Эвел 41 - Гирами Китаб

Юсуфди фяряуьндин нивкӀарин мяна ктибтура

¹ Кьюд йис гъябгъюру. Фяряуьндиз нивкӀ рябкъюру: думу Нил нирин гъирагъдихъ дийигънади шулу.

² Ва магьа, нирʼан ургуб хюни за шулу – сакӀлидар, чагъидар – ва дурари чӀеэригъ укӀ ипӀуз хъюгъру.

³ Дурарин кьяляхъди Нилиан ургубсана хюни удучӀвуру – лигуз ранг алдрудар, услидар ва дурар гьатмунударин багахьна душну дийигъуру.

⁴ Лигуз ранг алдру ва усли хюнйири сакӀли ва чагъи хюнйир итӀуру. Гьаму вахтна фяряуьн хъиргру.

⁵ Думу хъана ахуру. Дугъаз жара нивкӀ рябкъюру: ургуб дяхнин кӀулар – ужудар, ацӀнайидар – саб кьаблиин алидар.

⁶ Дурарин кьяляхъди ургубсана кӀул аьхю шулу – зяифдар ва мани-къур ригъ гьудубчӀврушвхъанди гъюру микӀлу улургнайидар.

⁷ Зяиф дяхнин кӀулари ужунудар ва ацӀнайидар хътӀюркьюру. Гьаму вахтна фяряуьн хъиргру, лигуруш, му нивкӀтӀан дайи.

⁸ ГвачӀинган дугъак гъалабулугъ кабхъру. Дугъу Египетдин вари фалчйир ва аьяндрар уч апӀуру ва чан нивкӀар дурариз ктитуру, амма сарихьанра дурарин мяна ачухъ апӀуз шулдар.

⁹ Гьадмуган чяхрарин аьхюри фяряуьндиз кӀуру: – Йиз тахсир кӀваин шулайиз.

¹⁰ Саб ражари фяряуьндиз чан гъуллугъчйирикан хъял гъафнийи, гьаддиз узуна уьл убжрударин аьхюр, эскрарин аьхюрин хулаъ айи дустагъдиъ итнийчу.

¹¹ Узузра, дугъазра сатӀиди сад йишван нивкӀар гъяркъюнчуз, гьарсаб нивкӀ чан мяна айиб вуйи.

¹² Душваъ учухъди эскрарин аьхюрин гъуллугъчи, сар жигьил жугьуд, хъайчухъди. Дугъаз ич нивкӀар ктитнийча ва дугъу дурарин мяна ачухъ гъапӀнийчуз: гьарсаб нивкӀ гьапӀруб вуш гъапнийчуз.

¹³ Дугъу гъапибси вари гъабхьнура вуйи: узу муганайиздин гъуллугъниин дерккнийи, хъа уьл убжрударин аьхюр маргълиин улурччвнийи.

¹⁴ Фяряуьнди Юсуф хуз гьаъру. Гьяракат дапӀну думу дустагъдиан адауру. Дугъан маш-кӀул къайдайиз хуру, палат гьюдюхюру ва фяряуьндин улихь духну дерккру.

¹⁵ Фяряуьнди Юсуфдиз гъапи: – Узуз нивкӀ гъябкъюнзуз, амма сарихьанра дидин мяна ктибтуз шуладар. Хъа узуз, уву нивкӀарин гъавриъ ахърур ва дурарин мяна ачухъ апӀуз шлур ву кӀури, деебхьназуз.

¹⁶ Юсуфдира: – Узу ваъ, хъа Заанури фяряуьндин нивкӀарин гъавриъ ахъуз ва дугъаз ужʼвалин жаваб тувуз кюмек апӀиди, – гъапи.

¹⁷ Фяряуьнди Юсуфдиз: – Узуз, узу Нилин гъирагъдихъ дийигъну гъяркъюнзуз,

¹⁸ ва саб дупну нирʼан чагъи ва сакӀли ургуб хюни за шулу ва чӀеэригъ укӀ ипӀуз хъюгъру.

¹⁹ Дурарин кьяляхъди ургуб жара хюнира за гъаши – кӀурбар азагнайидар, услидар ва гьаци хявидар, йиз уьмриъ мегьел дицистар Египетдин жилариин гъяркъюр дарза.

