Эвел 46 - Гирами Китаб

Якьуб хизанра хъади Египетдиз гъягъюб

¹ Израил чаз айиб вари хьади рякъюъ учӀвру. Думу Беэр-Шевайиз гъюру ва душваъ чан адаш Исакьди икрам апӀурайи Заануриз гъурбнар апӀуру.

² Йишвну нивкӀуъ Заанури Израилиз кӀуру: – Якьуб! Я Якьуб! – Гьай, – кӀуру Якьубди.

³ Хъасин Заанури гъапи: – Узу Заанур вуза, яв адашдин Заанур, Египетдиз гъягъюз гучӀ мапӀан, фицики Узу увлантина гьадушваъ зурба халкь артмиш апӀидиза.

⁴ Узу увухъди Египетдиз гъягъидиза ва кьяляхъра душвʼан Узу уву адагъидиза. Уву кечмиш шлуган, яв улар хъяркьру хилар Юсуфдин хилар хьиди.

⁵ Якьуб Беэр-Шевайиан удучӀвуру. Израилин (Якьубдин) баяри чпин адашна, бицӀидарна, дишагьлийир фяряуьнди дурар хуз хътау аьрабйириъ итну, рякьюъ учӀвнийи.

⁶ Дурари чпихьди, Ханаандиъ гъазанмиш гъапӀу мал-къара ва имбу мутму гъадабгънийи. Магьа Якьуб вари чан насил хъади Египетдиз гъафнийи.

⁷ Дугъу чахьди Египетдиз баяр, шубар ва худлар – вари чан насил гъадабгънийи.

⁸ Египетдиз гъафи Израилин баярин ччвурар – Якьуб ва дугъан насил: Якьубдин сарпи бай – Рувим.

⁹ Рувимдин баяр: Ханох, Фаллу, Хецрон ва Харми.

¹⁰ Симеондин баяр: Емуил, Ямин, Охад, Яхин, Цохар ва Ханаан дишагьлийикан гъахьи бай – Шаул.

¹¹ Левийин баяр: Гершон, Кааф ва Мерари.

¹² Ягьудайин баяр: Эр, Онан, Шелагь, Перез ва Зерагь. Эрна Онан Ханаандиъ имиди гъакӀнийи, хъа Перездиз Хецронна Хамул баяр гъахьнийи.

¹³ Иссахардин баяр: Тола, Пувва, Яшуб ва Шимрон.

¹⁴ Забулундин баяр: Серед, Элон ва Яхлел.

¹⁵ Мурар Якьубдин Лияйикан, дурарин Дина ришси, Паддан-Арамдиъ гъахьи баяр ву. Вари мурар сумчӀурна шубур кас вуйи.

¹⁶ Гаддин баяр: Цифион, Хагги, Шуни, Эцбон, Ери, Ароди ва Арели.

¹⁷ Ашерин баяр: Имна, Ишʼва, Ишʼви ва Брия. Дурарин чи – Серах. Брияйин баяр: Хевер ва Малкиил.

¹⁸ Му бицӀидар Якьубдиз Лаванди чан риш Лияйиз гъаравашди туву Зилфийикан гъахьидар ву. Вари – йицӀийирхьур кас.

¹⁹ Якьубдин хпир Рахиликан гъахьи баяр: Юсуф ва Вениамин.

²⁰ Египетдиъ Юсуфдиз Гелиополиъ диндин гъуллугъчи Потиперайин риш Аснатди Манасна Ефраим баяр хуру.

²¹ Вениаминдин баяр: Бел, Бехер, Ашбел, Гера, Нааман, Ехи, Рош, Муппим, Хуппим ва Ард.

²² Мурар Якьубдин хпир Рахилин баяр вуйи. Вари – йицӀиюкьур кас.

²³ Дандин бай: Хушим.

²⁴ Нефталимдин баяр: Яхцел, Гуни, Ецер ва Шиллем.

²⁵ Му баяр Якьубдиз, Лаванди чан риш Рахилиз гъаравашди туву Билхайикан гъашидар вуйи. Вари – ургур кас.

²⁶ Якьубдихъди Египетдиз гъафидар, баярин хпар ктарди, дугъан вари диш наслар – йирхьцӀурна йирхьур кас вуйи.

²⁷ Думуганайиз Египетдиъ Юсуфдиз бабкан гъахьи баяр кьюр вуйи. Египетдиз гъафи Якьубдин хизан ургцӀур касдикан ибарат вуйи.

²⁸ Якьубди Юсуфдихьна, Гошендиз чпин улихьна Юсуф гъюри кӀури, улихьди Ягьуда гьаънийи.

²⁹ Юсуф, аьраба ккибтӀуз буйругъ тувну, чан адаш Израил къаршуламиш апӀуз Гошендиз гъушнийи. Магьа думу чан адашдин улихь хьа: Юсуф адашдин гардандиъ архьру. Юсуф адашдин хабаъ кьаназ ишури гъузнийи.

³⁰ Хъа Израили Юсуфдиз гъапи: – Сарун уву йиз улариз чӀивиди гъяркъхъантина, гъачӀишра баладарзуз.

³¹ Юсуфди чан гъардшаризна адашдин хуландариз гъапи: – Узу фяряуьндихьна гъягъидиза ва дугъаз: «Ханаан жилариин яшамиш шулайи гъардшарна йиз адашдин хал-хизан узухьна дуфна.

³² Му адмийир габнар ву; дурари мал-къара уьбхюри шулу. Дурари чпихьди чпин мал-къарайин лижарна чпин мутму гъабхну», – пидиза.

³³ Фяряуьнди учвуз дих дапӀну: «Фу кеспнан адмийир вучва?» кӀури гьерхиган,

³⁴ учву гьамци жаваб тувай: «Учу, яв лукӀар, ич абйирси, бицӀидихъанмина мал-къарайиин эллешмиш духьнайидар вуча». Хъа дугъу Гошен жилиин учву гъитди, гьаз гъапиш египтари марччар уьрхрудар чиркиндар вуди гьисаб апӀура.