Эвел 4 - Гирами Китаб

Каин ва Авел

¹ Адам чан хпир Гьавайихъди шулу, хпир гъагъдиъ шулу. Хъа Каин («жвуваз гъадагъур») бабкан шулу, ва хпири кӀуру: «РАББИЙИН кюмекниинди адми гъахьунзуз».

² Хъасин дугъу Каиндин чве Авел хуру. Авел марччар уьрхрур, хъа Каин жилихъ лихрур шулу.

³ СацӀиб вахтналан Каинди жилин мейвайикан РАББИЙИЗ багъиш апӀуру.

⁴ Авелира чан лижаъ сифте гъахьи ччиларин жандкарин чагъидарстар паяр хуру. РАББИЙИЗ Авелна дугъу багъиш гъапӀдар кьабул гъахьнийи,

⁵ хъа Каинна дугъу багъиш гъапӀдар кьабул гъахьундайи. Каиндиз яман хъял гъюру, дугъан маш кӀару шулу.

⁶ РАББИЙИ Каиндиз кӀуру: – Гьаз хъял гъюравуз? Маш гьаз кӀару дапӀнава?

⁷ Эгер уву гьякьлуди апӀури гъашиш, уву кьабул дарапӀди гъузур кӀурана? Эгер уву гьякьлуди апӀури даршиш, яв урчӀарихъ увуз гуннагь ккепӀна. Увухьна дидин яман тямягь хьибди, аммаки уву дидʼин агъавал дапӀну ккунду.

⁸ Каинди чан чве Авелиз кӀуру: – Гъач гьудучӀвурхьа. ХутӀлиъ айиган, Каин чан чве Авелиин алархьуру ва думу йикӀуру.

⁹ Хъа РАББИЙИ Каиндихьан гьерхру: – Яв чве Авел наан аяв? – Аьгъдарзуз. Узу, йиз чве улиъ уьрхюрайир, вуйинхъа? – жаваб тувру дугъу.

¹⁰ РАББИЙИ гъапи: – Фу гъапӀва? Яв чвуччвун ифдин дихну жилиан Узуз гьарай апӀура.

¹¹ Гьамусдихъантина уву, яв хиларилантина удубзу яв чвуччвун ифи кьабул гъапӀу жилилан ултӀурккну, балайикк ккахърайир вува.

¹² Жилихъ лихруган, увуз сарун диди чан кьувват тувидар. Уву, жилилан утӀурккну, хал хътрур хьидива.

¹³ Хъа Каинди РАББИЙИЗ кӀуру: – Узуз гьадабтӀнайи жаза, узхьан аьгь апӀуз шлубтӀан гизаф ву.

¹⁴ Магьа, гьамус узу жилилан ултӀурккурава, узу Увуз дярякъди хьиди, утӀурккну, жилиин хал хътрур хьиди узкан, ва узуз алахъу шли вушра узу йивну йикӀиди.

¹⁵ Хъа РАББИЙИ дугъаз гъапи: – Ваъ, шли уву, Каин, йивну гъачӀиш, дугълан ургуб ражари хъял алдабгъиди. РАББИЙИ Каиндик, алахъу сарира думу йивну диликӀуз, лишан апӀуру.

¹⁶ Хъа Каин РАББИЙИХЬАН гьудучӀвну гъягъюру ва Эдемдихьантина, ригъ гьудубчӀвру терефнаъ, Нод ругариин ерлемиш шулу.

Каиндин наслар

¹⁷ Каин чан хпирихъди шулу, хпир гъагъдиъ шулу ва Янок кӀуру бай хуру. Думу вахтна дугъу шагьур диврайи, шагьриз чан бай Янокдин ччвур тувру.

¹⁸ Янокдиз бай – Ирад шулу, Ираддиз бай – Мехиаил шулу, Мехиаилиз Метушаэл шулу. Метушаэлиз бай – Лемек шулу.

¹⁹ Хъа Лемекди чаз кьюр шив гъадагъуру: сарин ччвур Ада, кьюбпирин ччвур Цилла вуйи.

²⁰ Адайиз Явал кӀуру бай шулу. Дугъкан, чпин лижарра хъади, чадрариъ яшамиш шлударин ата-баба гъахьну.

²¹ Дугъан чвуччвун ччвур Ювал вуйи. Думу чюнграриин ва швутӀрамариин мукьмар йивру варидарин аба вуйи.

²² Циллайиз Тувалкаин шулу. Дугъкан йифриканна рукькан вари жюрейин алатар апӀрур шулу. Тувалкаиндин чи Наама вуйи.

²³ Хъа Лемекди чан хпариз кӀуру: – Ада ва Цилла! Йиз сеснахъ хъебехъай! Йиз хпар, йиз гафариз иб тувай! Узуз зиян апӀру адми йивну йикӀидиза. Узуз гъурд йивру бицӀирра йивну йикӀидиза.

²⁴ Эгер Каиндихъанди ургуб ражари артухъ хъял алдабгъуруш, хъа Лемекдихъанди ургцӀурна ургуб ражари хъял алдабгъиди.

Шит ва Энош

²⁵ Адам хъана чан хпирихъди шулу, хпириз Шит кӀуру бай шулу. «Заанури узуз Каинди йивну гъачӀи Авелин ерина жара велед тувунзуз», – бицӀириз ччвур тувруган, кӀуру хпири.

²⁶ Шитдизра бай шулу. Дугъу дугъʼин Энош кӀуру ччвур иливуру. Думу вахтнахъанмина РАББИЙИЗ икрам апӀувал ккебгъру.