²⁰ Усал ва хяви хюнйири сифте удучӀву ургуб чагъи хюнйир гъитӀнийи.

²¹ Гьамци гъитӀнийишра, мурари тмундар гъитӀну кӀури, сарихьанра пуз хьибдайи, гьаз гъапиш дурар чпин гьаци, сифтеси хявиди гъузнийи. Гьаму арайиъ узу хъиргнийзу.

²² Хъасин узуз, саб кьаблиин ужуб тумру ацӀнайи ургуб дяхнин кӀул алди гъябкъюнзуз.

²³ Дурарин кьяляхъди ургуб жара кӀулар ктучӀвнийи. Дурар деерццнайидар, зяифдар ва мани-къур ригъ гьудубчӀврушвхъанди гъюру микӀлу улургнайидар вуйи.

²⁴ Зяиф кӀулари тухъ кӀулар хътӀюркьнийи. Узу дидкан фалчйириз гъапунза, хъа сарихьанра мяна ктибтуз гъабхьундар.

²⁵ Юсуфди фяряуьндиз гъапи: – Фяряуьндин му кьюб нивкӀун мяна саб ву. Заанури фяряуьндиз, Чав гьапӀуз ккаш, улихьмиди ачухъ апӀура.

²⁶ Ургуб ужуб хюни – мурар ургуд йис, ва ужуб дяхнин ургуб кӀулра – ургуд йис. Му нивкӀарин мяна саб ву.

²⁷ Кьяляхъди гъафи ургуб усал ва лигуз ранг алдру хюнйир – мурар ургуд йис, ва гьаци мани-къур ригъ гьудубчӀврушвхъанди гъюру микӀлу улургнайи, зяиф ургбиб кӀуларра – мурар гаш абхъру ургуд йис ву.

²⁸ Узу фяряуьндиз гъапиганси, Заануриз Чав апӀуз ккайибдикан фяряуьндиз улупуз ккунди а.

²⁹ Египетдин вари жилариина гизаф бегьер хру ургуд йис улубкьура,

³⁰ хъа дурарин кьяляхъди гаш абхъру ургуд йис гъиди. Думуган Египетдиъ вари булвал кӀваълан гьархди ва гашʼвали жил гъяцӀал апӀиди.

³¹ Булвалин кьяляхъди гъюру гашʼвалиан, мугагьнайиздин тухъʼвал му жилиин кӀваълан гьархди, гьаз гъапиш гашʼвал гизаф писуб хьибди.

³² Хъа фяряуьндиз нивкӀ кьюбан текрар хьуб, Заанури багарихьди гьаци шлуб Чав ижмиди гьял дапӀнайивал улупура.

³³ Гъит фяряуьнди фагьум-фикир хъайи адми агри ва Египетдин аьхюрди дерккри.

³⁴ Гъит фяряуьнди, гьюкуматдин варишвариъ гъуллугъчйир дерккри ва гьадму авадан ургуд йисандин арайиъ Египетдин бегьернан хьубпи пай мягьсул уч апӀри.

³⁵ Гъит гьадму авадан йисари чпин хилиъ абхъру вари сурсат уч апӀри ва фяряуьндин гьюкмиинди думу ризкь шагьрариъ уьбхри.

³⁶ Думу сурсат Египетдиъ абхъру ургуд йисандин гашʼвализ кюмек хьибди. Гьаци гъабшиган, инсанар гашʼвалиан йихидар.

³⁷ Фяряуьндиз ва вари дугъан гъуллугъчйириз му гафар кьабул гъаши.

³⁸ Фяряуьнди гъуллугъчйирихьан гьерхру: – Дихъуринхъа ухьуз сарун Заанурин Рюгьну чан кӀваъ агъавал апӀурайи гьамцир кас?

³⁹ Хъа фяряуьнди Юсуфдиз кӀуру: – Эгер Заанури увуз му вари ачухъ дапӀнаш, сарун увутӀан фагьум-фикир хъайир адар.

⁴⁰ Узу уву йиз хулан аьхюрди дерккразаву. Вари йиз халкь яв буйругъариз мютӀюгъ хьибди. Анжагъ саб аьхювалин тахтниин узу увутӀан зина хьидиза.

