз кьабул гъахьидар хпарди гъадагъури гъахьну.

³ РАББИЙИ кӀуру: «Узу адмийиз туву нефес дугъаъ гьаргандиз хьибдар. Адми аьжалсуз дар, ва дугъан уьмрин вахт варжна къад йистӀан хьибдар».

⁴ Думу вахтари ва хъасинра жилиин зурба жан хъайи адмийир гъахьнийи, фицики Заанурин баяр инсанарин шубарихъди духьну, бицӀидар гъахьнийи. Гъушу вахтарин кьувватлу касар вуйи дурар машгьур гъахьнийи.

Заанури Нюгьдиз гими апӀуз табшурмиш апӀуб

⁵ РАББИЙИЗ жилиин инсанарин улдугнайивал, дурарин кӀван фикрар ва хиялар гьаммишан писдар вуйивал рябкъюру.

⁶ Думу жилиин адми арайиз хубʼин швумал шулу ва Чан кӀваъ дерд зигуру.

⁷ Хъа РАББИЙИ гьамци кӀуру: «Узу арайиз гъабхи инсаният жилилан тӀанкь апӀидиза. Узу адмийирра, мал-къарара, нахшрарра, ничхрарра тӀанкь апӀидиза, гьаз гъапиш, дурар арайиз хубʼин швумал вуза».

⁸ РАББИЙИЗ сар НюгьтӀан кьабулди дайи.

⁹ Магьа Нюгьдин тухмикан ихтилат: думу вахтнан инсанарин арайиъ дугъри ва саб нукьсан ктрур сар НюгьтӀан адайи. Нюгьдин уьмур Заанурихъди гъубшну.

¹⁰ Нюгьдиз шубур бай айи: Сим, Хам ва Яфет.

¹¹ Заанурин улихь жил пуч дубхьнайи ва писвалари абцӀнайи.

¹² Заануриз жил пуч дубхьнайиб гъябкънийи, фицики вари инсанар кьяни рякъюъди гъягъюз хъюгънийи.

¹³ Хъа Заанури Нюгьдиз кӀуру: – Узу жилиин вари чӀивиб терг апӀидиза, фицики дурарин писвалари жил алабцӀна. Гьамус Узу дурар вари тӀанкь апӀидиза ва дурарихъди жилра ккидипидиза.

¹⁴ Хъа уву увуз гакӀвликан гими апӀин. Гимийин айитӀишвра гьадабтӀ, айтӀанра зиъланра къир йив.

¹⁵ Магьа уву думу фици дапӀну ккундуш: дидин ярхишин шубудварж хъуршил ади апӀин, яркьушин – хьуцӀур, ягълишин – сумчӀур.

¹⁶ Гимийиин гъваъ апӀин, гъваиккнаси саб хъуршлинсиб урхъра гъибт, саб гъвалхъан урчӀарра гъит. Дидин айитӀишв шубуб мертебайиз пай апӀин.

¹⁷ Узу жил шту ккапӀдиза ва заварин кӀанакк ил али мутму вари тӀанкь апӀидиза. Жилиин алиб вари йибкӀиди.

¹⁸ Хъа увухъди Узу йикьрар йитӀидиза. Гимийиъ уву учӀвдива, увухъди – яв баярра, яв хпирра, яв баярин хпарра.

¹⁹ Гимийизди, вари гьяйванатарикан жут-жутди хпибна жилиб, увухъди дурарра уьрхбан бадали, аъ.

²⁰ Увухъди, жут-жутди вари жюрейин ничхрарикан, гьар жюре мал-къарайикан ва гьарсаб чӀивишнакан, чиб чӀивиди гъузбан бадали, гимийизди гъиди.

²¹ Увухьди, увузра, дураризра, жюрбежюр ипӀруб гъадабгъ.

²² Нюгьди, чаз Заанури амур гъапӀубси, вари апӀуру.