Эвел 40 - Гирами Китаб

Юсуфди нивкӀарин мяна ктибтуб

¹ Гьадму гьядисйир духьну сацӀиб вахтналан фяряуьндин чяхрарин аьхюрикан ва фяряуьндиз уьл убжрударин аьхюрикан, чпин агъайин – фяряуьндин улихь тахсрар ктахьнийи.

² Фяряуьндиз чан кьюр гъуллугъчийикан – чяхрарин аьхюриканна уьл убжрударин аьхюрикан хъял гъюру

³ ва дурар, паччагь уьрхру эскрарин аьхюрин хулаъ айи, Юсуф итнайи дустагъдиъ итру.

⁴ Кьюридинра гъайгъу зигбан бадали, эскрарин аьхюри дурар Юсуфдин хиликкна тувнийи. Юсуф дурарин гъайгъушнаъ учӀвнийи. Дустагъдиъ итну сацӀиб вахтналан

⁵ дурариз кьюридизра – фяряуьндин чяхраринна уьлин аьхюдариз – сад йишван нивкӀар рякъюру. Дурариз гъяркъю гьарсаб нивкӀуъ чан мяна айи.

⁶ Хъа йигъан гьиринган дурарихьна гъафи Юсуфдиз дурар фти-вуш пашман дапӀнади рякъюру.

⁷ Чахъди чан аьхюрин хулаъ айи дустагъдиъ айи фяряуьндин гьадму гъуллугъчйирихьан Юсуфди гьерхру: – Гъи гьаз мици пашманди ачва?

⁸ – Учуз кьюридизра нивкӀар гъяркъюнчуз, – жаваб тувру дурари, – хъа дурарин мяна ктибтуз шлур мушваъ адар. Юсуфди гъапи: – Анжагъ ЗаанурихьантӀан шулдар инсанарихьди нивкӀарин мяна ачухъ апӀуз гъитуз. Кидитай ичв нивкӀар узуз.

⁹ Чяхрарин аьхюри Юсуфдиз чан нивкӀ ктибтуру: – Узуз нивкӀукди тӀумтӀин шир гъябкъюнзуз.

¹⁰ Дидʼин шубуб циркил алийи. Ширну кьюкьяр гъапӀубси, дишла кюкю адабшвуру ва кюкйирра тӀумтӀин кабариз илтӀикӀуру.

¹¹ Йиз хилиъ фяряуьндин чяхрин кӀарч айиз. Узу, тӀумтӀар гъадагъну, тӀумтӀун шид чяхрин кӀарчназди кючӀюкьну, думу кӀарч фяряуьндин хилиз тувунза.

¹² – Магьа дидин мяна, – кӀуру Юсуфди. – Шубуб циркил – шубуд йигъ ву.

¹³ Шубуд йигълан фяряуьнди уву за апӀиди ва яв муганайиздин гъуллугъниин дерккдиву. Уву фяряуьндиз, фяряуьндин чяхрарин аьхюр вуйи вахтариси, чан чяхрин кӀарч хидива.

¹⁴ Думу ужуб вахт гъафиган, миннат апӀуразавукан, узу кӀваин апӀинава: узкан фяряуьндиз, узу дустагъдиан адаъбан бадали, узхъанди гаф йипава.

¹⁵ Узу гужназ жугьдарин жиларилан гъурхунзу ва мушваъра, дустагъдиъ итузкьан, гъапӀуб фукӀара адариз.

¹⁶ Уьл убжрударин аьхюри, Юсуфди сабпи нивкӀун мяна хайирназ ктибтуб дябкъну, кӀуру: – Узузра нивкӀ гъябкъюнзуз. Йиз кӀулʼин шубуб гъярзинка иливнайи.

¹⁷ Зиин алибдиъ фяряуьндиз гьар жюрейин дуржнайи итӀрудар айиз, аммаки йиз кӀулʼин али гъярзинкайиан дурар жакьвари удуйи.

¹⁸ – Магьа дидин мяна, – кӀуру Юсуфди, – шубуб гъярзинка – шубуд йигъ.

¹⁹ Шубуд йигълан фяряуьнди увура за апӀиди – яв кӀул алдабтӀиди, хъа яв жандак маргълиин улубччвиди, ва жакьвари думу убдиди.

²⁰ Фяряуьнди шубудпи йигъан, учв бабкан гъахьи йигъаз бахш вуди, чан гъуллугъчйириз шадлугъар ккергъру. Дурарин улихьна дугъу дустагъдиан чяхраринна уьл убжрударин аьхюдар хуз гъитру.

²¹ Чяхрарин аьхюр чан ляхниин дерккру, ва дугъу фяряуьндин хилиъ чяхрин кӀарч ивру.

²² Хъа уьл убжрударин аьхюр, Юсуфди гъапиганси, маргълиин улурччвуру.

²³ Аммаки чяхрарин аьхюри Юсуфдикан кӀваинкьан гъапӀундайи. Дугъаз Юсуф кӀваълан гьархнийи.