⁴¹ Фяряуьнди Юсуфдиз гъамцира гъапнийи: – Лиг, узу яв хилиъ вари Египет ивраза.

⁴² Дугъу чан тӀубхъан чан мугьур кайи тӀублан хътапӀу ва Юсуфдин тӀубахъ хъапӀу. Дугъу Юсуфдиин назук парчайин палат алабхьу ва гардандиъ гъизилин зунжур ипу.

⁴³ Фяряуьнди Юсуфдихьна, чан гьюкуматдин кьюрпи инсандиз лайикь вуйи аьраба тувну. Юсуф гьадму аьрабайиъди гъягъруган, дугъан улихьди гъягъюри гъаши эскрари зарбди «Икрам!» кӀури шуйи. Гьамци фяряуьнди Юсуф вари Египетдин аьхюрди дерккнийи.

⁴⁴ Хъа фяряуьнди Юсуфдиз гъапи: – Фяряуьн узу вушра, вари Египетдиъ яв ихтияр дарди гьич сарихьанра ришвузкьан хьибдар.

⁴⁵ Фяряуьнди Юсуфдиз Цафнат-Панах кӀуру ччвурра тувру ва дугъу дугъаз хпирди Аснат дитру. Аснат Гелиополь шагьриъ диндин гъуллугъчи Потиперайин риш вуйи. Гьамци Юсуф, Египетдин вари жилилан ул илбицуз, рякъюъ учвӀру.

⁴⁶ Египетдин паччагь фяряуьндин гъуллугънаъ дийигъу вахтна Юсуфдин сумчӀур йис вуйи. Юсуф, фяряуьн гъитну, вари Египетдин жиларилан илдицуз, рякъʼин гъаши.

⁴⁷ Ургуд авадан йисари жили гъалин бегьер туву.

⁴⁸ Юсуфди Египетдиъ думу авадан ургуд йисандин вари мягьсул уч апӀуру. ХутӀлариан уч гъапӀу рузи багахь хьайи шагьриъ уьбхюз дивру.

⁴⁹ Юсуфди уч гъапӀу бегьер гьадмукьан вуйики – гьюлихъ гъумкьан. Дугъу дидин сан-гьисабкьан гъабхури имдайи, гьаз гъапиш думу гьисаб апӀуз даршлубкьан вуйи.

⁵⁰ Гаш йисар гъяйиз, Юсуфдиз Гелиополиъ диндин гъуллугъчи Потиперайин риш Аснатдикан кьюр байра гъахьнийи.

⁵¹ Юсуфди чан сарпи бализ «Манас («кӀваълан гьауз гъитрур»), – кӀуру, – гьаз гъапиш Заанури узухьди вари йиз аьзабар ва йиз адашдин хал кӀваълан гьархуз гъитну».

⁵² Кьюрпи бализ «Ефраим («бегьерлу хьуз гъитрур»), – кӀуру, – гьаз гъапиш, Заанури узу аьзабар гъизигу жилиин узу бегьерлу гъапӀну».

⁵³ Египетдин ургуд авадан йис аьхирихъна гъафи.

⁵⁴ Юсуфди улихьнаси гъапиганси, гашʼвалин ургуд йис ккергънийи. Гашʼвал вари жара жилариинра алабхънийи, амма ипӀруб анжагъ саб ЕгипетдиътӀан адайи.

⁵⁵ Египетдин жилиин гаш алабхъу. Адмийир ипӀруб ккун апӀури, фяряуьндиз ккарагуз хъюгъю, хъа фяряуьнди дурариз гъапи: – Юсуфдихьна гъарахай ва гьадгъу кӀурубси апӀинай.

⁵⁶ Вари уьлке гашʼвалиъ абхъган, Юсуфди амбарханйир арццнийи, ва Египетдин агьлар ризкь масу гъадабгъуз гъюри гъахьнийи, гьаз гъапиш Египетдиъ яман гаш абхънайи.

⁵⁷ Вари уьлкйириан Египетдиз Юсуфдихьна ризкь масу гъадабгъуз гъюйи, гьаз гъапиш вари дюньяйиъ яман гаш абхънайи.